ମହାରାଷ୍ଟ୍ର ପ୍ରଦେଶ କଂଗ୍ରେସ ଅଧ୍ୟକ୍ଷଙ୍କ ବଡ ବୟାନ । କହିଲେ, ମାର୍ଚ୍ଚ ୧୦ରେ ହେବ କ୍ୟାବିନେଟ୍ ଅଦଳବଦଳ ।

କନକ ବ୍ୟୁରୋ: ମହାରାଷ୍ଟ୍ର କଂଗ୍ରେସର ଅଧ୍ୟକ୍ଷ ନାନା ପଟେଲଙ୍କ ବଡ ବୟାନ । ମାର୍ଚ୍ଚ ୧୦ ତାରିଖରେ ମହାରାଷ୍ଟ୍ର ସରକାରରେ ହେବ ଅଦଳବଦଳ । ତେବେ ଏହି ଅଦଳବଦଳ କେବଳ କ୍ୟାବିନେଟ୍ ମନ୍ତ୍ରୀ ସ୍ତରରେ ହେବ ବୋଲି ସେ ସୂଚନା ଦେଇଛନ୍ତି । ତେବେ ନାନା ପଟେଲ ମହାରାଷ୍ଟ୍ରର ଭଣ୍ଡାରାରେ ଆୟୋଜିତ ଏକ ରାଲିରେ ଯୋଗ ଦେଇ ଏପରି ବୟାନ ରଖିଛନ୍ତି ।

ଏହାପୂର୍ବରୁ ମଙ୍ଗଳବାର ଶିବସେନାର ମୁଖପାତ୍ର ସଂଜୟ ରାୱତ ମହାରାଷ୍ଟ୍ର ସରକାରକୁ ନେଇ ବିଜେପି ଉପରେ ବଡ ଅଭିଯୋଗ ଆଣିଥିଲେ । ମହାରାଷ୍ଟ୍ରରେ ଶାସନ କରୁଥିବା ମହାବିକାଶ ଅଘାଡି ମେଣ୍ଟକୁ ଭାଙ୍ଗିବାକୁ ବିଜେପି ସେଠାରେ ପ୍ରୟାସ କରୁଥିବା ସେ ଅଭିଯୋଗ କରିଥିଲେ ।

ସଂଜୟ ରାୱତ ଗଣମାଧ୍ୟମକୁ କହିଥିଲେ ଯେ, ତାଙ୍କୁ କିଛି ବିଜେପି ନେତା ସମ୍ପର୍କ କରିଥିଲେ । ଯେଉଁଥିରେ ସେମାନେ ସଞ୍ଜୟଙ୍କୁ ଆତ୍ମସମର୍ପଣ କରିବାକୁ କହିଥିଲେ । ଯଦି ସେ ଏମିତି ନକରନ୍ତି ତେବେ ମହାରାଷ୍ଟ୍ରର ମହାବିକାଶ ଅଘାଡି ମେଣ୍ଟକୁ ଭାଙ୍ଗି ଦେବେ ବୋଲି ସେମାନେ ଧମକ ଦେଇଥିବା ସଂଜୟ ରାୱତ କହିଥିଲେ । ସେ ଆହୁରି ମଧ୍ୟ କହିଥିଲେ ଯେ, ଭାଜପାର ନେତାମାନେ ତାଙ୍କୁ ଦଳ ବଦଳାଇବାକୁ କହିଥିଲେ । ଏପରି ନକଲେ ତାଙ୍କୁ ଏହାର ପରିଣାମ ଭୋଗିବାକୁ ପଡିବ ବୋଲି ବି କହିଥିଲେ ।

ରାୱତ୍ କହିଥିଲେ, ରୀତିମତ ତାଙ୍କୁ ବିଜେପି ନେତାମାନେ ଫୋନ୍ କରୁଛନ୍ତି । ଯଦି ମହାରାଷ୍ଟ୍ରରେ ସରକାର ଭାଙ୍ଗିବାକୁ ସେ ସାହାଯ୍ୟ କରିବେନି , ତେବେ କେନ୍ଦ୍ରୀୟ ଏଜେନ୍ସି ତାଙ୍କୁ ଠିକ୍ କରିଦେବେ ବୋଲି ଧମକ ଦେଉଛନ୍ତି । ସୂଚନାଯୋଗ୍ୟ ଯେ, ମହାରାଷ୍ଟ୍ରରେ ଏବେ ଶିବସେନା, କଂଗ୍ରେସ ଓ ଏନସିପିର ମେଣ୍ଟ ସରକାର ଶାସନ କରୁଛି । ଏହାକୁ ମହାବିକାଶ ଅଘାଡି ମେଣ୍ଟ କୁହାଯାଉଛି । ତେବେ ବିଜେପି ଏଠାରେ ଶାସନ ଗାଦିକୁ ଫେରିବାକୁ ଲଗାତାର ଚେଷ୍ଟା ଚଳାଇଛି ।