ମାତିଲେ ଦୁର୍ବୃତ୍ତ । ଗୋଟିଏ ଦିନରେ ବାଙ୍କି ଓ ଖୋର୍ଦ୍ଧାରୁ ବଡ ଧରଣର ଡକାୟତି, ଲୁଟି ନେଲେ ୭ ଲକ୍ଷରୁ ଅଧିକ ଟଙ୍କା
କନକ ବ୍ୟୁରୋ : ଗୋଟିଏ ଦିନରେ ଦୁଇ ଦୁଇଟି ବଡ ଲୁଟ ଘଟଣା ପୋଲିସର ନିଦ ହଜେଇଦେଇଛି । ଗୋଟିଏ ବାଙ୍କିରେ ଏବଂ ଆଉ ଗୋଟିଏ ଖୋର୍ଦ୍ଧାରେ । ସୋମବାର ଅପରାହ୍ନରେ ବାଙ୍କି ଷ୍ଟେଟ ବ୍ୟାଙ୍କ ନିକଟରୁ ଜଣେ ଗ୍ୟାସ ଏଜେନ୍ସିର ମାଲିକଙ୍କ ଠାରୁ ୪ଲକ୍ଷ ୯୬ ହଜାର ଟଙ୍କା ଲୁଟିନେଲେ ଦୁବୃର୍ତ । ସେ ଟଙ୍କା ଜମା କରିବାକୁ ଆସୁଥିବା ସମୟରେ ୩ଜଣ ଦୁର୍ବୃତ୍ତ ଏକ ବାଇକରେ ଆସିଥିଲେ । ତାଙ୍କୁ ମାରଣାସ୍ତ୍ର ଦେଖାଇ ଟଙ୍କା ଲୁଟ କରିବା ପରେ ଫେରାର ହୋଇଯାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଲୁଟେରାଙ୍କୁ ଧରିବା ପାଇଁ ସ୍ଥାନୀୟ ଲୋକେ ଯେତେବେଳେ ପିଛା କରିଥିଲେ ସେତେବେଳେ ସେମାନେ ବାଙ୍କିଠାରୁ ୧୫ କିଲୋମିଟର ଦୁର ତ୍ରିଶୁଳିଆ ରାସ୍ତାର ଚକୁଳେଶ୍ୱର ଜଙ୍ଗଲରେ ବାଇକ ଫୋପାଡି ଫେରାର ହୋଇଯାଇଥିଲେ । ବାଙ୍କି ପୋଲିସ ସେଠାରେ ପହଂଚି ବାଇକକୁ ଜବତ କରି ତଦନ୍ତ ଚଳାଇଛି । ସେପଟେ ଖୋର୍ଦ୍ଧାରେ ଏବେ ମାତିଛନ୍ତି ପଲସର ଲୁଟେରା ।
ବ୍ୟାଙ୍କରୁ ଟଙ୍କା ଉଠାଇ ନେଉଥିବା ବେଳେ ଝାମ୍ପିନେଲେ ୨ଲକ୍ଷ ଟଙ୍କା । ଖୋର୍ଦ୍ଧା ଗୁରୁଜଙ୍ଗର କିଶୋର ଚନ୍ଦ୍ର ବରାଳ ଆଇସିଆଇସିଆଇ ବ୍ୟାଙ୍କରୁ ୨ଲକ୍ଷ ଟଙ୍କା ଉଠାଇ ତାଙ୍କ ଗାଡି ଡିକିରେ ରଖିବାକୁ ନେଉଥିବା ବେଳେ ପୂର୍ବରୁ ନଜର ରଖିଥିବା ୨ ଲୁଟେରା ତାଙ୍କ ଠାରୁ ଟଙ୍କା ଝାମ୍ପି ନେଇଥିଲେ । ଏନେଇ ଖୋର୍ଦ୍ଧା ଆଦର୍ଶ ଥାନାରେ ଅଭିଯୋଗ ପରେ ପୋଲିସ ଅନୁସନ୍ଧାନ ଜାରି ରଖିଛି ।