କନକ ବ୍ୟୁରୋ : କୋର୍ଟ ପରିସରରେ ବେହୋସ ହେଲେ ପ୍ରଦୀପ ମହାରଥୀ । ଗିରଫ ହେବା ପରେ ପ୍ରଦୀପଙ୍କୁ ଜେଏମଏଫସି କୋର୍ଟରେ ହାଜର କରାଯାଇଛି । ତେବେ କୋର୍ଟ ପରିସରରେ ଗୁରୁତର ଭାବେ ଅସୁସ୍ଥ ହୋଇଥିଲେ ପ୍ରଦୀପ । ଗତକାଲି ପିପିଲିରେ ଫ୍ଲାଇଂ ସ୍କ୍ୱାର୍ଡ ମାଜିଷ୍ଟ୍ରେଟଙ୍କୁ ଆକ୍ରମଣ ଘଟଣାରେ ପ୍ରଦୀପ ମହାରଥୀଙ୍କୁ ଗିରଫ କରିଥିଲା ପୋଲିସ । ତେବେ ଗିରଫ ପୂର୍ବରୁ ଥାନାରେ ଆତ୍ମସର୍ମପଣ କରିଥିଲେ ପ୍ରଦୀପ ।
Kanak News is now on WhatsApp
Join and get latest news updates delivered to you via WhatsApp
ଗିରଫ ପରେ ପୁରୀ ଏସପି କହିଛନ୍ତି, ଫ୍ଲାଇଂ ସ୍କ୍ୱାର୍ଡକୁ ଆକ୍ରମଣ ଘଟଣାରେ ପ୍ରଦୀପଙ୍କ ସମ୍ପୃକ୍ତି ଥିବା ଜଣାପଡିବା ପରେ ତାଙ୍କୁ ଗିରଫ କରିଥିଲା ପୋଲିିସ । ଏପରିକି ଏହି ଘଟଣାରେ ସମ୍ପୃକ୍ତ ଥିବା ଅନ୍ୟ ଅଭିଯୁକ୍ତ ମାନଙ୍କୁ ମଧ୍ୟ ଖୁବଶୀଘ୍ର ଗିରଫ କରାଯିବ ବୋଲି କହିଛନ୍ତି ପୁରୀ ଏସପି । ପ୍ରଦୀପଙ୍କ ବିରୋଧରେ ୧୪୭, ୧୪୮,୧୮୮,୨୯୪,୩୪୧, ୧୮୬,୩୫୩,୩୩୩,୧୭୧ ବି,୫୦୬,୩୦୭,୧୪୯ ଓ ଲୋକପ୍ରତିନିଧି ଆଇନ ୧୨୩ ଦଫା ଲାଗିଛି । ଏପରିକି ଆକ୍ରମଣ ଘଟଣାରେ ପ୍ରଦୀପଙ୍କ ସମ୍ପୃକ୍ତି ଥିବା ପ୍ରମାଣ ମଧ୍ୟ ରହିଛି ବୋଲି ଏସପି ସୂଚନା ଦେଇଛନ୍ତି ।
ଗିରଫ ପୂର୍ବରୁ ଗତକାଲି ରାତିର ପୂରା ଘଟଣା ସର୍ମ୍ପକରେ ମହାରଥୀ ଫେସବୁକରେ ନିଜର ମତ ରଖିଛନ୍ତି । ଗତକାଲି ରାତି ୧୨ଟା ସମୟରେ ତାଙ୍କ ଫାର୍ମହାଉସକୁ କିଛି ସ୍ପେଶାଲ ସ୍କ୍ୱାର୍ଡର ଅଧିକାରୀ ଆସିଥିଲେ । ଫାର୍ମ ହାଉସରେ ବିଦ୍ୟୁତ ନଥିଲେ ମଧ୍ୟ ଗେଟ ତାଲା ଭାଙ୍ଗି ସ୍କ୍ୱାର୍ଡ ଅଧିକାରୀ ମାନେ ଭିତରକୁ ପଶିଥିଲେ । ଫାର୍ମ ହାଉସରେ କିଏ ପଶିଲା ବୋଲି ତାଙ୍କର ଲୋକମାନେ ପଚରାଉଚରା କରିବାରୁ ସେଠାରେ କିଛି ସମୟ ପାଇଁ ଯୁକ୍ତିତର୍କ ହୋଇଥିଲା । ପରେ ବଚସା ହେବା ସହ ଠେଲାପେଲା ମଧ୍ୟ ହୋଇଥିଲା । ଯେଉଁଥିପାଇଁ ମୁୁଁ ଦୁଃଖିତ ଓ ମର୍ମାହତ ବୋଲି ଫେସବୁକ ପେଜରେ କହିଛନ୍ତି ମହାରଥୀ । ତେବେ ଏଭଳି ଘଟଣାରେ ଦଳ କିମ୍ବା ସେ ସମ୍ପୃକ୍ତ ନୁହେଁ ବୋଲି କହିଛନ୍ତି ପ୍ରଦୀପ ମହାରଥୀ । ଆସନ୍ତାକାଲି ପୁରୀ ଲୋକସଭା ଓ ଏହା ଅର୍ନ୍ତଗତ ସମସ୍ତ ବିଧାନସଭା ଆସନରେ ନିର୍ବାଚନ ହେବାକୁ ଥିବା ବେଳେ ମହାରଥୀ ଗିରଫ ହେବା ରାଜ୍ୟ ରାଜନୀତିକୁ ଉଷ୍ମ କରିଛି ।