ସଂସଦରେ ‘ମହା’ ତାତି: ଗୃହ ଭିତରେ-ବାହାରେ କଂଗ୍ରେସର ବିରୋଧ । ରାହୁଲ କହିଲେ ଗଣତନ୍ତ୍ରର ହତ୍ୟା, ବିଜେପି କହିଲା ଓଦା ପିଚରେ ରନ ଆଉଟ ହେବାର ସମ୍ଭାବନା ଅଛି
କନକ ବ୍ୟୁରୋ: ଲୋକସଭାର ଶୀତକାଳୀନ ଅଧିବେଶନରେ ମହାରାଷ୍ଟ୍ର ଝଡ । କଂଗ୍ରେସ ନେତା ରାହୁଲ ଗାନ୍ଧୀ ଆଜି ଗୃହରେ କହିଥିଲେ, ଗଣତନ୍ତ୍ରର ହତ୍ୟା କରାଯାଇଛି । ପ୍ରଶ୍ନକାଳରେ ଏହି ବୟାନ ରଖିଥିଲେ ରାହୁଲ । ମହାରାଷ୍ଟ୍ର ପ୍ରସଙ୍ଗରେ ମୋଦି ସରକାର ଉପରେ ଖୁବ ବର୍ଷିଥିଲେ ରାହୁଲ ଗାନ୍ଧୀ । ଏହି ପ୍ରସଙ୍ଗକୁ ନେଇ ଗୃହରେ କିଛି ସମୟ ଧରି ଚାଲିଥିଲା ହୋ-ହଲ୍ଲା । ଗୃହ ଭିତରେ ଯେତିକି ତାତି ବାହାରେ ବି ସେତିକି ତାତି ଥିଲା ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧି ଏବଂ ଅନ୍ୟ କଂଗ୍ରେସ ନେତାମାନେ ସଂସଦ ବାହାରେ ମଧ୍ୟ ପ୍ରତିବାଦ କରିଥିବାର ଦୃଶ୍ୟ ଦେଖିବାକୁ ମିଳିଥିଲା । ଗଣତନ୍ତ୍ରର ହତ୍ୟା ହୋଇଥିବା ନେଇ ଲେଖାଥିବା ପ୍ଲାକାର୍ଡ ଧରି ବିରୋଧ ପ୍ରଦର୍ଶନ କରିଥିଲେ କଂଗ୍ରେସର ନେତା । ମହାରାଷ୍ଟ୍ର ପ୍ରସଙ୍ଗରେ ଘୋଡା ବେପାର ପାଇଁ କଂଗ୍ରେସ ସିଧାସଳଖ ବିଜେପିକୁ ଦାୟୀ କରିଛି । ସାରା ଦେଶକୁ ମୋଦି ସରକାର କ୍ଷମା ମାଗନ୍ତୁ ବୋଲି ଦାବି କରିଛି କଂଗ୍ରେସ ।
ଅନ୍ୟପଟେ ମହାରାଷ୍ଟ୍ର ପ୍ରସଙ୍ଗରେ ବିଜେପିର କହିବା କଥା ହେଲା, ସୁପ୍ରିମକୋର୍ଟଙ୍କ ରାୟକୁ ଅପେକ୍ଷା କରାଯାଉ । ଗୃହ ଭିତରେ ଏବଂ ବାହାରେ ହଙ୍ଗାମା କରିବାର ମାନେ କିଛି ନାହିଁ ।
ଫ୍ଲୋର ଟେଷ୍ଟରେ ହିଁ ସବୁକିଛି ପ୍ରମାଣିତ ହୋଇଯିବ । ତେବେ ଏନସିପି ସୁପ୍ରିମୋ ଶରଦ ପାୱାରଙ୍କୁ କଟାକ୍ଷ କରିଛି ବିଜେପି । ବିଜେପି ନେତା ମୁଖତାର ଆବାସ ନକବି କହିଛନ୍ତି, ଖେଳକୁ ଭଲ ଭାବେ ବୁଝନ୍ତି ଶରଦ ପାୱାର । କଂଗ୍ରେସକୁ ନେଇ ସରକାର ଗଢିବାର ସ୍ୱପ୍ନ ଦେଖୁଥିବା ଏନସିପି ଜାଣି ରଖିବା ଦରକାର , ପିଚ ଓଦା ଥିବା ସମୟରେ ରନ ଆଉଟ ହେବାର ଭୟ ଥାଏ ।
ମହାରାଷ୍ଟ୍ରରେ ଶିବସେନା, ଏନସିପି ଓ କଂଗ୍ରେସ ମେଂଟ ସରକାର ଗଢିବା ପାଇଁ ସମସ୍ତ ପ୍ରସ୍ତୁତି ଶେଷ କରିଥିବା ବେଳେ ରାତି ଅଧିଆ ମେଂଟ ସରକାର ଗଠନ କରିଛି ବିଜେପି । ଯାହାକୁ ସହଜରେ ହଜମ କରିପାରିନାହାନ୍ତି କଂଗ୍ରେସର ନେତୃବୃନ୍ଦ । ଏସବୁ ଭିତରେ ଅପେକ୍ଷା ରହିବ ଆସନ୍ତାକାଲି ସୁପ୍ରିମକୋର୍ଟ ମହାରାଷ୍ଟ୍ର ପ୍ରସଙ୍ଗରେ କି ରାୟ ଶୁଣାଉଛନ୍ତି ।