ବାବୁ ଥିଲେ ବାବୁ ରହିଲେ, ଆଇଏଏସଙ୍କ ପାଇଁ କ’ଣ ସବୁ ମାଫ୍: ବ୍ୟକ୍ତିଗତ ସହାୟକଙ୍କ ହତ୍ୟା ମାମଲାରେ ମାଲକାନଗିରିର ପୂର୍ବତନ ଜିଲ୍ଲାପାଳଙ୍କୁ କେବେ ଜେରା କରିବ ପୁଲିସ୍?
ଏଫଆଇଆରରେ ସଙ୍ଗୀନ୍ ଅଭିଯୋଗ ଆଣିଲେ ମୃତକଙ୍କ ପତ୍ନୀ
କନକ ବ୍ୟୁରୋ: ବ୍ୟକ୍ତିଗତ ସହାୟକଙ୍କ ମୃତ୍ୟୁରେ ହତ୍ୟା ମାମଲା ଦାୟର ହୋଇଥିବା ମାଲକାନଗିରିର ପୂର୍ବତନ ଜିଲ୍ଲାପାଳଙ୍କୁ ମୃତ୍ୟୁ ମାମଲାରେ ପଚରା ଉଚରା କରାଯିବ କି ନାହିଁ । ନା ଜଣେ ବଡ ବାବୁ ହୋଇଥିବାରୁ ପୁଲିସ ତାଙ୍କୁ ପଚରା ଉଚାର କରିବାକୁ ସାହାସ କରିବ ନାହିଁ । ଏମିତି ଅନେକ ପ୍ରଶ୍ନକୁ ନେଇ ଏବେ ଚର୍ଚ୍ଚା ଚାଲିଛି । କେବଳ ବଦଳି କରି ସରକାର କାମ ସାରିଦେଲେ ବୋଲି ମଧ୍ୟ ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ବାବୁଙ୍କ ପାଇଁ କଣ ସାତ ଖୁନ ମାଫ? ମାଲକାନଗିରି ଜିଲ୍ଲାପାଳ ଥିବା ସମୟରେ ମନିଷ ଅଗ୍ରୱାଲଙ୍କ ନାଁରେ ଆସିଥିବା ହତ୍ୟା ଅଭିଯୋଗର କେବେ ହେବ ଯାଂଚ ? କେବେ ପୋଲିସ ଏହି ବଡ ବାବୁଙ୍କୁ ପଚରାଉଚରା କରିବ ? କାରଣ ମନିଷଙ୍କ ନାଁରେ ତାଙ୍କ ବ୍ୟକ୍ତିଗତ ସହାୟକ ଦେବ ନାରାୟଣ ପଣ୍ଡାଙ୍କୁ ହତ୍ୟା କରିଥିବା ନେଇ ସଙ୍ଗିନ ଅଭିଯୋଗ ଆସିଛି । ଥାନାରେ ଏଫଆଇଆର କରିଛନ୍ତି ମୃତ ଦେବ ନାରାୟଣ ପଣ୍ଡାଙ୍କ ପତ୍ନୀ ବନଜା ପଣ୍ଡା । ତେବେ ଗୁରୁତ୍ୱପୂର୍ଣ୍ଣ କଥା ହେଲା, ଯେତେବେଳେ ଜିଲ୍ଲାପାଳଙ୍କ ନାଁରେ ହତ୍ୟା ଅଭିଯୋଗ ଆସିଲା, ଏବଂ ଗଣମାଧ୍ୟମରେ କଥା ପ୍ରଘଟ ହେଲା, ତତକ୍ଷଣାତ ଜିଲ୍ଲାପାଳଙ୍କୁ ବଦଳି କରାଯାଇ ଯୋଜନା ସଂଯୋଜନାର ଉପ-ସଚିବ ଭାବେ ଦାୟିତ୍ୱ ଦିଆଗଲା ।
ଏପଟେ ଥାନାରେ ହୋଇଥିବା ଏଫଆଇଆରରେ ଦେବ ନାରାୟଣଙ୍କ ପତ୍ନୀ ସିଧା ସିଧା ଅଭିଯୋଗ ଆଣିଛନ୍ତି, ପିସି କାରବାର ପାଇଁ ତାଙ୍କ ସ୍ୱାମୀଙ୍କୁ ମାଧ୍ୟମ କରିବାକୁ ଉଦ୍ୟମ କରିଥିଲେ ଜିଲ୍ଲାପାଳ । ପିସି ଟଙ୍କା ରଖିବାର ଦାୟିତ୍ୱ ନେବେ କି ବୋଲି ଜିଲ୍ଲାପାଳ ତାଙ୍କ ସ୍ୱାମୀଙ୍କୁ ପ୍ରଶ୍ନ ମଧ୍ୟ କରିଥିଲେ । ତେବେ ଏଥିରେ ସେ ଅରାଜି ହେବାରୁ ତାଙ୍କ ସ୍ଥାନରେ ଆଉ ଜଣଙ୍କୁ ନିଯୁକ୍ତି କରାଗଲା । ୨୭.