ଗୁଲାମ ନବୀ ଆଜାଦଙ୍କ ପରେ ରାଜ୍ୟସଭାରେ ବିରୋଧୀଦଳର ନେତା ହେବେ ମଲ୍ଲିକାର୍ଜୁନ ଖଡଗେ । ସୂଚନା ଦେଲେ କଂଗ୍ରେସ ମହାସଚିବ ବେଣୁଗୋପାଳ
କନକ ବ୍ୟୁରୋ : ରାଜ୍ୟସଭାରେ ବିରୋଧୀଦଳ ନେତା ଗୁଲାମ ନବୀ ଆଜାଦଙ୍କ କାର୍ଯ୍ୟକାଳ ଶେଷ ହୋଇଛି । ଏହା ପରେ ରାଜ୍ୟସଭାରେ ବିରୋଧିଦଳ ନେତା ଭାବେ କଂଗ୍ରେସ ପକ୍ଷରୁ ଲୋକସଭାରେ ବିରୋଧୀଦଳ ନେତା ଭୁମିକା ତୁଲାଇଥିବା ବରିଷ୍ଠ ନେତା ମଲ୍ଲିକାର୍ଜୁନ ଖଡଗେଙ୍କୁ ଏହି ପଦରେ ଅବସ୍ଥାପିତ କରାଯିବ ବୋଲି କୁହାଯାଇଛି । ଏନେଇ କଂଗ୍ରେସର ମହାସଚିବ ବେଣୁଗୋପାଳ ରାଓ ସୂଚନା ଦେଇଛନ୍ତି । ସେ କହିଛନ୍ତି କି ଏନେଇ ରାଜ୍ୟସଭାର ସଭାପତି ଭେଙ୍କେୟା ନାଇଡୁଙ୍କୁ ସୂଚନା ଦିଆଯାଇଛି । ଏନେଇ ଦଳ ତରଫରୁ ନିଷ୍ପତ୍ତି କରାଯାଇଥିବା କଥା ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ରାଜ୍ୟସଭାରେ ବିରୋଧୀଦଳର ଉପନେତା ଥିବା କଂଗ୍ରେସର ବରିଷ୍ଠ ନେତା ଆନନ୍ଦ ଶର୍ମା ବି ଆଶା କରୁଥିଲେ କି ଗୁଲାମ ନବୀ ଆଜାଦଙ୍କ ପରେ ଦଳ ତାଙ୍କୁ ରାଜ୍ୟସଭାରେ ବିରୋଧୀଦଳ ନେତା ଭାବେ ମନୋନିତ କରିବ । ହେଲେ ଦଳ ମଲ୍ଲିକାର୍ଜୁନ ଖଡଗେଙ୍କ ଉପରେ ଭରଶା କରିଛି । ଏହା କୁହାଯାଉଛି କି ଶ୍ରୀ ଖଡଗେ ରାହୁଲ ଗାନ୍ଧୀଙ୍କ ଅତି ନିକଟତର ହୋଇଥିବାରୁ ଦଳ ତାଙ୍କୁ ଏହି ପଦବୀ ପାଇଁ ଚୟନ କରିଛି । ୨୦୧୯ ରେ ଅନୁଷ୍ଠିତ ହୋଇଥିବା ଲୋକସଭା ନିର୍ବାଚନରେ ଖଡଗେ ପରାଜିତ ହେବା ପରେ ଦଳ ତାଙ୍କୁ ରାଜ୍ୟସଭା ସାଂସଦ ଭାବେ ଚୟନ କରିଥିଲା ।
କହିରଖୁ କି ଫେବୃଆରୀ ୧୫ ତାରିଖ ପରେ ରାଜ୍ୟସଭାରେ ଜମ୍ମୁ-କାଶ୍ମୀର କୌଣସି ସଦସ୍ୟ ରହିବେ ନାହିଁ । ଜମ୍ମୁ-କଶ୍ମୀରରେ ୪ ଟି ରାଜ୍ୟସଭା ଆସନ ରହିଛି । ହେଲେ ଜମ୍ମୁ-କାଶ୍ମୀରକୁ କେନ୍ଦ୍ର ଶାସିତ ରାଜ୍ୟ ଭାବେ ଘୋଷଣା କରାଯିବା ପରେ ସେଠାରେ ଆଉ ନିର୍ବାଚନ ହୋଇନାହିଁ । ତେଣୁ ଜମ୍ମୁ-କାଶ୍ମୀରରୁ କେହି ରାଜ୍ୟସଭା ସାଂସଦ ଭାବେ ନିର୍ବାଚିତ ହୋଇପାରିବେ ନାହିଁ । ସୂଚନା ଥାଉକି ପିଡିପି ପକ୍ଷରୁ ରାଜ୍ୟସଭାରେ ୨ ଜଣ ସାଂସଦ ରହିଛନ୍ତି । ସେମାନଙ୍କ ମଧ୍ୟରୁ ନଜିର ଅହମ୍ମଦଙ୍କ କାର୍ଯ୍ୟକାଳ ୧୦ ଫେବୃଆରୀ ଦିନ ଶେଷ ହୋଇଥିବା ବେଳେ ମୀର ମହମ୍ମଦ ପୈୟାଜଙ୍କ କାର୍ଯ୍ୟକାଳ ୧୫ ଫେବୃଆରୀ ଦିନ ଶେଷ ହେବାକୁ ଯାଉଛି ।
ଅନ୍ୟପଟେ ଗୁଲାମ ନବୀ ଆଜାଦ୍ ବି ଦ୍ୱିତୀୟ ଥର ରାଜ୍ୟସଭାରେ ବିରୋଧୀଦଳର ନେତା ହୋଇପାରିବେ । ହେଲେ ଏଥିପାଇଁ ୨ ମାସ ପରେ କେରଳରୁ ତାଙ୍କୁ ଜିତିବାକୁ ପଡିବ । କାରଣ ଏପ୍ରିଲ ମାସରେ କେରଳରେ ୩ ଟି ରାଜ୍ୟସଭା ଆସନ ଖାଲି ହେବାକୁ ଯାଉଛି । ତାହା ମଧ୍ୟରେ ଗୋଟିଏ ଆସନ କଂଗ୍ରେସ ହାତରେ ରହିଛି । ସେହି ଆସନରୁ ଯଦି କଂଗ୍ରେସ ଗୁଲାମ ନବୀଙ୍କୁ ଚୟନ କରେ ତେବେ ସେ ପୁଣିଥରେ ରାଜ୍ୟସଭାକୁ ଫେରି ପାରିବେ ।