ପ୍ରଥମ ପର୍ଯ୍ୟାୟ ଲୋକସଭା ନିର୍ବାଚନରେ ଭାଗ୍ୟ ପରୀକ୍ଷା କରିବେ ୧୬୨୫ ପ୍ରାର୍ଥୀ । ୧୬% ପ୍ରାର୍ଥୀ ଦାଗୀ, ୨୮% ପ୍ରାର୍ଥୀ କୋଟିପତି ।
କନକ ବ୍ୟୁରୋ: ଆସନ୍ତା ଏପ୍ରିଲ ୧୯ ତାରିଖରେ ପଡିବାକୁ ଯାଉଛି ପ୍ରଥମ ପର୍ଯ୍ୟାୟ ଲୋକସଭା ଭୋଟ୍ । ପ୍ରଥମ ଚରଣରେ ୨୧ ରାଜ୍ୟର ୧୦୨ଟି ସିଟରେ ଭୋଟ୍ ପଡିବାକୁ ଥିବାବେଳେ, ଏଥିପାଇଁ ୧୬୨୫ ଜଣ ପ୍ରାର୍ଥୀ ରେସରେ ଅଛନ୍ତି । ତେବେ ଏହି ପ୍ରାର୍ଥୀମାନଙ୍କ ଭିତରୁ ୧୬% ପ୍ରାର୍ଥୀଙ୍କ ବିରୋଧରେ ଅପରାଧିକ ମାମଲା ରୁଜୁ ହେଇଥିବାବେଳେ, ସେମାନଙ୍କ ଭିତରୁ ୨୮ ପ୍ରତିଶତ ପ୍ରାର୍ଥୀ କୋଟିପତି ବୋଲି ଜଣାପଡିଛି । ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମ ବା ଏଡିଆର ରିପୋର୍ଟରୁ ଏହି ତଥ୍ୟ ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଏଡିଆର ୧୬୨୫ ପ୍ରାର୍ଥୀଙ୍କ ଭିତରୁ ୧୬୧୮ ଜଣ ପ୍ରାର୍ଥୀଙ୍କ ସତ୍ୟପାଠକୁ ବିଶ୍ଲେଷଣ କରି ଏକ ରିପୋର୍ଟ ଜାରି କରିଚି । ଏଥିରେ କୁହାଯାଇଛି ଯେ, ଭୋଟ୍ ପଡିବାକୁ ଥିବା ଏହି ୧୦୨ଟି ଆସନ ଭିତରୁ ୪୨ଟି ଆସନ ଏମିତି ଅଛି, ଯେଉଁଠି ତିନିରୁ ଅଧିକ ପ୍ରାର୍ଥୀ ଏମିତି ଛିଡା ହେଇଛନ୍ତି, ଯେଉଁମାନଙ୍କ ବିରୋଧରେ ଅପରାଧିକ ମାମଲା ରହିଛି ।
ଏଡିଆରର ସୂଚନା ମୁତାବକ ୧୬୧୮ ଜଣ ପ୍ରାର୍ଥୀଙ୍କ ଭିତରୁ ୨୫୨ ଜଣ ପ୍ରାର୍ଥୀଙ୍କ ବିରୋଧରେ ଅପରାଧିକ ମାମଲା ରହିଛି । ଏମିତି କି ସେମାନଙ୍କ ଭିତରୁ ୧୬୧ ଜଣ ପ୍ରାର୍ଥୀଙ୍କ ବିରୋଧରେ ସଙ୍ଗୀନ ଅପରାଧିକ ମାମଲା ରହିଛି । ଖାଲି ସେତିକି ନୁହେଁ, ୭ ଜଣ ପ୍ରାର୍ଥୀଙ୍କ ବିରୋଧରେ ହତ୍ୟା ଓ ୧୯ ଜଣ ପ୍ରାର୍ଥୀଙ୍କ ବିରୋଧରେ ହତ୍ୟା ପାଇଁ ଷଡଯନ୍ତ୍ର କରିବାର ମାମଲା ରୁଜୁ ହେଇଛି ।ଅନ୍ୟପଟେ ପାର୍ଟି ଦୃଷ୍ଟିରୁ ବିଶ୍ଲେଷଣ କଲେ, ଲାଲୁ ଯାଦବଙ୍କ ପାର୍ଟି ଆରଜେଡି ପ୍ରଥମ ପର୍ଯ୍ୟାୟ ନିର୍ବାଚନରେ ୪ ଜଣ ଦାଗୀ ନେତାଙ୍କୁ ଟିକେଟ୍ ଦେଇଛି । ସେହିପରି ଡିଏମକେ ୧୩, ସମାଜବାଦୀ ପାର୍ଟି ୩, ଟିଏମସି ୨, ବିଜେପି ୨୮ ଏବଂ କଂଗ୍ରେସ ୧୯ ଜଣ ଦାଗୀ ନେତାଙ୍କୁ ଟିକେଟ୍ ଦେଇଛି ।
ସେପଟେ ପ୍ରଥମ ପର୍ଯ୍ୟାୟରେ ନିର୍ବାଚନ ଲଢିବାକୁ ଥିବା ପ୍ରାର୍ଥୀଙ୍କ ଭିତରୁ ୪୫୦ ଜଣ ପ୍ରାର୍ଥୀ ହେଉଛନ୍ତି କୋଟିପତି । ସେମାନଙ୍କ ପାଖରେ ଏକ କୋଟି , କିମ୍ବା ତା ଠାରୁ ଅଧିକ ଟଙ୍କାର ସମ୍ପତ୍ତି ରହିଛି । ରାଜନୈତିକ ଦଳ ଦୃଷ୍ଟିରୁ ଡିଏମସକେ ୨୧ ଜଣ, ବିଜେପି ୬୯ ଜଣ, ଟିଏମସି ୪ ଜଣ ଏବଂ ବିଏସପି ୧୮ ଜଣ କୋଟିପତି ପ୍ରାର୍ଥୀଙ୍କୁ ଟିକେଟ୍ ଦେଇଛି । ମିଳିଥିବା ରିପୋର୍ଟ ମୁତାବକ, ମଧ୍ୟପ୍ରଦେଶ ଛିନ୍ଦୱାଡାରୁ ଲଢିବାକୁ ଥିବା କଂଗ୍ରେସ ପ୍ରାର୍ଥୀ ନକୁଳନାଥ ପ୍ରାର୍ଥୀମାନଙ୍କ ମଧ୍ୟରେ ସବୁଠୁ ଅଧିକ ଧନୀ । ତାଙ୍କ ପାଖରେ ୭୧୬ କୋଟି ଟଙ୍କାର ସମ୍ପତ୍ତି ଥିବା କୁହାଯାଇଛି ।