ଏନସିପି ନେତା ନୱାବ ମଲ୍ଲିକଙ୍କ ପାଇଁ ବଢିଲା ଅଡୁଆ, ପଚରା ଉଚରା ପରେ ଘରୁ ନେଇଗଲେ ଇଡି ଅଫିସର

କନକ ବ୍ୟୁରୋ : ମହାରାଷ୍ଟ୍ରର ପୂର୍ବତନ ମନ୍ତ୍ରୀ ତଥା ଏନସିପିର ବରିଷ୍ଠ ନେତା ନୱାବ ମଲ୍ଲିକଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ଆଜି ଘରୁ ଉଠାଇ ନେଇଛି । ସୂଚନା ମୁତାବକ ଆଜି (ବୁଧବାର) ସକାଳ ୬ ଟା ଇଡିର କିଛି କର୍ମଚାରୀ ନୱାବ ମଲ୍ଲିକଙ୍କ ବାସଭବନରେ ପହଂଚି ତାଙ୍କୁ ଜେରା କରିଥିଲେ । ଗୋଟିଏ ଘଂଟା ଜେରା କରିବା ପରେ ଇଡି ଅଫିସରମାନେ ନୱାବଙ୍କୁ ସାଂଗରେ ନେଇଯାଇଥିବା କଥା କୁହାଯାଇଛି । ଏହାପରେ ସକାଳ ୮.୩୦ ରୁ ଇଡି କାର୍ଯ୍ୟାଳୟରେ ନୱାବଙ୍କୁ ଜେରା କରାଯାଉଥିବା କଥା ଜଣାପଡିଛି ।

କହିରଖୁ କି ଅଣ୍ଡରୱାର୍ଲ୍ଡ ସହ କଥିତ ଏକ ସମ୍ପତ୍ତି ମାମଲାରେ ନୱାବ ମଲ୍ଲିକଙ୍କୁ ଇଡି ତରଫରୁ ନୋଟିସ କରାଯାଇଥିଲା । ଏହି ମାମଲାରେ ଏବେ ଇଡି ନୱାବଙ୍କୁ ପଚରା ଉଚରା କରୁଛି । ଏହି କ୍ରମରେ ଆଜି ଇଡି ନୱାବଙ୍କ ବୟାନ ରେକର୍ଡ କରୁଛି ।

ଅଣ୍ଡର ୱାର୍ଲ୍ଡ ସହ ସଂପର୍କ ଓ ସମ୍ପତ୍ତି କିଣାବିକା ମାମଲାରେ ଇଡି ଚଳିତମାସ ୧୫ ତାରିଖରେ ନୱାବ ମଲ୍ଲିକଙ୍କ ଘରେ ଚଢାଉ କରିଥିଲା । ଏହି କ୍ରମରେ ଇଡି ପକ୍ଷରୁ ୧୦ ଟି ସ୍ଥାନରେ ଚଢାଉ କରାଯାଇଥିଲା । ଏଥିରେ ୧୯୯୩ ମସିହା ବୋମା ବିସ୍ଫୋରଣର ମାଷ୍ଟର ମାଇଣ୍ଡ ଦାଉଦ ଇବ୍ରାହିମର ଦିବଗଂତ ଭଉଣୀ ହସିନା ପର୍କର, ଭାଇ ଇକବାଲ କାସକର ଓ ଛୋଟା ସକିଲର ସଂପର୍କୀୟ ସଲିମ କ୍ୟୁରେଶୀଙ୍କ ବାସଭବନ ବି ସାମିଲ ଥିଲା ।