୧୯ ଘଂଟାର ସଫଳ ଅସ୍ତ୍ରୋପଚାର : ଅମ୍ରିତଙ୍କ ହେଲା ଫୁସଫୁସ୍ ପ୍ରତିରୋପଣ
ଚେନ୍ନାଇ ସ୍ଥିତ ଘରୋଇ ହସ୍ପିଟାଲରେ ହୋଇଛି ଅପରେସନ; ସ୍ୱାସ୍ଥ୍ୟ ଅବସ୍ଥାରେ ସୁଧାର ଆସୁନଥିବାରୁ ପତିରୋପଣ ପାଇଁ ଡାକ୍ତର ଦେଇଥିଲେ ନିର୍ଦ୍ଦେଶ
କନକ ବ୍ୟୁରୋ : ଏକମୋରେ ଚିକିତ୍ସିତ ହେଉଥିବା ଅମ୍ରିତ ପ୍ରଧାନଙ୍କ ହେଲା ଫୁସଫୁସ୍ ପ୍ରତିରୋପଣ । ୧୯ ଘଂଟାର ଅପରେସନ୍ ପରେ ସଫଳତାର ସହ ଫୁସଫୁସ୍ ପ୍ରତିରୋପଣ କରାଯାଇଛି । କୋଭିଡରେ ଫୁସଫୁସ୍ ଜନିତ ସମସ୍ୟାରେ ପୀଡ଼ିତ ହୋଇଛନ୍ତି ଅମ୍ରିତ । ୧୪୧ ଦିନ ଧରି ଏକମୋ ଚିକିତ୍ସା ଚାଲିଥିବା ବେଳେ ବି ସ୍ୱାସ୍ଥ୍ୟରେ ସେଭଳି କିଛି ସୁଧାର ଆସିନଥିଲା । ଫୁସଫୁସ୍ ପ୍ରତିରୋପଣର ଆବଶ୍ୟକତା ଥିବା ପରାମର୍ଶ ଦେଇଥିଲେ ଚିକିତ୍ସା କରୁଥିବା ଡାକ୍ତର ।
Kanak News is now on WhatsApp
Join and get latest news updates delivered to you via WhatsApp
ପରିବାର ଲୋକଙ୍କ ସୂଚନା ଅନୁସାରେ ସ୍ଥାନୀୟ ଅଂଚଳର ଜଣେ ଯୁବକ ଛାତରୁ ଖସି ଗୁରୁତର ଆହତ ହୋଇ ଡାକ୍ତରଖାନାରେ ଚକିିତ୍ସିତ ହେଉଥିଲେ । ଦୀର୍ଘ ସମୟ ଧରି ଭେଂଟିଲେଟରରେ ରହିବା ପରେ ଜୀବନ ହାରିଥିଲେ । ସେହି ଯୁବକଙ୍କ ଫୁସଫୁସ୍ ପ୍ରତିରୋପଣ କରାଯାଇଛି । ଅମ୍ରିତଙ୍କ ଚିକିତ୍ସା ପାଇଁ ଅଢେଇ କୋଟି ଟଙ୍କା ଖର୍ଚ୍ଚ ହେଲାଣି । ଅନଲାଇନ୍ ପେମେଂଟ ମାଧ୍ୟମରେ ଦେଢ କୋଟି ଟଙ୍କା ମିଳିଥିବା ବେଳେ ଆର୍ଥିକ ସହାୟତା ପାଇଁ ଅମ୍ରିତଙ୍କ ପରିବାର ଲୋକେ ନିବେଦନ କରିଛନ୍ତି ।
ତେବେ ସହାୟତା କରିବାକୁ ଚାହୁଥିବା ବ୍ୟକ୍ତିବିଶେଷ ଓ ଅନୁଷ୍ଠାନ ମନୀଷାଙ୍କ ବ୍ୟାଙ୍କ ଆକାଉଣ୍ଟ ନମ୍ବର – ୨୦୦୫୮୬୭୮୭୪୧, (ଆଇଏଫଏସସି କୋର୍ଡ-ଏସବିଆଇଏନ୍୦୦୦୫୪୫୭, ଶାଖା-ଖୋଡ଼ାସିଂ)ରେ ଟଙ୍କା ପଠାଇ ପାରିବେ ।
ସୂଚନାଯୋଗ୍ୟ, କରୋନାରେ ପୀଡ଼ିତ ହୋଇ ଅମ୍ରିତଙ୍କ ଫୁସଫୁସ୍ ସଂକ୍ରମିତ ହୋଇଥିଲା । ତାଙ୍କୁ ଏକମୋରେ ଚିକିତ୍ସା କରାଇବା ଜରୁରୀ ହୋଇପଡ଼ିବାରୁ ପରିବାରଲୋକ ଜୁନ୍ ୩ ତାରିଖ ଦିନ ଅମ୍ରିତଙ୍କୁ ଚେନ୍ନାଇସ୍ଥିତ ଆପୋଲୋ ହସ୍ପିଟାଲରେ ଭର୍ତ୍ତି କରାଇଥିଲେ । ଭୁବନେଶ୍ବର ଏମସରୁ ତାଙ୍କୁ ଏୟାରଲିଫ୍ଟ କରାଯାଇ ଚେନ୍ନାଇ ନିଆଯାଇଥିଲା । ସେଠାରେ ଦୀର୍ଘ ଦିନ ଧରି ତାଙ୍କର ଏକମୋ ଚିକିତ୍ସା ଚାଲିଥିଲା । ସ୍ବାସ୍ଥ୍ୟରେ ଉନ୍ନତି ପାଇଁ ଅମ୍ରିତଙ୍କର ଟ୍ରାକୋଷ୍ଟୋମି ଅସ୍ତ୍ରୋପଚାର କରାଯାଇଥିଲା ।
ଏହା ପରେ ସ୍ବାସ୍ଥ୍ୟବସ୍ଥାରେ ସାମାନ୍ୟ ଉନ୍ନତି ଆସିଥିଲା । ଫଳରେ ସେ ଠାର ମାଧ୍ୟମରେ କଥାବାର୍ତ୍ତା କରିପାରୁଥିଲେ । କିନ୍ତୁ ଫୁସଫୁସ୍ରେ କୌଣସି ପ୍ରକାର ଉନ୍ନତି ଦେଖା ନଦେବାରୁ ହସ୍ପିଟାଲ ପକ୍ଷରୁ ଫୁସଫୁସ୍ ପ୍ରତିରୋପଣ ପାଇଁ ନିଷ୍ପତ୍ତି ନିଆଯାଇଥିଲା । ଏଥିପାଇଁ ପରିବାର ଏବଂ ଅମ୍ରିତଙ୍କୁ ହସ୍ପିଟାଲ ପକ୍ଷରୁ କାଉନସେଲିଂ କରାଯାଇଥିଲା ।