ମାଲକାନଗିରିର କୁନି ଧାବକ ରୁଦ୍ର । ପ୍ରତିଦିନ ୩ରୁ ୪ କିମି ଦୌଡୁଛନ୍ତି ୪ ବର୍ଷର ଶିଶୁ । ୪୨ କିମି ମାରାଥନ ଦୌଡିବା ଲାଗି କରୁଛନ୍ତି ଯୋଜନା ।

କନକ ବ୍ୟୁରୋ: ବୟସ ମାତ୍ର ୪ ବର୍ଷ । ହେଲେ ୪୨ କିଲୋମିଟର ମାରାଥନ ଦୌଡିବା ଲାଗି ଲକ୍ଷ୍ୟ ରଖିଛି କୁନି ପିଲା । ଆମେ କହୁଛି ମାଲକାନଗିରି ଜିଲ୍ଲାର କୁନି ଧାବକ ରୁଦ୍ରଙ୍କ କଥା, ଯିଏ କଅଁଳା ବୟସରେ ପ୍ରତି ଦିନ ୩ ରୁ ୪ କିଲୋମିଟର ଦଉଡି ନୂଆ ରେକର୍ଡ ହାସଲ କରିବାରେ ସଫଳ ହୋଇଛନ୍ତି ।

କଅଁଳ ବୟସରୁ ଦଉଡି ଦଉଡି ଆକାଶ ଛୁଇଁବାର ନିଶା । ଠିକ ଭାବେ କଥା କହି ସିଖିନି ନଥିବା କୁନି ପୁଅ ମନରେ ଅଛି ଗାଁ ପାଇଁ ଗୌରବ ଆଣିବର ଆଶା । ସେହି ଆଶାରେ ସବୁଦିନ ସହରର ରାଜରାସ୍ତାରେ ଦଉଡୁଛନ୍ତି କୁନି ଧାବକ । ମାଲକାନଗିରି ଜିଲ୍ଲାର କୁନି ଧାବକ ତନୁଷ ପ୍ରସାଦ ସେଠୀ ଓରଫ ରୁଦ୍ର । ସକାଳୁ ସକାଳୁ ନିଜ ଜେଜେଙ୍କ ସହ ବ୍ୟାୟାମ କରିବାକୁ ବାହାରି ପଡନ୍ତି ରୁଦ୍ର । ଆଉ ବ୍ୟାୟାମ ସାରି ଆରମ୍ଭ ହୁଏ ଦଉଡ ଅଭ୍ୟାସ । ପ୍ରଥମେ ୫୦୦ ମିଟର ପରେ ଏକ କିଲୋମିଟର ଆଉ ଏବେ ୩ରୁ ୪ କିଲୋମିଟର ଦଉଡୁଛି ରୁଦ୍ର । ପ୍ରଥମେ ଦଣ୍ଡକାରଣ୍ୟ ଖୋଳ ପଡିଆ କିମ୍ବା ଷ୍ଟାଡିୟମରେ ଦଉଡିବା ପରେ ସହର ଭିତରେ ଗୋଟିଏ ଚକ୍କର କାଟେ ମାଲକାନଗିରିର ଏହି କୁନି ପ୍ରତିଭା ।

ରୁଦ୍ରଙ୍କ ଜେଜେ ବି. ରବିନ୍ଦ୍ର ପୁଲିସ ବିଭାଗରେ ହାବିଲଦାର ଭାବେ କାର୍ଯ୍ୟ କରନ୍ତି । ୫୭ ବର୍ଷୀୟ ଜେଜେ ନିଜକୁ ଫିଟ ରଖିବା ଲାଗି ପ୍ରତିଦିନ ଦୌଡିବା ସହ ଫୁଟବଲ ଖେଳନ୍ତି ଏବଂ ପିଲାଙ୍କୁ ତଲିମ ମଧ୍ୟ ଦିଅନ୍ତି । ଆଉ ଜେଜେଙ୍କୁ ଦେଖି ଦଉଡ ମଇଦାନକୁ ଓହ୍ଲାଇଛନ୍ତି ନାତି ରୁଦ୍ର । ଆଉ ଆଗାମି ଦିନରେ ୨୨ ବର୍ଷୀୟ ବର୍ଗରେ ୪୨ କିଲୋମିଟର ମାରାଥନ ଦଉଡ ପ୍ରତିଯୋଗୀତା ପାଇଁ ଏବେଠୁ ରୁଦ୍ରଙ୍କୁ ପ୍ରସ୍ତୁତ କରାଉଛନ୍ତି ଜେଜେ ବି. ରବିନ୍ଦ୍ର । ଆଉ ପୁଅ ନିଷ୍ଠା ଦେଖି କୃଷୀ ବିଭାଗରେ କାମ କରୁଥିବା ବାପା ଓ ମାଆ ମଧ୍ୟ ସହଯୋଗ କରନ୍ତି । ପୂର୍ବରୁ ରାଜ୍ୟରେ ବୁଦ୍ଧିଆ ସିଂ ପରି ଅନେକ କୁନି ଧାବକ ଦେଶ ତଥା ରାଜ୍ୟର ନାଁ ରଖିଛନ୍ତି । ଆଉ ଉଚିତ ତାଲିମ ମିଳିଲେ ରୁଦ୍ର ମଧ୍ୟ ଭଲ ପ୍ରଦର୍ଶନ କରିବ ବୋଲି ଆଶା ରଖିଛନ୍ତି ଜିଲ୍ଲା ବାସୀ ।