ରାଜପାକ୍ଷେଙ୍କ ଭବନରେ ବିଳାସପୂର୍ଣ୍ଣ କାର। ରାଷ୍ଟ୍ରପତି ଭବନରୁ ମିଳିଲା ୨ କୋଟି, ସେନାଙ୍କୁ ହସ୍ତାନ୍ତର କଲେ ପ୍ରଦର୍ଶନକାରୀ।
କନକ ବ୍ୟୁରୋ: ରାଷ୍ଟ୍ରପତି ଗୋଟବାୟା ରାଜପାକ୍ଷେଙ୍କ ଭବନରେ ବିଳାସପୂର୍ଣ୍ଣ କାର । ଗୋଟିଏ ପଟେ ଲୋକଙ୍କ ପାଖରେ ଖାଇବାକୁ ନାହିଁ, ଆଉ ଏପଟେ ରାଷ୍ଟ୍ରପତିଙ୍କ ବିଳାସପୂର୍ଣ୍ଣ ଲାଇଫଷ୍ଟାଇଲ । ପାର୍କିଂରେ ରଖାଯାଇଥିବା ପ୍ରାୟ ୫୦ଟି କାରର ଦାମ ୫୦ କୋଟି ଟଙ୍କା ହେବ । କେବଳ କାର ନୁହେଁ, ରାଷ୍ଟ୍ରପତି ଭବନରେ ରାଷ୍ଟ୍ରପତି ଗୋଟବାୟା ରାଜପାକ୍ଷେ କେଉଁଭଳି ବିଳାସପୂର୍ଣ୍ଣ ଜୀବନ ବିତାଉଥିଲେ, ତା’ର ବିଭିନ୍ନ ଚିତ୍ର ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ଶ୍ରୀଲଙ୍କାରେ ଭୟଙ୍କର ଆର୍ଥିକ ସଂକଟ ଜାରି ରହିଥିବାବେଳେ, ରାଷ୍ଟ୍ରପତି ଭବନରେ ପ୍ରଦର୍ଶନକାରୀଙ୍କ ହାତରେ ଲାଗିଛି ପାଖାପାଖି ନଗଦ ୨ କୋଟି ଟଙ୍କା । ଟଙ୍କା ପାଇବା ପରେ ପ୍ରଦର୍ଶନକାରୀ ଟଙ୍କାଗୁଡ଼ିକୁ ଗଣୁଥିବାର ଭିଡିଓ ଭାଇରାଲ ହୋଇଛି । ବଡ଼ କଥା ହେଉଛି, ଟଙ୍କା ହାତରେ ଲାଗିବା ପରେ ସଚ୍ଚୋଟତା ଦେଖାଇଛନ୍ତି ପ୍ରଦର୍ଶନକାରୀ । ରାଷ୍ଟ୍ରପତି ଭବନରୁ ମିଳିଥିବା ୨ କୋଟି ଟଙ୍କାକୁ ପ୍ରଦର୍ଶନକାରୀ ସେନା ନିକଟରେ ଜମାକରିଥିବା ଜଣାପଡ଼ିଛି ।
ସେହିପରି ଶ୍ରୀଲଙ୍କା ରାଷ୍ଟ୍ରପତି ଭବନରୁ ଆଉ ଏକ ଦୃଶ୍ୟ ସାମ୍ନାକୁ ଆସିଛି । ରାଷ୍ଟ୍ରପତି ଭବନରେ ଥିବା ଲାଇବ୍ରେରୀରୁ ବହିଗୁଡ଼ିକ ବୋହି ନେଇଛନ୍ତି ପ୍ରଦର୍ଶନକାରୀ । ଲାଇବ୍ରେରୀରୁ ବହି ନେବା ପାଇଁ ଲୋକଙ୍କ ଲମ୍ବା ଲାଇନ୍ ଲାଗିଛି । ରାଷ୍ଟ୍ରପତି ଗୋଟବାୟା ରାଜପାକ୍ଷେଙ୍କ ଚେୟାର ଉପରେ ବସିବା ପରେ ହଜାର ହଜାର ପୁରୁଷ, ମହିଳା ଓ ଶିଶୁମାନେ ରାଜଭବନ ଆଗରେ ଛିଡ଼ା ହୋଇଥିଲେ । ସେହିପରି ପିଲା ଓ ଅଭିଭାବକମାନେ ଏକ ବିଶାଳ ପିଆନୋ ବଜାଇବର ମଜା ଉଠାଇଛନ୍ତି ।
ରାଜପ୍ରାସାଦର ଆକର୍ଷଣୀୟ ‘ଗର୍ଡନ୍ ଗାର୍ଡେନ’ ପାର୍କରେ ବିକ୍ଷୋଭକାରୀ ବଣଭୋଜି ଭଳି ଦୃଶ୍ୟ ମଧ୍ୟ ଦେଖିବାକୁ ମିଳିଥିଲା । ହଜାର ହଜାର ସଂଖ୍ୟାରେ ପ୍ରଦର୍ଶନକାରୀ ରାଷ୍ଟ୍ରପତି ଯେଉଁ ମଜା ନିଅନ୍ତି, ତାଙ୍କ ଅନୁପସ୍ଥିତିରେ ଏଭଳି ମଜା ଉଠାଇଥିଲେ ।
ଏହାଛଡ଼ା ପ୍ରଦର୍ଶନକାରୀ ରାଷ୍ଟ୍ରପତି ଭବନ ପରିସରରେ ଥିବା ସୁଇମିଂପୁଲରେ ଗାଧୋଇଥିଲେ । ପରେ ସେମାନେ ରାଷ୍ଟ୍ରପତିଙ୍କ ବେଡ୍ରୁମ୍ ଓ କିଚେନ୍ରେ ମଧ୍ୟ ପଶିଥିଲେ । ରୋଷେଇ ଘରେ ଯାହା ଥିଲା, ଖାଇବାରେ ଲାଗିଥିଲେ । ବେଡ୍ରୁମ୍ରେ ଶୋଇ ସେମାନେ ସେଲଫି ନେଇଥିଲେ । ଏପରିକି ରାଷ୍ଟ୍ରପତିଙ୍କ ଜିମ୍ରେ ପଶି ୱାର୍କଆଉଟ୍ କରିଥିଲେ ବିକ୍ଷୋଭକାରୀ । ଜିମରେ ସେମାନେ ବିଭିନ୍ନ ଉପକରଣ ସହ ଜିମ୍ ଆଉଟ୍ କରିଥିଲେ ।
ଏକ ସମୟରେ ଅର୍ଥନୀତିରେ ଅପେକ୍ଷାକୃତ ମଜଭୁତ ଥିବା ଶ୍ରୀଲଙ୍କାର ଅର୍ଥନୀତି ଏତେ ତଳକୁ ଖସିଯିବ, ତାହା କେହି କଳ୍ପନା କରିନଥିବେ । ଆଉ ଏଭଳି ସଙ୍କଟ ସମୟରେ ନେତାମାନେ ଜନତାଙ୍କ କଥା ନଭାବି ନିଜର ବିଳାସପୂର୍ଣ୍ଣ ଜୀବନକୁ ଗୁରୁତ୍ୱ ଦେବା, ଅନେକ ପ୍ରଶ୍ନ ସୃଷ୍ଟି କରୁଛି ।