ଦେଶର ସବୁଠୁ ଚର୍ଚ୍ଚିତ ମଧ୍ୟପ୍ରଦେଶ ହନିଟ୍ରାପ୍ । ଯୁବତୀଙ୍କ ଫାସରେ ପଡିଥିଲେ ନେତା ଆଉ ଅଫିସର । ଅଶ୍ଲୀଳ ଭିଡିଓ କରି ଲୁଟୁଥିଲେ ଟଙ୍କା ।
କନକ ବ୍ୟୁରୋ: ସେପ୍ଟେମ୍ବର ୨୦୧୯, ଇନ୍ଦୋର ମ୍ୟୁନିସିପାଲ କର୍ପୋରେସନର ଜଣେ ଇଂଜିନିୟର ପୋଲିସ ପାଖରେ ଗୋଟିଏ ଏଫଆଇଆର୍ ଦାୟର କରିଥିଲେ । ଆଉ ଜଣେ ଯୁବତୀ ତାଙ୍କ ଅଶ୍ଲୀଳ ଭିଡିଓ ଦେଖାଇ ତାଙ୍କୁ ୩ କୋଟି ଟଙ୍କା ମାଗୁଥିବା ଅଭିଯୋଗ କରିଥିଲେ । ଯେଉଁଠୁ ଆରମ୍ଭ ହୋଇଥିଲା ଏହି ବହୁଚର୍ଚ୍ଚିତ ହନିଟ୍ରାପର କାହାଣୀ ..
Kanak News is now on WhatsApp
Join and get latest news updates delivered to you via WhatsApp
ଜଣେ ସରକାରୀ ଇଂଜିନିୟରଙ୍କ ପାଖରୁ ଏଭଳି ଅଭିଯୋଗ ପାଇବା ପରେ ଛାନଭିନ୍ କରିବା ଆରମ୍ଭ କରିଦେଇଥିଲା ମଧ୍ୟପ୍ରଦେଶ ପୋଲିସ । ଏହି ଘଟଣାରେ ପୋଲିସ ଆରତୀ ଦୟାଲ ନାମକ ଜଣେ ଯୁବତୀକୁ ଗିରଫ ମଧ୍ୟ କରିଥିଲା । ହେଲେ ଏହି ହନିଟ୍ରାପ୍ ପଛର ଥିବା ଲମ୍ବା ଚେରକୁ ପୋଲିସ ଯେତେବେଳେ ଜାଣିବାକୁ ପାଇଲା ସେତେବେଳେ ସମସ୍ତେ ଆଶ୍ଚଯ୍ୟ ହୋଇଯାଇଥିଲେ । କାହିଁକି ନାଁ ମଧ୍ୟପ୍ରଦେଶର ପ୍ରାୟ ୧୨ ଜଣ ସିନିୟର ଅଫିସର ଓ ୮ ଜଣ ପୂର୍ବତନ ମନ୍ତ୍ରୀ ଏଭଳି ହନିଟ୍ରାପର ଶିକାର ହୋଇଥିଲେ । ଆଉ ତାଙ୍କର ଅଶ୍ଲୀଳ ଭିଡିଓ ତିଆରି କରି ଏହି ଗ୍ୟାଙ୍ଗ ତାଙ୍କଠୁ କୋଟି କୋଟି ଟଙ୍କା ଲୁଟ୍ କରିଥିଲା ।
ମଧ୍ୟପ୍ରଦେଶ ପୋଲିସ ଏହି ଘଟଣାର ମୂଳକୁ ଯିବାକୁ ସେତେବେଳେ ଏସଆଇଟି ଗଠନ କରିଥିଲା । ଆଉ ଏସଆଇଟି ଏହାର ତଦନ୍ତ କରିବା ସହିତ ଗ୍ୟାଙ୍ଗର ମୁଖ୍ୟ ଶ୍ୱେତା ବିଜୟ ଜୈନ ନାମକ ଜଣେ ଯୁବତୀକୁ ଗିରଫ କରିଥିଲା । ପରେ ପରେ ଏହି ଘଟଣାରେ ଆହୁରି ଅନେକ ଚେହେରା ସାମ୍ନାକୁ ଆସିଥିଲେ । ଯେଉଁ ମାନେ ନିଜର ରୂପକୁ ଦେଖାଇ ମନ୍ତ୍ରୀ, ନେତାମାନଙ୍କୁ କଳାକନା ବୁଲାଇବା ସହିତ ସେମାନଙ୍କଠୁ କୋଟି କୋଟି ଟଙ୍କା ହରଣଚାଲ କରୁଥିଲେ ।
