କନକ ବ୍ୟୁରୋ : ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଭବାନୀପୁର ବିଧାନସଭା ଆସନ ପାଇଁ ନାମାଙ୍କନ ଦାଖଲ କରିଛନ୍ତି । କହିରଖୁ କି ମମତା ବାନାର୍ଜୀ ମୁଖ୍ୟମନ୍ତ୍ରୀ ପଦରେ ରହିବାକୁ ହେଲେ ଏହି ଉପନିର୍ବାଚନ ଜିତିବା ନିହାତି ଆବଶ୍ୟକ । ସେପ୍ଟେମ୍ବର ୬ ତାରିଖରେ ନିର୍ବାଚନ ଆୟୋଗ ପଶ୍ଚିମବଙ୍ଗର ଭବାନୀପୁର ଆସନରେ ଉପନିର୍ବାଚନ ହେବା ନେଇ ଅଧିସୂଚନା ଜାରି କରିଥିଲେ । ନାମାଙ୍କନର ଶେଷ ତାରିଖ ସେପ୍ଟେମ୍ବର ୧୩ ତାରିଖ ଥିବା ବେଳେ ଆଜି ମମତା ବାନାର୍ଜୀ ଏହି ଆସନରୁ ପ୍ରତିଦ୍ୱନ୍ଦିତା କରିବାକୁ ନାମାଙ୍କନ ଭରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଥାଉକି ଚଳିତ ବର୍ଷ ମେ’ ମାସରେ ହୋଇଥିବା ପଶ୍ଚିମବଙ୍ଗ ବିଧାନସଭା ନିର୍ବାଚନରେ ମମତା ବାନାର୍ଜୀର ନନ୍ଦୀଗ୍ରାମ ଆସନରୁ ପ୍ରତିଦ୍ୱନ୍ଦିତା କରି ପରାଜିତ ହୋଇଥିଲେ । ସେଠାରେ ବିଜେପି ପ୍ରାର୍ଥୀ ଶୁଭେନ୍ଦୁ ଅଧିକାରୀ ମମତାଙ୍କୁ ପରାଜିତ କରିଥିଲେ । ହେଲେ ଟିଏମସିକୁ ବହୁମତ ମିିଳିବା ପରେ ମମତା ବାନାର୍ଜୀ ମୁଖ୍ୟମନ୍ତ୍ରୀ ହୋଇଥିଲେ । ହେଲେ ସାମ୍ବିଧାନିକ ନିୟମ ମୁତାବକ ତାଙ୍କୁ ୬ ମାସ ମଧ୍ୟରେ ବିଧାୟକ ଭାବେ ରାଜ୍ୟର କୌଣସି ବିଧାନସଭା କ୍ଷେତ୍ରରୁ ବିଜୟୀ ହେବାକୁ ପଡିବ ।
ଏହି କ୍ରମରେ ଭବାନୀପୁର ଆସନରୁ ବିଜୟୀ ହୋଇଥିବା ଟିଏମସି ବିଧାୟକ ଶୋଭନଦେବ ଚଟ୍ଟୋପାଧ୍ୟାୟ ପଦରୁ ଇସ୍ତଫା ଦେବା ପରେ ଏହି ଆସନରୁ ମମତା ବାନାର୍ଜୀ ନିର୍ବାଚନ ଲଢିବାକୁ ଯାଉଛନ୍ତି । ଅନ୍ୟପଟେ ଭବାନୀପୁର ହେଉଛି ମମତାଙ୍କ ପାରମ୍ପରିିକ ଆସନ । ଏହି ଆସନରୁ ସେ ଅନେକବାର ବିଧାୟକ ଭାବେ ନିର୍ବାଚିତ ହୋଇଛନ୍ତି । ହେଲେ ଏଥର ତାଙ୍କୁ ଟକ୍କର ଦେବାକୁ ବିଜେପି ବି ଜଣେ ମହିଳା ପ୍ରାର୍ଥୀଙ୍କୁ ମଇଦାନକୁ ଆଣିଛି ।
ବିଜେପି ନେତ୍ରୀ ପ୍ରିୟଙ୍କା ଟିବରେୱାଲ ମମତାଙ୍କ ବିରୋଧରେ ପ୍ରାର୍ଥୀ ହୋଇଛନ୍ତି । ଗଣମାଧ୍ୟମର ସୂଚନା ମୁତାବକ ପ୍ରିୟଙ୍କା ବିଜେପି ନେତା ବାବୁଲ ସୁପ୍ରିୟୋଙ୍କ ଆଇନ ପରାମର୍ଶଦାତା ଭାବେ କାମ କରୁଥିଲେ । ସେ ୨୦୧୪ରେ ବିଜେପିରେ ଯୋଗ ଦେଇଥିଲେ । ଅନ୍ୟପଟେ ମମତାଙ୍କ ପାରମ୍ପରିକ ପ୍ରତିଦ୍ୱନ୍ଦୀ ବାମମେଣ୍ଟ ବି ଭବାନୀପୁର ଆସନରୁ ପ୍ରାର୍ଥୀ ଦେଇଛି । ମେଣ୍ଟ ତରଫରୁ ସିପିଆଇ(ଏମ) ନେତା ଶ୍ରୀଜୀବ ବିଶ୍ୱାସ ପ୍ରାର୍ଥୀ ହୋଇଛନ୍ତି ।