ମହାରାଷ୍ଟ୍ରରେ ଶିବସେନାର ସରକାର ନେଇ ସମ୍ଭାବନା ! ଶରଦ ପାୱାର କହିଲେ କଂଗ୍ରେସ ସହ ଆଲୋଚନା ପରେ ନିଷ୍ପତି
ମୁମ୍ବାଇରେ ଶିବସେନା ଓ ଏନସିପିର ବୈଠକ; ଦିଲ୍ଲୀରେ କଂଗ୍ରେସର ଆଲୋଚନା
କନକ ବ୍ୟୁରୋ: ମହାରାଷ୍ଟ୍ରରେ ଶିବସେନାର ସରକାର ନେଇ ସମ୍ଭାବନା । ଦ୍ୱିତୀୟ ବଡ ଦଳ ଭାବେ ଶିବସେନାକୁ ସରକାର ଗଠନ ପାଇଁ ରାଜ୍ୟପାଳ ଆମନ୍ତ୍ରଣ କରିବା ପରେ ମହାରାଷ୍ଟ୍ରରେ ସରକାର ଗଠନ ନେଇ ରାଜନୈତିକ ମହଲରେ ହଲଚଲ ଦେଖାଦେଇଛି । ମୁମ୍ବାଇରେ ଶିବସେନା ଓ ଏନସିପିର ଚାଲିଛି ଘନ ଘନ ବୈଠକ । ଏନସିପିର ମଧ୍ୟ କୋର କମିଟି ବୈଠକ ବସିଛି । ସେପଟେ ଦିଲ୍ଲୀରେ କଂଗ୍ରେସର ବୈଠକ ବସିଛି । ଶିବସେନାକୁ, ଏନସିପି- କଂଗ୍ରେସ ସମର୍ଥନ କରିବେ କି ନାହିଁ ଏହି ବୈଠକରେ ନିଷ୍ପତି ହୋଇପାରେ ।
Kanak News is now on WhatsApp
Join and get latest news updates delivered to you via WhatsApp
ସରକାର ଗଢିବା ପାଇଁ ବିଜେପି ଅକ୍ଷମତା ପ୍ରକାଶ କରିବା ପରେ ୫୬ ଆସନ ପାଇଥିବା ଶିବସେନାକୁ ଦ୍ୱିତୀୟ ବଡ ଦଳ ଭାବେ ସରକାର ଗଠନ କରିବାକୁ ନିମନ୍ତ୍ରଣ କରିଛନ୍ତି ରାଜ୍ୟପାଳ । ଆଜିି ସଂଧ୍ୟା ସାଢ଼େ ୭ଟା ସୁଦ୍ଧା ସରକାର ଗଠନ ନେଇ ଆଭିମୁଖ୍ୟ ସ୍ପଷ୍ଟ କରିବା ପାଇଁ ଶିବସେନାକୁ କୁହାଯାଇଛି । ମହାରାଷ୍ଟ୍ର ବିଧାନସଭାରେ ବିଜେପି ୧୦୫ ଆସନ ସହ ଏକକ ସଂଖ୍ୟା ଗରିଷ୍ଠ ଦଳ ଭାବେ ସାମ୍ନାକୁ ଆସିଥିଲା । ଉଭୟ ବିଜେପି ଓ ଶିବସେନା ମେଂଟ କରି ନିର୍ବାଚନ ଲଢ଼ିଥିଲେ ବି, ମୁଖ୍ୟମନ୍ତ୍ରୀ ପଦକୁ ନେଇ ଦୁଇ ଦଳ ମଧ୍ୟରେ ସହମତି ହୋଇନଥିଲା । ଫଳରେ ସରକାର ଗଠନ ପ୍ରକ୍ରିୟା ବିଳମ୍ବ ହେବାରେ ଲାଗିଛି ।
ସେପଟେ, ଏନଡିଏରୁ ଓହରିପାରେ ଶିବସେନା । କେନ୍ଦ୍ରମନ୍ତ୍ରୀ ମଣ୍ଡଳରୁ ଇସ୍ତଫା ଦେଲେ ଶିବସେନାର ଏକମାତ୍ର ମନ୍ତ୍ରୀ ଅରବିନ୍ଦ ସାୱନ୍ତ । ମୋଦିଙ୍କ ମନ୍ତ୍ରୀମଣ୍ଡଳରେ ଭାରି ଶିଳ୍ପ ଓ ସାଧାରଣ ଉଦ୍ୟୋଗ ମନ୍ତ୍ରୀ ଥିଲେ ସାୱନ୍ତ । ଇସ୍ତଫା ନେଇ ସେ ଟୁଇଟ୍ କରି ସୂଚନା ଦେଇଛନ୍ତି । ଟୁଇଟରେ ଲେଖିଛନ୍ତି ଲୋକସଭା ନିର୍ବାଚନ ପୂର୍ବରୁ ସରକାର ଗଠନ ନେଇ ବିଜେପି ଓ ଶିବସେନା ମଧ୍ୟରେ ଏକ ଫର୍ମୁଲା ହୋଇଥିଲା । କିନ୍ତୁ ଏବେ ଏହି ଫର୍ମୁଲାକୁ ମାନୁ ନାହିଁ ବିଜେପି । ଶିବସେନା ସବୁବେଳେ ସତ ସାଥିରେ ରହିଥାଏ । ତେଣୁ ଏଭଳି ସ୍ଥିତିରେ ଦିଲ୍ଲୀ ସରକାରରେ କାହିଁକି ରହିବେ । ସେଥିପାଇଁ ଇସ୍ତଫା ଦେଉଛନ୍ତି । ସମର୍ଥନ ପୂର୍ବରୁ ବିଜେପି ସହ ସମ୍ପର୍କ ଛିହ୍ନ କରିବାକୁ ସର୍ତ ରଖିଥିଲା ଏନସିପି । ବିଜେପି ସହ ସମ୍ପର୍କ ଛିହ୍ନ କରିବା ପରେ ଏନସିପି- କଂଗ୍ରେସ ଶିବସେନାକୁ ମହାରାଷ୍ଟ୍ର ସରକାର ଗଠନ ପାଇଁ ସମର୍ଥନ କରିବେ କି ନାହିଁ ବିଚାର କରାଯିବ ବୋଲି କହିଥିଲେ ବରିଷ୍ଠ ନେତା ।