ଆନନ୍ଦବଜାରରେ ଲାଗିବ ମହାପ୍ରସାଦ ଦର ତାଲିକା: କୁଡୁଆ ଅନୁଯାୟୀ ଧାର୍ଯ୍ୟ ହେବ ମୂଲ୍ୟ

250

କନକ ବ୍ୟୁରୋ: ଶ୍ରୀମନ୍ଦିରରେ ଅବଢ଼ା ଦର ବୃଦ୍ଧିକୁ ନେଇ ଖବର ପ୍ରସାରଣ ପରେ ଆନନ୍ଦ ବଜାରରେ ମହାପ୍ରସାଦର ଦର ତାଲିକା ଲଗାଇବାକୁ ଯୋଜନା କରିଛି ପ୍ରଶାସନ । ଶ୍ରୀମନ୍ଦିର ପ୍ରଶାସନ, ସୁଆର ମହାସୁଆର ନିଯୋଗ ସହ ଆଲୋଚନା କରି କାର୍ତିକ ମାସ ପରେ ଆନନ୍ଦବଜାରରେ ମହାପ୍ରସାଦ ଦର ତାଲିକା ଲଗାଇବାକୁ ନିଷ୍ପତି ନେଇଛି । ଏନେଇ ସୂଚନା ଦେଇ ପୁରୀ ଜିଲ୍ଳାପାଳ କହିଛନ୍ତି, ଖୁବଶୀଘ୍ର ମହାପ୍ରସାଦର ଦର ନିର୍ଦ୍ଧାରଣ କରାଯିବ । ରେଟ ଚାଟ୍ କିଭଳି ଯଥାଶୀଘ୍ର ଲାଗିବ ସେନେଇ ବ୍ୟାବସ୍ଥା କରାଯାଉଛି । ଆଗାମି ଦିନରେ ଶ୍ରଦ୍ଧାଳୁମାନେ କେମିତି ସୁଲଭ ଦରରେ ଅବଢ଼ା ପାଇବେ ସେଥିପାଇଁ ବନ୍ଦୋବସ୍ତ କରାଯାଉଛି ।

ତେବେ କେବଳ କାର୍ତିକ ମାସରେ ନୁହେଁ ବରଂ ବିଭିନ୍ନ ଯାନିଯାତ୍ରା ସମୟରେ ମହାପ୍ରସାଦର ଦର ଯଥେଷ୍ଟ ବୃଦ୍ଧି ପାଉଥିବା କଥାକୁ ସ୍ୱୀକାର କରିଛନ୍ତି ସୁଆର ମହାସୁଆର ନିଯୋଗ ସମ୍ପାଦକ । ତେବେ ଯିଏ ଚଢ଼ାଦରରେ ମହାପ୍ରସାଦ ବିକ୍ରି କରୁଛନ୍ତି, ସେମାନଙ୍କ ବିରୋଧରେ ସୁଆର ମହାସୁଆର ନିକଟରେ ଅଭିଯୋଗ କରିବାକୁ ସେ ଅପିଲ କରିଛନ୍ତି । ଅଭିଯୋଗ ଆସିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ।

ଧର୍ମମାସ କାର୍ତିକରେ ହବିଷ୍ୟାନ୍ନ ଖାଇବାକୁ ବହୁ ଲୋକ ଇଛା କରିଥାନ୍ତି । ତେଣୁ ଘରେ ଓ ବିଭିନ୍ନ ମନ୍ଦିରରେ ପ୍ରସ୍ତୁତ ହୋଇଥାଏ ହବିଷାନ୍ନ । ଏକାମ୍ରକ୍ଷେତ୍ରରେ ଥିବା ଅନନ୍ତବାସୁଦେବ ମନ୍ଦିରେ ବିଭିନ୍ନ ପ୍ରକାରର ବ୍ୟଂଜନ ପ୍ରସ୍ତୁତ ହୋଇଥାଏ । ଯାହା ଖାଇବାକୁ ରାଜଧାନୀବାସୀଙ୍କ ଭିତରେ ଆଗ୍ରହ ଦେଖିବାକୁ ମିଳିଥାଏ । ଦର ବି ଅପେକ୍ଷାକୃତ ଭାବେ କମ୍ ଥିବାରୁ ଶ୍ରଦ୍ଧାଳୁମାନେ ଖୁସିରେ ଖୁସିରେ ଅନନ୍ତବାସୁଦେବ ମନ୍ଦିରରେ ମିଳୁଥିବା ବିଭିନ୍ନ ପ୍ରକାରର ବ୍ୟଞ୍ଜନକୁ ଖାଇଥାନ୍ତି ।

କାର୍ତିକ ମାସରେ ଶ୍ରୀମନ୍ଦିରରେ ଚଢ଼ା ଦରରେ ଅବଢ଼ା ବିକ୍ରି ନେଇ ଅଭିଯୋଗ ଆସିଥିଲା । ଦର ବଢ଼ିବା ଯୋଗୁଁ ବହୁ ସଂଖ୍ୟାରେ ଶ୍ରଦ୍ଧାଳୁ ଅବଢ଼ା ନଖାଇ ବାଧ୍ୟ ହୋଇ ନିରାଶ ହୋଇ ଫେରି ଯାଇଥିବା ଖବର ସମସ୍ତଙ୍କୁ ଚକିତ କରିଥିଲା ।