କନକ ବ୍ୟୁରୋ : ଉତ୍ତର ପ୍ରଦେଶ ନିର୍ବାଚନ ପାଇଁ ତାରିଖ ଘୋଷଣା ହେବା ସହ ରାଜନୈତିକ ବୟାନବାଜି ଆରମ୍ଭ ହୋଇଛି । ଖାସକରି ଉତ୍ତରପ୍ରଦେଶ ନିର୍ବାଚନରେ ଏବେ ପ୍ରଭୁ ଶ୍ରୀକୃଷ୍ଣଙ୍କୁ ନେଇ ଚର୍ଚ୍ଚା ଜୋର ଧରିଛି । ପୂର୍ବରୁୁ ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବ କହିଥିଲେ ଯେ, ମୋ ସ୍ୱପ୍ନରେ ଭଗବାନ ଶ୍ରୀକୃଷ୍ଣ ଆସିଥିଲେ, କହିଥିଲେ ଉତ୍ତରପ୍ରଦେଶରେ ପୁଣିଥରେ ସମାଜବାଦୀ ପାର୍ଟି ସରକାର ଗଢିବ । ତେବେ ଅଖିଳେଶଙ୍କ ଏଭଳି ବୟାନକୁ କାଉଣ୍ଟର କରିବାକୁ ଯାଇ ବିଜେପି ନେତା ଶିବପ୍ରସାଦ ଯାଦବ କହିଛନ୍ତି, ମୋତେ ଭଗବାନ ଶ୍ରୀକୃଷ୍ଣ ସାକ୍ଷାତ ଦର୍ଶନ ଦେଇଛନ୍ତି । ଆଉ ପ୍ରଭୁ ଶ୍ରୀକୃଷ୍ଣ ନିର୍ଦ୍ଦେଶକ୍ରମେ ମୁଁ ଅଖିଳେଶ ଯାଦବଙ୍କ ବିରୋଧରେ ଯେକୌଣସି ଆସନରେ ନିର୍ବାଚନ ଲଢିବାକୁ ପ୍ରସ୍ତୁତ ଅଛି ।

Advertisment

ଭରଥନାର ପୂର୍ବତନ ବିଧାୟକ ଶିବପ୍ରସାଦ ଯାଦବ କହିଛନ୍ତି, ଯଦି ଦଳ ମୋତେ ଅନୁମତି ଦିଏ ତେବେ ଅଖିଳେଶଙ୍କ ବିରୋଧରେ ନିର୍ବାଚନ ଲଢିବାକୁ ପ୍ରସ୍ତୁତ ଅଛି । ଅଖିଳେଶ ଯାଦବ ଉତ୍ତରପ୍ରଦେଶର ଯେକୌଣସି ସ୍ଥାନ ଯେପରିକି କାନପୁର, ଆଗ୍ରା ଓ ଝାନସୀରୁ ଯେଉଁଠି ବି ଛିଡା ହେଲେ ତାଙ୍କ ବିରୋଧରେ ନିର୍ବାଚନ ଲଢିବାକୁ ପ୍ରସ୍ତୁତ । ଯେଉଁଭଳି ଅଖିଳେଶ ଯାଦବଙ୍କୁ ଶ୍ରୀକୃଷ୍ଣ ସ୍ୱପ୍ନରେ ଆସି କହିଥିଲେ ସମାଜବାଦୀ ପାର୍ଟିର ସରକାର ହେବ । ଠିକ୍ ସେହିଭଳି ପ୍ରଭୁ ଶ୍ରୀକୃଷ୍ଣ ମୋତେ ସାକ୍ଷାତ ଦେଇ କହିଛନ୍ତି, ତୁମେ ଚୁପ ବସ ନାହିଁ । ଉତ୍ତରପ୍ରଦେଶକୁ ଦଙ୍ଗା, ଗୁଣ୍ଡା, ଜମି ମାଫିଆ, ଅପହରଣକାରୀ, ଅପରାଧୀଙ୍କ କବଳରୁ ବଞ୍ଚାଇବାକୁ ହେବ । ସେଥିପାଇଁ ଅଖିଳେଶଙ୍କ ବିରୋଧରେ ନିର୍ବାଚନ ଲଢିବାକୁ ଘୋଷଣା କର ।

୨୦୦୯ରେ ବିଧାୟକ ଭାବେ ନିର୍ବାଚିତ ହୋଇଥିବା ଶିବପ୍ରସାଦ ଯାଦବ କହିଛନ୍ତି, ପ୍ରଭୁ ଶ୍ରୀରାମଙ୍କ ପ୍ରେରଣାରୁ ଯଦି ଆମର ଦଳ ମୋତେ ଅନୁମତି ଦିଏ ତେବେ ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବଙ୍କ ବିରୋଧରେ ନିର୍ବାଚନ ଲଢିବି । ଏହାସହ ଶିବପ୍ରସାଦ କହିଛନ୍ତି, ଅତ୍ୟାଚାରୀ ସରକାରଙ୍କ ଠାରୁ ରକ୍ଷା ପାଇବାକୁ ହେଲେ ବିଜେପିକୁ ପୁଣିଥରେ କ୍ଷମତାରେ ବସାଇବାକୁ ହେବ । ୨୦୦୭ରେ ଅଖିଳେଶଙ୍କ ବାପା ମୁଲାୟମ ସିଂଙ୍କୁ କଡା ଟକ୍କର ଦେଇଥିଲି । ଆଉ ଅଖିଳେଶ ଏମିତି କିଏ କି?