ମାଲକାନଗିରି ଜିଲ୍ଲାପାଳଙ୍କ ବ୍ୟକ୍ତିଗତ ସହାୟକଙ୍କ ମୃତ୍ୟୁ ଘଟଣାରେ ଚିଠି ଲେଖି ପ୍ରଶ୍ନ ଉଠାଇଲେ ପତ୍ନୀ । ପଚାରିଲେ, କାହିଁକି କରିଛନ୍ତି ଆତ୍ମହତ୍ୟା, କାରଣ କୁହନ୍ତୁ ଜିଲ୍ଲାପାଳ?
କନକ ବ୍ୟୁରୋ : ବର୍ଷେ ପରେ ବି ମାଲକାନଗିରି ଜିଲ୍ଲାପାଳଙ୍କ ପିଏ ଦେବନାରାୟଣ ପଣ୍ଡାଙ୍କ ମୃତ୍ୟୁ ଘଟଣା ଉପରୁ ପରଦା ହଟିନି । ଆଉ ଏହାରି ଭିତରେ ନ୍ୟାୟ ପାଇବାକୁ ସଂଘର୍ଷ ଜାରି ରଖିଛନ୍ତି ମୃତ ଦେବନାରାୟଣ ପଣ୍ଡାଙ୍କ ପତ୍ନୀ ବନଜା ପଣ୍ଡା । ତକ୍ରାଳୀନ ଜିଲ୍ଲାପାଳ ମନୀଷ ଅଗ୍ରୱାଲଙ୍କ ପ୍ରତି ପୁରା ଘଟଣାରେ କାହିଁକି ଏତେ ଅନୁକମ୍ପା ପ୍ରଦର୍ଶନ କରାଯାଉଛି ବୋଲି ସଂବାଦ ସମ୍ପାଦକଙ୍କୁ ପତ୍ର ଲେଖିଛନ୍ତି ବନଜା ।
Kanak News is now on WhatsApp
Join and get latest news updates delivered to you via WhatsApp
ମାଲକାନଗିରି ଜିଲ୍ଲାପାଳଙ୍କ ପିଏ ଦେବନାରାୟଣ ପଣ୍ଡାଙ୍କ ମୃତ୍ୟୁ ମାମଲାରେ ନ୍ୟାୟ ପାଇବାକୁ ସଂଘର୍ଷ ଜାରି ରଖିଛନ୍ତି ମୃତ ଦେବନାରାୟଣ ପଣ୍ଡାଙ୍କ ପତ୍ନୀ ବନଜା ପଣ୍ଡା । ଘଟଣାକୁ ବର୍ଷେ ପୁରିଥିଲେ ମଧ୍ୟ ପରିବାର ଏବେ ରହିଛି ନ୍ୟାୟ ଅପେକ୍ଷାରେ । ପୁଲିସର ତଦନ୍ତ ପ୍ରକ୍ରିୟାକୁ ନେଇ ଏହା ମଧ୍ୟରେ ବନଜା ଉଠାଇଛନ୍ତି ପୁଳା ପୁଳା ପ୍ରଶ୍ନ ।
ଦେବ ନାରାୟଣ ପଣ୍ଡା ଯଦି ଆତ୍ମହତ୍ୟା କରିଛନ୍ତି, ତାହାର କାରଣ କଣ?
ଯଦି ଏହା ହତ୍ୟାକାଣ୍ଡ, ଏଥିରେ କେଉଁମାନେ ସଂପୃକ୍ତ ?
ଅଗ୍ନିଶମ ବିଭାଗକୁ ପୁଲିସ ପକ୍ଷରୁ କୌଣସି ଫୋନ୍ କଲ୍ ଯାଇନଥିଲା
ଶବ ପଡିଥିବା ସ୍ଥାନ ମାଲକାନଗିରି ପୋଲିସ ଜାଣିଲା କେମିତି ?
ଆତ୍ମହତ୍ୟାର ଆଗରୁ ଦେଖିଥିବା ଲୋକଙ୍କ ତଥ୍ୟ ସାର୍ବଜନୀନ କରୁ ପୋଲିସ
ପୋଲିସ ଏହି ଘଟଣାରେ ସେମାନଙ୍କୁ ଡାକି ଜେରା କରିଛି କେବେ ?
ପାଣିରେ ବୁଡି ମରିଥିବା ଲୋକର ନାକରେ ରକ୍ତ ଆସିଲା କୁଆଡୁ ?
ପୁରା ଘଟଣାରେ ମାଲକାନଗିରି ତକ୍ରାଳୀନ ଜିଲ୍ଲାପାଳ ମନୀଷ ଅଗ୍ରୱାଲଙ୍କୁ ପୋଲିସ ଜେରା କରୁନି କାହିଁକି ?
ସଂବାଦକୁ ଲେଖିଥିବା ଚିଠିରେ ଏମିତି ଅନେକ ପ୍ରଶ୍ନ ଉଠାଇଛନ୍ତି ବନଜା । ଆଗରୁ ମଧ୍ୟ ବନଜା ୪୦ରୁ ଅଧିକ ପ୍ରଶ୍ନ କରି ମାଲକାନଗିରି ପୋଲିସକୁ ଟାଣିଥିଲେ କାଠଗଡାକୁ । ଏବେ ସଂବାଦକୁ ଚିଠି ଲେଖି ତକ୍ରାଳୀନ ଜିଲ୍ଲାପାଳଙ୍କ ପ୍ରତି ଅନୁକମ୍ପାର କାରଣ ଖୋଜିବାକୁ ଅନୁରୋଧ କରିଛନ୍ତି ।
୨୦୧୯ ଡିସେମ୍ୱର ୨୮ରେ ମାଲକାନଗିରି ଜିଲ୍ଲାପାଳଙ୍କ ପିଏ ଦେବନାରାୟଣ ପଣ୍ଡାଙ୍କ ରହସ୍ୟଜନକ ମୃତ୍ୟୁ ଘଟିଥିଲା । ସତୀଗୁଡା ଡ୍ୟାମ ପିଣି ଭିତରୁ ଉଦ୍ଧାର ହୋଇଥିଲା ତାଙ୍କର ମୃତଦେହ । ତେବେ ଏପ୍ରିଲ ୧୨ ତାରିଖରେ କାହିଁକି ଭୁବନେଶ୍ୱରକୁ ଏତେ ବିଳମ୍ୱରେ ପରୀକ୍ଷା ପାଇଁ ପଠା ଯାଇଥିଲା ଭିସେରା , ସେ ନେଇ ପ୍ରଶ୍ନ ଉଠାଇଛନ୍ତି ବନଜା । ଏହାରି ଭିତରେ ବର୍ଷେ ପରେ ବି ସ୍ୱାମୀଙ୍କ ରହସ୍ୟଜନକ ମୃତ୍ୟୁ ନେଇ ନ୍ୟାୟ ଅପେକ୍ଷାରେ ବନଜା