୧୨.୨୦୧୯ରେ ସକାଳ ପ୍ରାୟ ୧୦ଟା ସମୟରେ ଜିଲ୍ଲାପାଳଙ୍କ ଘରୋଇ କାର୍ଯ୍ୟାଳୟକୁ ଯାଇଥିଲେ ଦେବ ନାରାୟଣ । ହେଲେ ଆଉ ଫେରିନଥିଲେ । ୨୮.୧୨.୨୦୧୯ରେ ତାଙ୍କର ମୃତଦେହ ମିଳିଥିଲା । ଏହି ହତ୍ୟାକାଣ୍ଡରେ ପୂର୍ବତନ ଜିଲ୍ଲପାଳ ମନିଷ ଅଗ୍ରୱାଲ, ଡିଇଓ ଭି. ଭେନୁ, ଷ୍ଟେନୋ ପ୍ରକାଶ ସ୍ୱାଇଁ ଏବଂ ଅବସରପ୍ରାପ୍ତ ଓଆରଏସ ଅଫିସର ଭଗବାନ ପାଣିଗ୍ରାହୀଙ୍କ ସମ୍ପୃକ୍ତି ରହିଥିବା ଅଭିଯୋଗ ହୋଇଛି ।
ତେବେ ଯଦି ସାଧାରଣ ଲୋକଙ୍କ ପାଇଁ ଆଇନ ଯେପରି କଡାକଡି ହେଉଛି, ଠିକ ସେହିପରି ଜଣେ ପ୍ରଶାସନିକ ଅଧିକାରୀ ଏଥିରୁ କେମିତି ବାଦ ପଡୁଛନ୍ତି ତାହା ଏବେ ସବୁଠାରୁ ବଡ ପ୍ରଶ୍ନ ହୋଇଛି । କାରଣ ଏଠି ଅଭିଯୁକ୍ତ କୁହାଯାଉଥିବା ପୂର୍ବତନ ଜିଲ୍ଲାପାଳଙ୍କୁ ପଚରା ଉଚରା କରିବା ତ ଦୁରର କଥା, ଜିଲ୍ଲା ମୁଖ୍ୟାଳୟରୁ ତାଙ୍କୁ ଅନ୍ୟତ୍ର ପଠାଇ ଦିଆଯାଉଛି । ସେପଟେ ଜିଲ୍ଲାପାଳଙ୍କ ବ୍ୟକ୍ତିଗତ ସହାୟକ ଦେବନାରାୟଣ ପଣ୍ଡାଙ୍କ ହତ୍ୟା ମାମଲାରେ ମନୀଷଙ୍କ ସମେତ ୪ଜଣଙ୍କ ନାଁରେ ମାମଲା ରୁଜୁ ହୋଇଥିଲା । ନଜର ପକାନ୍ତୁ ଏହି ଏଫଆଇଆର ଉପରେ । ଜିଲ୍ଲାପାଳଙ୍କ ସମେତ ୪ଜଣ ଅଭିଯୁକ୍ତଙ୍କ ନାଁରେ ଲାଗିଛି ସଙ୍ଗିନ ଦଫା ।
ଧାରା ୩୦୨-ହତ୍ୟା
ଧାରା ୫୦୬-ଅପରାଧିକ ଭୟଭିତତା
ଧାରା ୨୦୧-ପ୍ରମାଣ ନଷ୍ଟ କରିବା
ଧାରା ୨୦୪-ପ୍ରମାଣ ପାଇଁ ଥିବା କାଗଜପତ୍ରକୁ ନଷ୍ଟ କରିବା
ଧାରା ୧୨୦-ବି-ଅପରାଧିକ ଷଡଯନ୍ତ୍ର
ଧାରା ୩୪-ଏକାଧିକ ବ୍ୟକ୍ତିଙ୍କ ସମ୍ପୃକ୍ତି
୨୦୧୯ ଡିସେମ୍ବର ୨୮ରେ ସତୀଗୁଡା ଜଳଭଣ୍ଡାରରୁ ମାଲକାନଗିରି ଜିଲ୍ଲାପାଳଙ୍କ ବ୍ୟକ୍ତିଗତ ସହାୟକ ଦେବନାରାୟଣ ପଣ୍ଡାଙ୍କ ମୃତଦେହ ଉଦ୍ଧାର କରିଥିଲା ପୁଲିସ । ମୃତ୍ୟୁର ୭ ମାସ ପରେ ଅର୍ଥାତ ୨୦୨୦ ଅଗଷ୍ଟ ମାସରେ ଦେବନାରାୟଣଙ୍କ ପରିବାର ଲୋକ ଜିଲ୍ଲାପାଳଙ୍କ ସମେତ ୪ ଜଣଙ୍କ ବିରୋଧରେ ହତ୍ୟା ଅଭିଯୋଗ ଆଣିଥିଲେ । ୨୦୨୦ ନଭେମ୍ବର ୧୩ରେ ମାମଲାରୁ ଶୁଣାଣି କରି ଏସଡିଜେଏମ କୋର୍ଟ ୪ଜଣଙ୍କ ନାଁରେ ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଥିଲେ ।