ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ମହାବିନାୟକ ପୀଠ । ଝରଣାର କୁଳୁକୁଳ ନାଦ, ମାଙ୍କଡ ଓ ପକ୍ଷୀଙ୍କ କଳରବ ପରିବେଶକୁ କରୁଛି ଆହୁରି ମନୋରମ । ବର୍ଷକ ବାରମାସ ଲାଗିଥାଏ ପର୍ଯ୍ୟଟକଙ୍କ ଭିଡ
କନକ ବ୍ୟୁରୋ: ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ମହାବିନାୟକ ପୀଠ । ବଣ ପାହାଡ ଘେରା ଏହାର ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ଚଣ୍ଡିଖୋଲର ଏହି ପୀଠରେ ଜମୁଛି ପର୍ଯ୍ୟଟକଙ୍କ ଭିଡ । ଝରଣାର କୁଳୁକୁଳ ନାଦ, ମନୋରମ ପରିବେଶ, ମାଙ୍କଡ ଓ ପକ୍ଷୀଙ୍କ କଳରବ ପରିବେଶକୁ ଆହୁରି ମନୋରମ କରୁଛି । ଏଥିପାଇଁ ତ ଶୀତ ଦିନ ଆସିଲେ ମହାବିନାୟକ ପୀଠକୁ ଛୁଟେ ପର୍ଯ୍ୟଟକଙ୍କ ସୁଅ ।
Kanak News is now on WhatsApp
Join and get latest news updates delivered to you via WhatsApp
ଯାଜପୁର ଜିଲ୍ଳା ଚଣ୍ଡିଖୋଲ ଦେଇ ଯାଇଥିବା ୨ଶହ ନମ୍ବର ଜାତୀୟ ରାଜପଥ କଡରେ ଶୋଭା ପାଉଛି ବାରୁଣାବନ୍ତ ପର୍ବତ । ଏହି ପର୍ବତର ସବୁଜ ଅରଣ୍ୟାନି ଭିତରେ ପୂଜା ପାଉଛନ୍ତି ଆଦି ଦେବତା ଗଜାନନ । ଓଡିଶାର ପଂଚ ପୀଠ ମଧ୍ୟରୁ ଅନ୍ୟତମ ମହାବିନାୟକ କ୍ଷେତ୍ର । ଗଣେଷ, ଭାସ୍କର, ବିଷ୍ନୁ, ଶିବ, ଦୁର୍ଗା ଏହି ଗୋଟିଏ ପୀଠରେ ପୂଜା ପାଉଛନ୍ତି । ବଡି ଭୋରରୁ ପ୍ରଭୁଙ୍କର ପହଡ ଖୋଲାଯାଇ ବିଭିନ୍ନ ନିତୀକାନ୍ତି ହେବା ସହ ପାଶ୍ୱର୍ ଦେବାଦେବୀଙ୍କ ପୂଜାର୍ଚନା କରାଯାଏ ।
ଓଡିଶାର ଶୈଳ ନିବାସ କୁହାଯାଉଥିବା ମହାବିନାୟକ ପୀଠ ଓଡିଶା ପର୍ଯ୍ୟଟନ ମାନଚିତ୍ରର ଏକ ସ୍ୱତନ୍ତ୍ର ସ୍ଥାନରେ ରହିଛି । ବର୍ଷକ ବାରମାସ ଏହି ପୀଠରେ ପର୍ଯ୍ୟଟକଙ୍କ ଭିଡ ଲାଗିଥାଏ । ଏଠାରେ ଯାତ୍ରୀଙ୍କ ସୁବିଧା ପାଇଁ ଯାତ୍ରୀ ନିବାସ ଓ ଅନ୍ୟାନ୍ୟ ସୁବିଧା ରହିଛି । ଏଠାରେ ଥିବା ମାଙ୍କଡ ପର୍ଯ୍ୟଟକମାନଙ୍କର ଯାତ୍ରାକୁ ଆହୁରି ରୋମାଂଚକର କରିଥାନ୍ତି । ତେବେ ଏହି ପର୍ଯ୍ୟଟନ ସ୍ଥଳିର ଆହୁରି ଅଧିକ ବିକାଶ ଆବଶ୍ୟକ । ହେଲେ ରାଜ୍ୟ ସରକାରଙ୍କ ପର୍ଯ୍ୟଟନ ବିଭାଗ ପକ୍ଷରୁ କିଛି ଆଖିଦୃଶିଆ ପଦକ୍ଷେପ ନିଆଯାଉନାହିଁ ବୋଲି କୁହାଯାଉଛି ।
ମହାବିନାୟକ ମନ୍ଦିର ଥିବା ବାରୁଣାବନ୍ତ ପାହାଡକୁ ନେଇ କିଛି ପୌରାଣିକ ତଥ୍ୟ ରହିଛି । କୁହାଯାଏ, ପାଣ୍ଡବମାନେ ଅଜ୍ଞାତବାସ ସମୟରେ ଏହି ବାରୁଣାବନ୍ତ ପାହାଡରେ ଆତ୍ମଗୋପନ କରିଥିଲେ । ୫ଶହ ବର୍ଷର ପୁରୁଣା ଏହି ମନ୍ଦିର ରାଜା ପ୍ରତାପରୁଦ୍ର ଦେବଙ୍କ ଶାସନ ସମୟର ବୋଲି କୁହାଯାଏ ।