କନକ ବ୍ୟୁରୋ : ମଧ୍ୟପ୍ରଦେଶ କଂଗ୍ରେସରୁ ଜ୍ୟୋତିରାଦିତ୍ୟ ସିନ୍ଧିଆଙ୍କ ବିଦାୟ ସହ ସଂକଟରେ ପଡିଯାଇଛନ୍ତି କମଲନାଥ ସରକାର । ସଂଖ୍ୟାଲଘୁରେ ପରିଣତ ହୋଇଥିବା ସରକାର ଭାଙ୍ଗି ଯାଇପାରେ । ସିନ୍ଧିଆଙ୍କ ବିଦାୟ ପରେ ଦଳ ଛାଡିଛନ୍ତି ୨୨ ଜଣ କଂଗ୍ରେସ ବିଧାୟକ । ଏମାନଙ୍କ ଭିତରେ କମଲନାଥ ସରକାରରେ ଥିବା ମନ୍ତ୍ରୀ ମଧ୍ୟ ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୦୧୮ ବିଧାନସଭା ନିର୍ବାଚନରେ ମଧ୍ୟପ୍ରଦେଶର ମୋଟ ୨୩୦ ଆସନରୁ ସର୍ବାଧିକ ୧୧୪ଟି ଆସନରେ ଜିତି ସରକାର ଗଢିଥିଲା କଂଗ୍ରେସ । ବିଜେପିକୁ ୧୦୯ଟି ଆସନ ମିଳିଥିବାବେଳେ ବିଏସପି ୨, ଏସପି ଗୋଟିଏ ଓ ସ୍ୱାଧୀନ ପ୍ରାର୍ଥୀ ୪ଟି ଆସନରେ ଜିତିଥିଲେ । ଏବେ ୨୨ ଜଣ କଂଗ୍ରେସ ବିଧାୟକଙ୍କ ଇସ୍ତଫା ପରେ ମୋଟ ସଦସ୍ୟ ସଂଖ୍ୟା ୨୦୮କୁ ଖସିଆସିଛି । ଫଳରେ ସରକାର ଗଠନ ପାଇଁ ମ୍ୟାଜିକ ନମ୍ବର ୧୦୫ । ୨୨ କଂଗ୍ରେସ ବିଧାୟକଙ୍କ ଇସ୍ତଫା ପରେ ଦଳର ସଦସ୍ୟ ସଂଖ୍ୟା ୯୨କୁ ଖସିଆସିଛି ।
ତେଣୁ ସରକାରରେ ରହିବା ପାଇଁ ଦଳକୁ ଆଉ ୧୩ ସଦସ୍ୟଙ୍କ ସମର୍ଥନ ଦରକାର । ତେବେ କମଲନାଥଙ୍କ ନେତୃତ୍ୱାଧୀନ କଂଗ୍ରେସ ସରକାରକୁ ବିଏସପିର ୨, ଏସପି ୧ ଓ ୪ ସ୍ୱାଧୀନ ସଦସ୍ୟଙ୍କ ସମର୍ଥନ ରହିଥିଲା । ଏମାନଙ୍କ ସମର୍ଥନ ପୂର୍ବପରି ରହିଲେ ମଧ୍ୟ ଆହୁରି ୬ ବିଧାୟକଙ୍କ ସମର୍ଥନ ଆବଶ୍ୟକ କରୁଛି କଂଗ୍ରେସ । ସେପଟେ କିନ୍ତୁ ସରକାର ଗଢିବା ପାଇଁ ବିଜେପି ନିକଟରେ ଆବଶ୍ୟକ ସଂଖ୍ୟା ରହିଛି । କାରଣ ଗତ ନିର୍ବାଚନରେ ଦଳ ୧୦୯ଟି ଆସନ ପାଇଛି । ପୁଣି ପରିବର୍ତ୍ତିତ ସମୀକରଣରେ ଏସପି, ବିଏସପି ଓ ସ୍ୱାଧୀନ ବିଧାୟକଙ୍କ ସମର୍ଥନ କଂଗ୍ରେସ ପ୍ରତି ରହିବ ନା ବିଜେପି ପଟକୁ ଯିବ ତାକୁ ନେଇ ମଧ୍ୟ ସନ୍ଦେହ ରହିଛି ।
ଅନୁମାନ କରାଯାଉଛି କମଲନାଥ ସରକାର ସଂଖ୍ୟାଲଘୁରେ ପରିଣତ ହୋଇଥିବାରୁ ରାଜ୍ୟପାଳଙ୍କ ନିକଟରେ ସରକାର ଗଠନ ପାଇଁ ଦାବି ଜଣାଇପାରେ ବିଜେପି । ଏହା ସମ୍ଭବ ହେଲେ ପୁଣି ଗୋଟିଏ ରାଜ୍ୟ କଂଗ୍ରେସ ହାତରୁ ଖସିଯିବ ।