ମେଲାଣୀ ନିଏନି ମାଆ… ଯେବେ ଯେବେ ସଙ୍କଟ ଆସିଛି ମାଆ ଭିନ୍ନ ଭିନ୍ନ ରୂପରେ ସାମ୍ନାକୁ ଆସିଛି । ମାଆ ଯାଏନି, ମେଲାଣୀ ନିଏନି…
କନକ ବ୍ୟୁରୋ: ମଣିଷ ଏକ, ରୂପ ଅନେକ । ମମତା ଏକ, ଅବତାର ଅନେକ । କେବେ ସେ ମମତାର ମନ୍ଦିର ତ କେବେ ଦୟାର ଭଣ୍ଡାର । ପାଟି ଖୋଲି କହିପାରୁନଥିବା ଭୋକର ଡାକ ଶୁଣି କେବେ ସେ ପେଟ ଭର୍ତ୍ତି ଖୁଆଏ ତ କେବେ ଶତ୍ରୁ ସହ ଲଢି ସିଂହବାହିନୀ ସାଜେ । ସେ ଜଳି ଜାଣେ, ଜାଳି ଜାଣେ । ମରି ଜାଣେ, ମାରି ବି ଜାଣେ । ଅନ୍ୟର ଜୀବନ ବଞ୍ଚାଇବାକୁ ନିଜ ଜୀବନକୁ ବାଜିରେ ଲଗାଇ ଦିଏ । ସବୁ କଷ୍ଟ, ସବୁ ଯନ୍ତ୍ରଣାକୁ ସହି ସମାଜ ସୁଧାରୁ ଥାଏ, ପରିବେଶ ସଫା କରୁଥାଏ… ନାରୀ ଗୋଟିଏ ଡାକରେ କୋଟିଏ ରୂପ…
Kanak News is now on WhatsApp
Join and get latest news updates delivered to you via WhatsApp
କରୋନା କାଳରେ ଏ ସମାଜ ନାରୀଙ୍କ ଅନେକ ଶକ୍ତି ଦେଖିଛି, ଏ ଦେଶ ଅନେକ ରୂପର ବି ଦର୍ଶନ କରିଛି । ଭୋକ, ଭୟ, ସଂକ୍ରମଣ, ସନ୍ଦେହ ଭିତରେ ଅନେକ ଭଲ ଖବର, କେତେ କେତେ ସମ୍ମାନର ଚିତ୍ର ସାମ୍ନାକୁ ଆସିଛି । କେବେ ନାରୀଟିଏ ନିଜ କଅଁଳା ଛୁଆକୁ ଛାଡି କରୋନା ସହ ଲଢେଇ କରିଛି ତ କେବେ କରୋନା କବଜାରୁ ପିଲାକୁ ବଞ୍ଚାଇବାକୁ ସୁଟକେସରେ ଶୁଆଇ ଟାଣି ଟାଣି ନେଇଛି । ମେଡିକାଲରୁ ମଶାଣୀ, ରାଜରାସ୍ତାରୁ ସାଇନ୍ସ ଲ୍ୟାବ । ସଂକ୍ରମଣ ଛେନ ଭାଙ୍ଗିବାକୁ ସବୁଠି ନାରୀଶକ୍ତି ଜଗିଥିବା ଅନୁଭବ କରିଛି ଏ ଜଗତ ।
ଲକଡାଉନ ହେଉ କି ସଟଡାଉନ । ଭୂତାଣୁ ଭୟ ଭିତରେ ନାରୀ ନିଭେଇଥିବା ସବୁତକ ଦାୟିତ୍ୱକୁ ଗୋଟିଏ ଫ୍ରେମରେ ରଖି ଶତ ଶତ ସମ୍ମାନ ଦେଇଛନ୍ତି ମହାରାଷ୍ଟ୍ରର ଚିତ୍ରଶିଳ୍ପୀ ଉଦୟ ମୋହିତେ । ପ୍ରତି ମୁହୂର୍ତ୍ତରେ, ସବୁ ପରିସ୍ଥିତିରେ କରୋନା ଯୋଦ୍ଧା ସାଜିଥିବା ସମସ୍ତ ମହିଳାଙ୍କୁ ଡିଜିଟାଲ ଆର୍ଟ ମାଧ୍ୟମରେ ସେ ସମ୍ମାନ ଦେଇଛନ୍ତି ।
ତେବେ ଲକଡାଉନ ବେଳର ମହିଳାଙ୍କ କଷ୍ଟକୁ ଦୁର୍ଗାପୂଜା ପେଣ୍ଡାଲରେ ପୁଣି ଦେଖିଛି ଦେଶ । କେଉଁଠି ଦାଦନ ରୂପରେ ମାଆ ଦୁର୍ଗା ଏଥର ପୂଜା ପାଇଥିବା ବେଳେ ଅନ୍ୟ କେଉଁଠି ମାଆ ଦୁର୍ଗାଙ୍କୁ ଡାକ୍ତର ନର୍ସ ରୂପରେ ଅବତାରଣା କରାଯାଇଛି । ପୂଜା ପାର୍ବଣର ଏ ମାହୋଲ ଭିତରେ ମେଲାଣୀ ନିଅନ୍ତି ମାଆ, ମୂର୍ତ୍ତୀ ବିସର୍ଜନ କରି ମାଆଙ୍କୁ ବିଦାୟ ଦିଆଯାଏ । ହେଲେ ସତରେ କଣ ମାଆ ଏ ଧରାରୁ ବିଦାୟ ନିଅନ୍ତି ? ସତରେ କଣ ମାଆ କିଛି ଦିନ ପାଇଁ ଧରାବତରଣ କରନ୍ତି ? ନାଃ, ମାଆ ଏଇଠି ଥାଆନ୍ତି, ଆମ ପାଖେ ପାଖେ ଥାଆନ୍ତି, ମାଆ ଯାଆନ୍ତିନି କିଆସନ୍ତିନି, ସେ ସମସ୍ତଙ୍କ ଭିତରେ ବୁଲୁଥାନ୍ତି ଏମିତି ରୂପରେ, ଏମିତି ଅବତାରରେ…