ଶପଥ ଗ୍ରହଣର କେଇ ଘଣ୍ଟା ପରେ ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା ! ଶିବାଜୀ ଦୁର୍ଗର ପୁନଃଉଦ୍ଧାର ପାଇଁ ଖର୍ଚ୍ଚ ହେବ ୨୦ କୋଟି ଟଙ୍କା
ଶପଥ ଗ୍ରହଣ କରିବାର କେଇ ଘଣ୍ଟା ପରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ନିଜ କ୍ୟାବିନେଟର ପ୍ରଥମ ବୈଠକରେ ଗୁରୁବାର ରାତିରେ ଅଧ୍ୟକ୍ଷତା କରିଛନ୍ତି । ଏହି ବୈଠକରେ ଛତ୍ରପତି ଶିବାଜୀ ମହାରାଜଙ୍କୁ ନେଇ ଏକ ବଡ ଘୋଷଣା କରାଯାଇଛି । ବୈଠକରେ ହୋଇଥିବା ନିଷ୍ପତି ଅନୁସାରେ ଶିବାଜୀଙ୍କ ରାଜଧାନୀ ରାୟଗଡକୁ ପୁନଃଉଦ୍ଧାର କରାଯିବ । ମୁଖ୍ୟମନ୍ତ୍ରୀ କହିଛନ୍ତି ଯେ, ଏହି ପ୍ରକଳ୍ପରେ ୨୦ କୋଟି ଟଙ୍କା ଖର୍ଚ୍ଚ ହେବ । ସେ ରାଜ୍ୟର ମୁଖ୍ୟ ସଚିବଙ୍କୁ ଚାଷୀଙ୍କ ମଙ୍ଗଳ ପାଇଁ ଏଯାଏଁ ନିଆ ଯାଇଥିବା ପଦକ୍ଷେପ ବାବଦରେ ସୂଚନା ମାଗିଛନ୍ତି । ବୈଠକରେ ମୁଖ୍ୟମନ୍ତ୍ରୀଙ୍କ ସହିତ ଶପଥ ନେଇଥିବା ୬ ଜଣ ମନ୍ତ୍ରୀଙ୍କ ସମେତ ଏନସିପି ନେତା ଅଜିତ ପାୱାର ଓ ଆଦିତ୍ୟ ଠାକରେ ମଧ୍ୟ ଉପସ୍ଥିତ ଥିଲେ । ଏହି ସମୟରେ ସାମ୍ବାଦିକଙ୍କ ସେକ୍ୟୁଲାର ଶବ୍ଦକୁ ନେଇ ପଚାରାଯାଇଥିବା ପ୍ରଶ୍ନରେ ଉଦ୍ଧବ ବିରକ୍ତି ପ୍ରକାଶ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଠାକରେ କହିଛନ୍ତି, ଆମର ସୌଭାଗ୍ୟ ଯେ, କ୍ୟାବିନେଟ ପ୍ରଥମ ବୈଠକରେ ଛତ୍ରପତି ଶିବାଜୀ ମହାରାଜଙ୍କ ରାଜଧାନୀ ରାୟଗଡ ଦୁର୍ଗ ଉପରେ ନିଷ୍ପତି ନିଆଯାଇପାରିଛି । ଏହି ଦୁର୍ଗ ପାଇଁ ୨୦ କୋଟି ଖର୍ଚ୍ଚ ହେବ ଏବଂ ଏହି ପ୍ରସ୍ତାବ ପାସ୍ କରିଦିଆଯାଇଛି । ଠାକରେ ମଧ୍ୟ ପ୍ରଥମ ବୈଠକରେ ଚାଷୀଙ୍କ ବିଷୟରେ ଆଲୋଚନା କରିଛନ୍ତି । ଉଦ୍ଧବ କହିଛନ୍ତି ଯେ, ଅଦିନିଆ ବର୍ଷା ଯୋଗୁଁ ବନ୍ୟା କାରଣରୁ ରାଜ୍ୟରେ ଚାଷୀଙ୍କ ଅବସ୍ଥା ଭଲ ନାହିଁ । ଏହା ପାଇଁ ଛୋଟ ଘୋଷଣା ହେବ ନାହିଁ । ମୁଁ ଚାଷୀଙ୍କ ଭଲ ପାଇଁ ସୂଚନା ମାଗିଛି ଏହା ସହ ପ୍ରକୃତ ସ୍ଥିତି ବାବଦରେ ଜାଣିବାକୁ ଚାହୁଁଛି । ତାଙ୍କ ପାଇଁ କଣ କରାଯାଇପାରିବ ଦିନେ କି ଦୁଇ ଦିନ ମଧ୍ୟରେ ଘୋଷଣା ହେବ ।