ଶ୍ରମିକଙ୍କ ପାସବୁକ୍ ଜରିଆରେ ସରକାରୀ ଟଙ୍କା ଲୁଟ୍ । ଶ୍ରମିକଙ୍କ ପାସବୁକରେ ଟଙ୍କା ଜମାକରି ଏଟିଏମ୍ ଜରିଆରେ ଉଠାଇ ନେଇଛନ୍ତି ଅଧିକାରୀ, ଜାଣି ନାହାନ୍ତି ଶ୍ରମିକ

78

କନକ ବ୍ୟୁରୋ: ଯାଜପୁର ବନବିଭାଗ ବିରୋଧରେ ମହାଦୁର୍ନୀତିର ଅଭିଯୋଗ । ବନବିଭାଗ ଅଧିକାରୀ ଶ୍ରମିକଙ୍କ ପାସବୁକରେ ଲକ୍ଷ ଲକ୍ଷ ଟଙ୍କା ଜମାକରି ଏଟିଏମ୍ ଜରିଆରେ ଉଠାଇ ନେଇଥିବା ଅଭିଯୋଗ ହୋଇଛି । କରୋନା ବେଳେ ଲୋକମାନେ ଭୋକ ଉପାସରେ ଦିନ କାଟୁଥିବା ବେଳେ ଶ୍ରମିକଙ୍କ ନାଁରେ ହୋଇଥିବା ଦୁର୍ନୀତି ସମ୍ପର୍କରେ କେହି କିଛି ଜାଣିନଥିଲେ । ଆଉ ଏବେ ଏହା ଜଣାପଡିବା ପରେ ଘଟଣାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ସେପଟେ ସମ୍ପୃକ୍ତ ବନବିଭାଗ ଅଧିକାରୀ ଏଥିରେ ଘଂଟ ଘୋଡାଇବାକୁ ଚେଷ୍ଟା ଚଳାଇଛନ୍ତି ।

ଶ୍ରମିକଙ୍କ ଆକାଉଂଟରେ ଟଙ୍କା ଜମା କରି ଏଟିଏମ ଜରିଆରେ ଉଠାଇ ନେଇଛନ୍ତି ବନ ଅଧିକାରୀ । ଆଉ ଏହି ଠକାମିର ଶିକାର ହୋଇଛନ୍ତି ଯାଜପୁର କୋରାଇ ବ୍ଲକ୍ ବନମାଳିପୁର ଗାଁର ବୃଦ୍ଧ ବ୍ୟକ୍ତି ଘନଶ୍ୟାମ ମଲିକ୍ । ମିଳିଥିବା ସୂଚନା ଅନୁସାରେ, ଘନଶ୍ୟାମଙ୍କ ବ୍ୟାଙ୍କ ପାସବୁକରେ ୩୩ହଜାର ଟଙ୍କା ଲେଖାଏଁ ୩ ଥରରେ ୯୯ହଜାର ଟଙ୍କା ଜମା ହୋଇଥିଲା । ପରେ ଏଟିଏମ୍ ଜରିଆରେ ଟଙ୍କା ଉଠାଇ ନେଇଛନ୍ତି ବନ ଅଧିକାରୀ । ଏକଥା ତାଙ୍କୁ ଜଣାନଥିବା ବେଳେ ବଡବିରୁହାଁ ଗାଁର ଲକ୍ଷ୍ମୀଧର ମଲିକ ମଧ୍ୟ ଏହି ଠକାମୀର ଶୀକାର ହୋଇଛନ୍ତି । ଲକ୍ଷ୍ମୀଧରଙ୍କ ଆକାଉଂଟରେ ୧ଲକ୍ଷ ୭୬ହଜାର ଟଙ୍କା ଜମା କରି ଏଟିଏମ୍ ଜରିଆରେ ଉଠାଇ ନିଆଯାଇଛି ।

ସବୁଠାରୁ ବଡ କଥା, ଶ୍ରମିକମାନେ ଏଭଳି ଘୋଟାଲା ସମ୍ପର୍କରେ କିଛି ଜାଣିନାହାନ୍ତି । ସରକାରୀ କାଗଜରେ ଉଲ୍ଲେଖ ରହିଛି ଶ୍ରମିକମାନେ ଡାଳିଯୋଡା ଫରେଷ୍ଟ ରେଞ୍ଜ ଅଧିନ ମହାବିନାୟକ ମନ୍ଦିର ନିକଟ ସ୍ଥାୟୀ ନର୍ସରୀରେ କାମ କରିବା ସହ ସାମଗ୍ରୀ ଯୋଗାଣ ଓ ପରିବହନ କାର୍ଯ୍ୟରେ ନିୟୋଜିତ ଥିଲେ । କିନ୍ତୁ ଶ୍ରମିକମାନେ ନା ନର୍ସରୀ ଦେଖିଛନ୍ତି, ନା ସେଠାରେ କାମ କରିଛନ୍ତି । ପ୍ରକୃତରେ ସେମାନେ ରାସ୍ତାକଡରେ ଗଛ ଲଗାଇବା କାମରେ ନିୟୋଜିତ ଥିବା ବେଳେ ବନ ଅଧିକାରୀ ଶ୍ରମିକଙ୍କ ନାଁରେ ପାସବୁକ୍ ଖୋଲି ଲକ୍ଷଲକ୍ଷ ଟଙ୍କାର କାରବାର କରିଥିବା ଅଭିଯୋଗ ହୋଇଛି ।

ସେପଟେ ଏସଂପର୍କରେ ପ୍ରତିକ୍ରିୟା ପାଇଁ ବନବିଭାଗ ଅଧିକାରୀଙ୍କ ସହ ଯୋଗାଯୋଗ କରିଥିଲେ ହେଁ ତାହା ସମ୍ଭବପର ହୋଇପାରିନାହିଁ । ତେବେ ବନବିଭାଗ ଦ୍ୱାରା ହୋଇଥିବା ଏହି ମହାଦୁର୍ନିତିର ତଦନ୍ତ କରି କାର୍ଯ୍ୟାନୁଷ୍ଠାନ ପାଇଁ ବିଭିନ୍ନ ମହଲରୁ ଦାବି ହୋଇଛି ।

Comments are closed.