ମେକ୍ ଇନ୍ ଓଡ଼ିଶା କନକ୍ଲେଭରେ ସାମିଲ ହେଲେ ବଡ଼ ବଡ଼ ଶିଳ୍ପପତି। ଆଶା ଦେଖାଇଲେ ସଜ୍ଜନ ଜିନ୍ଦଲ,ଅନୀଲ ଅଗ୍ରୱାଲଙ୍କ ଭଳି ଶିଳ୍ପଦ୍ୟୋଗୀ।

କନକ ବ୍ୟୁରୋ: ମେକ୍ ଇନ୍ ଓଡିଶା କନକ୍ଲେଭ୍-୨୦୨୨ ମଞ୍ଚରୁ ରାଜ୍ୟବାସୀଙ୍କୁ ବଡ ବଡ ଶିଳ୍ପର ସ୍ୱପ୍ନ ଦେଖାଇଛନ୍ତି ଦେଶ ବିଦେଶରୁ ଆସିଥିବା ଶିଳ୍ପପତି । ରାଜ୍ୟ ସରକାରଙ୍କ ସୂଚନା ଅନୁସାରେ ମେକ୍ ଇନ୍ ଓଡିଶାର ମୋଟ ୧୪୫ଟି ପୁଞ୍ଜିନିବେଶ ପାଇଁ ଆଗ୍ରହ ପ୍ରକାଶ ପାଇଛି । ଏହା ଦ୍ୱାରା ରାଜ୍ୟକୁ ୭ଲକ୍ଷ ୨୬ ହଜାର ୧୨୮ କୋଟି ୪୫ଲକ୍ଷ ଟଙ୍କାର ପୁଞ୍ଜିନିବେଶ ହେବ । ୩ଲକ୍ଷ ୨୦ ହଜାରରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବାର ସମ୍ଭାବନା ରହିଛି ।

ଆଜି ଦ୍ୱିତୀୟ ଦିନରେ ୬୭ଟି ପୁଞ୍ଜିନିବେଶ ଆଗ୍ରହ ଜରିଆରେ ୫ଲକ୍ଷ ୫୦ ହଜାର ୭୪୨ କୋଟି ୨୬ଲକ୍ଷ ଟଙ୍କାର ନିବେଶ ପାଇଁ ଆଗ୍ରହ ଦେଖାଇଛନ୍ତିି ଶିଳ୍ପପତି । ଯାହା ଦ୍ୱାରା ୨ଲକ୍ଷ ୪୭ହଜାର ୮୯୨ଟି ନିଯୁକ୍ତି ସୁଯୋଗ ସୃଷ୍ଟି ହେବ । ପୂର୍ବରୁ ହୋଇଥିବା ରୋଡ ସୋ ଜରିଆରେ ମେକ୍ ଇନ୍ ଓଡିଶା ପାଇଁ ୭୮ଟି ନିବେଶ ପାଇଁ ପ୍ରସ୍ତାବ ଆସିଥିଲା । ଯାହାକୁ ଆଜି ଆନୁଷ୍ଠାନିକ ଭାବେ ଗ୍ରହଣ କରାଯାଇଛି । ଏହା ଦ୍ୱାରା ରାଜ୍ୟରକୁ ୧ଲକ୍ଷ ୪୦ ହଜାର ୩୮୬ କୋଟି ୧୯ଲକ୍ଷ ଟଙ୍କା ପୁଞ୍ଜି ନିବେଶ ସମ୍ଭାବନା ରହିଛି । କନକ୍ଲେଭର ଦ୍ୱିତୀୟ ଦିନରେ ଶିଳ୍ପପତିମାନେ ପୁଞ୍ଜିନିବେଶ ନେଇ ଘୋଷଣା କରିବା ସହ ଓଡିଶାକୁ ନେଇ ସେମାନଙ୍କ ଅନୁଭୂତି ବଖାଣିଛନ୍ତି । ଅନ୍ୟପଟେ ଓଡିଶାରେ ପୁଞ୍ଜିନିବେଶ କରିବାକୁ ଶିଳ୍ପପତିଙ୍କୁ ଆହ୍ନାନ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।