ଚର୍ଚ୍ଚାରେ ମାଲକାନଗିରିର ମଲାଲା : ବିଛିନ୍ନାଞ୍ଚଳ ଗୋରାସେତୁ ଗାଁରେ ଶିକ୍ଷାର ଆଲୋକ ବାଣ୍ଟୁଛନ୍ତି କୁସୁମଣୀ ଖିଲୋ; ଶିକ୍ଷକଙ୍କ ପାଦ ପଡୁନଥବା ଅଂଚଳରେ କୁନି କୁନି ପିଲାଙ୍କୁ ପଢାଉଛନ୍ତି ପାଠ
କନକ ବ୍ୟୁରୋ : ମାଲକାନଗିରି ବିଛିନ୍ନାଞ୍ଚଳର ଗୋରାସେତୁ ଗାଁ । ଲାଲଗଡ ଭାବେ ପରିଚିତ ଏହି ଅଞ୍ଚଳରେ ଏବେ ଶୁଭୁଛି ଛୋଟଛୋଟ ପିଲାଙ୍କ ପାଠପଢା ସ୍ୱର । ଆଗରୁ ଏଠି ବନ୍ଧୁକ ଗର୍ଜୁଥିଲା । ମାଓ ବାହିନୀର ଭୟରେ ଶିକ୍ଷକ କେବଳ ଗାଁକୁ ଆସି ପିଲାଙ୍କୁ ପଢା ବହି ଓ ସ୍କୁଲ ୟୁନିଫର୍ମ ଧରାଇ ଫଟୋ ଉଠାଇ ଫେରିଆସୁଥିଲେ । ତେଣୁ ପିଲାଙ୍କ ବହି ଫିଟୁନଥିଲା କିମ୍ବା ସିଲଟ, ଖାତାରେ ଗାରଟିଏ ଟଣା ହେଉନଥିଲା । ହେଲେ ଲାଲ ଇଲାକାର ଏହି ଚିତ୍ର ବଦଳାଇଛନ୍ତି ମାଲକାନଗିରିର ମଲାଲା ।
Kanak News is now on WhatsApp
Join and get latest news updates delivered to you via WhatsApp
ସେହି ଗୋରାସେତୁ ଗାଁର ଯୁକ୍ତ ୩ରେ ପାଠ ପଢୁଥିବା ଝିଅ କୁଷ୍ମଣୀ ଖିଲୋ ଏବେ ଏହି ଅନ୍ଧାରୀ ମୂଲକରେ ଶିକ୍ଷାର ଆଲୋକ ପହଂଚାଇବାକୁ ଅଂଟା ଭିଡିଛନ୍ତି । କଲେଜରେ ପାଠ ପଢୁଥିବା ଏହି ଝିଅ ଦିନରେ ବିଲ, ବାଡିରେ କାମ କରନ୍ତି ଆଉ ରାତିରେ ଛୋଟଛୋଟ ପିଲାଙ୍କୁ କରୁଛନ୍ତି ଶିକ୍ଷାଦାନ । ବିଶେଷ କରି କରୋନା ଲକଡାଉନ ସମୟରେ ଏକ ପରିତ୍ୟକ୍ତ ଘରେ ପ୍ରାୟ ୪୦ ଜଣ ପିଲାଙ୍କୁ ପାଠ ପଢାଇବା ସହିତ ଶାନ୍ତି ଓ ମୈତ୍ରୀର ବାର୍ତା ଦେଉଛନ୍ତି କୁଷ୍ମଣୀ । ଠିକ ଯେମିତି ଆତଙ୍କର ଉପତ୍ୟକା ପାକିସ୍ତାନରେ ଶିକ୍ଷାର ଆଲୋକ ବାଂଟୁଥିଲେ ମଲାଲା ୟୁସୁଫଜାଇ ।