କନକ ବ୍ୟୁରୋ : ମହାରାଷ୍ଟ୍ର ସରକାରରେ ମନ୍ତ୍ରୀଥିବା ଏନସିପି ନେତା ନୱାବ ମଲ୍ଲିକଙ୍କ ଗିରଫ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଅର୍ଥ ହେରଫେର ମାମଲାରେ ତାଙ୍କୁ ଇଡି ଗିରଫ କରିଥିବା ଜଣାପଡିଛି । ବୁଧବାର ସକାଳେ ଇଡି ତରଫରୁ କିଛି ଅଫିସର ନୱାବ ମଲ୍ଲିକଙ୍କ ଘରେ ପହଂଚି ତାଙ୍କୁ ପଚରା ଉଚରା କରିଥିଲେ । ୧ ଘଂଟାରୁ ଅଧିକ ଜେରା କରିବା ପରେ ଇଡି ପକ୍ଷରୁ ତାଙ୍କୁ ସାଥିରେ ନେଇ ମୁମ୍ବାଇ ସ୍ଥିତ କାର୍ଯ୍ୟାଳୟକୁ ନିଆଯାଇଥିଲା । ସେଠାରେ ତାଙ୍କୁ କିଛି ସମୟ ଜେରା କରିବା ପରେ ଗିରଫ କରାଯାଇଥିବା ଜଣାପଡିଛି ।

Advertisment

ଅଣ୍ଡର ୱାର୍ଲ୍ଡ ସହ ଏକ ଜମି କିଣାବିକା ମାମଲାରେ ଇଡି ପକ୍ଷରୁ ତାଙ୍କୁ ପ୍ରଥମେ ନୋଟିସ କରାଯାଇଥିଲା । ଏହାପରେ ଇଡି ତରଫରୁ ଏହି ମାମଲାରେ ସଂପୃକ୍ତ ଥିବା କିଛି ଲୋକଙ୍କ ବାସଭବନ ଉପରେ ଫେବୃଆରୀ ୧୫ ତାରିଖରେ ଚଢାଉ କରାଯାଇଥିଲା । ଏଥିରେ ୧୯୯୩ ମସିହା ବୋମା ବିସ୍ଫୋରଣ ମାମଲାରେ ମୁଖ୍ୟ ଅଭିଯୁକ୍ତ ଦାଉଦ ଇବ୍ରାହିମଙ୍କ ଦିବଗଂତ ଭଉଣୀ ହସିନା ପାର୍କର, ଭାଇ ଇକବାଲ କାସକର ଓ ଛୋଟ ସକିଲର ସଂପର୍କୀୟ ସଲିମ କ୍ୟୁରେସୀଙ୍କ ଘରେ ବି ଚଢାଉ ହୋଇଥିଲା । ଏହି ମାମଲାରେ  ଇକବାଲ କାସକର ଏବେ ଜେଲରେ ରହିଛନ୍ତି । ତାଙ୍କୁ ଗତ ସପ୍ତାହରେ ଗିରଫ କରାଯାଇଥିଲା ।

ଏହି ମାମଲାରେ ଆଜି ନୱାବ ମଲ୍ଲିକଙ୍କୁ ଗିରଫ କରାଯିବା ପରେ ମୁମ୍ବାଇ ସ୍ଥିତି ଇଡି କାର୍ଯ୍ୟାଳୟ ଆଗରେ ଦଳୀୟ କର୍ମୀମାନେ ହୋ ହାଲ୍ଲା କରିଛନ୍ତି ।