ମୂର୍ତ୍ତି ଉଚ୍ଚତା ବିବାଦ : ଆଜି ଆସିପାରେ ହାଇକୋର୍ଟଙ୍କ ରାୟ
ନିଜ ନିଜ ଜିଦରେ ଅଟଳ ସରକାର ଓ କଟକ ପୂଜା କମିଟି; ପୂଜା ପାଖେଇ ଆସୁଥିବାରୁ କୋର୍ଟଙ୍କ ଆଭିମୁଖ୍ୟ ଉପରେ ରହିଛି ସମସ୍ତଙ୍କ ନଜର
କନକ ବ୍ୟୁରୋ : ଦୁର୍ଗା ପୂଜା ଯେତିକି ପାଖେଇ ଆସୁଥିବା ବେଳେ ମୂର୍ତ୍ତି ଉଚ୍ଚତା ଉପରୁ କଟକଣା ହଟାଇବା ଦାବି ତେଜିବାରେ ଲାଗିଛି । ଆଉ ଏହାରି ଭିତରେ ବିବାଦ ହାଇକୋର୍ଟ ପହଂଚିଥିବାରୁ କୋର୍ଟଙ୍କ ଆଭିମୁଖ୍ୟ ଉପରେ ସମସ୍ତଙ୍କ ନଜର ରହିଛି । ଗତକାଲି ହାଇକୋର୍ଟ ଶୁଣାଣି କରିଥିବା ବେଳେ ଆଜି ପରବର୍ତ୍ତୀ ଶୁଣାଣି ଥିବାରୁ ଚୂଡାନ୍ତ ରାୟ ଆସିପାରେ ବୋଲି ଆଶା କରାଯାଉଛି । ପୂଜା ପାଖେଇ ଆସୁଥିବାରୁ ମାମଲାର ଶୁଣାଣି କରି ରାୟ ଦେଇପାରନ୍ତି ହାଇକୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ମାମଲାର ଶୁଣାଣି କରି ଉଚ୍ଚତା କମିଲେ କ’ଣ ସମସ୍ୟା ଉପୁଜିବ ବୋଲି ଆବେଦନକାରୀଙ୍କୁ ପ୍ରଶ୍ନ କରିଛନ୍ତି ହାଇକୋର୍ଟ । ଆବେଦନକାରୀଙ୍କ ଓକିଲ କହିଛନ୍ତି, ସମସ୍ୟାର କଥା ନୁହେଁ, ଏହା ହେଉଛି ଭାବାବେଗର କଥା । ଏପଟେ ସରକାରୀ ଓକିଲ ଯୁକ୍ତି ବାଢ଼ିଛନ୍ତି ଯେ ଏହି ନିୟମ କେବଳ କଟକ ପାଇଁ ହୋଇନାହିଁ, ନିୟମ ହୋଇଛି ସାରା ଓଡ଼ିଶା ପାଇଁ । ମୂର୍ତ୍ତିର ଉଚ୍ଚତା ୪ ଫୁଟ ଭିତରେ ରଖିବାକୁ ସରକାର ନିର୍ଦ୍ଦେଶ ଦେଇଥିବା ବେଳେ କଟକର ପୂଜା କମିଟି ଓ ଅନ୍ୟ ସାମାଜିକ ସଂଗଠନଗୁଡିକ ଏହାକୁ ବିରୋଧ କରୁଛନ୍ତି । ନିରବ ପ୍ରତିବାଦ, ଅନଶନ ଆଦି କରି ମୂର୍ତ୍ତି ଉଚ୍ଚତା ଉପରେ ଲାଗିଥିବା କଟକଣା ହଟାଇବାକୁ ଦାବି କରୁଛନ୍ତି ।
ପାର୍ବଣରେ କୋଭିଡ ନିୟମ ପାଳନ ନକଲେ କେରଳରେ ଓନମ ପରେ ଯେଉଁ ସ୍ଥିତି ହେଲା, ସେହିପରି ଓଡ଼ିଶାର ସ୍ଥିତି ହେବା ଆଶଙ୍କା କରି ରାଜ୍ୟ ସରକାର କଟକଣା ଲଗାଇଛନ୍ତି । ସରକାରଙ୍କ ଯୁକ୍ତି ହେଉଛି, ମୂର୍ତ୍ତିର ଉଚ୍ଚତା ବଢ଼ିଲେ ସଂସ୍ଥାପନ ଠାରୁ ବିସର୍ଜନ ପର୍ଯ୍ୟନ୍ତ ଅଧିକ ଲୋକଙ୍କ ଆବଶ୍ୟକ ହେବ । ଲୋକ ମଧ୍ୟ ପୂଜା ପେଣ୍ଡାଲରେ ଭିଡ଼ କରିବେ । ସରକାର ଓ ପୂଜା କମିଟି ନିଜ ନିଜ ଜିଦରେ ଅଟଳ ରହିଥିବାରୁ ହାଇକୋର୍ଟଙ୍କ ରାୟ ଉପରେ ସମସ୍ତଙ୍କ ନଜର ରହିଛି ।