ଏହି ଗ୍ୟାଙ୍ଗର ମୁଖ୍ୟ ଥିଲା ଶ୍ୱେତା ବିଜୟ ଜୈନ ନାମକ ଜଣେ ଯୁବତୀ । ଯିଏ ନେତା,ମନ୍ତ୍ରୀ ଆଉ ଅଫିସରମାନଙ୍କ ସହିତ ଭଲ ସଂପର୍କ ରଖିବା ସହିତ ସେମାନଙ୍କ ଦେହର ଭୋକ ମେଂଟାଇବା ପାଇଁ ଅନେକ ଯୁବତୀଙ୍କୁ ଭେଟିଦେଉଥିଲା । ହେଲେ ସମୟ ବଢିବା ସହିତ ସେ ଏହି ବଡ ଚେହେରା ମାନଙ୍କର ଅନ୍ତରଙ୍ଗ ମୁହୁର୍ତର ଭିଡିଓକୁ ସେ ସିକ୍ରେଟ୍ କ୍ୟାମେରାରେ କଏଦ କରିଦେଇଥିଲା । ଯାହାକୁ ନେଇ ସେ ସେମାନଙ୍କୁ ବ୍ଲାକମେଲ୍ କରିବା ସହିତ ସେମାନଙ୍କଠୁ ମନଇଚ୍ଛା ଟଙ୍କା ଆଦାୟ କରୁଥିଲା । ଦୀର୍ଘ ବର୍ଷ ଧରି ଏଭଳି କାରନାମାରେ କରିବା ପରେ ବି ପୋଲିସ ଏହି ଘଟଣାର ଟେର୍ ପାଇନଥିଲା ।
ସେହି ଚାଲରେ ଆରତୀ ଦୟାଲ ନାମକ ଯୁବତୀ, ମ୍ୟୁନିସିପାଲ ଇଂଜିନିୟର ହରଭଜନ ସିଂହଙ୍କୁ ଫସାଇବାକୁ ଚେଷ୍ଟା କରିଥିଲେ । ଆଉ ତାଙ୍କ ଅଶ୍ଲୀଳ ଭିଡିଓ ଦେଖାଇ ତାଙ୍କୁ ୩ କୋଟି ଟଙ୍କା ମାଗିଥିଲେ । ହେଲେ ହରଭଜନ ଏହି ହନିଟ୍ରାପକୁ ଜାଣିବା ସହିତ ପୋଲିସ ପାଖରେ ଏଫଆଇଆର ଦାୟର କରିଥିଲେ । ଯେଉଁଠୁ ଏହି ମଧ୍ୟପ୍ରଦେଶ ହନିଟ୍ରାପ ଘଟଣା ପଦାକୁ ଆସିବା ସହିତ ଅନେକ ୪୨୦ ଯୁବତୀ ଗିରଫ ହୋଇଥିଲେ । ସବୁଠୁ ଗୁରୁତ୍ୱପୂଣ୍ଣ କଥା ହେଉଛି, ଗୋଟିଏ ରାଜ୍ୟର ନେତା, ମନ୍ତ୍ରୀ ଓ ଅଫିସରମାନେ ଏଭଳି ହନିଟ୍ରାପର ଶିକାର ହୋଇ ଅନେକ ସରକାରୀ କାଗଜପତ୍ରରେ ସାଇନ୍ କରିଦେଇଥିଲେ । ଏଥିରେ ଅନେକ ସରକାରୀ ଟେଣ୍ଡର ସହ ବିଭିନ୍ନ ଗୁରୁତ୍ୱପୂଣ୍ଣ କାଗଜପତ୍ର ମଧ୍ୟ ରହିଥିଲା ।