ଓଡିଶା ମୁହାଁ ହୋଇପାରନ୍ତି ପଙ୍ଗପାଳ! ମଧ୍ୟପ୍ରଦେଶ ସୀମା ଦେଇ ଛତିଶଗଡ ମୁଁଗେଲିରେ ପଶିଛନ୍ତି ପଙ୍ଗପାଳ: ପ୍ରଶାସନ ପକ୍ଷରୁ ଘଉଡେଇବା ପାଇଁ ଉଦ୍ୟମ
ସୀମାନ୍ତବର୍ତ୍ତୀ ଓଡିଶା ଗାଁରେ ଛାନିଆ
କନକ ବ୍ୟୁରୋ: ପୁଣି ଓଡିଶାକୁ ପଙ୍ଗପାଳ ଭୟ । ମଧ୍ୟପ୍ରଦେଶ ସୀମା ଦେଇ ପଙ୍ଗପାଳ ଦଳ ଛତିଶଗଡକୁ ମୁହାଁଇଛନ୍ତି । ମିଳିଥିବା ସୂଚନା ଅନୁସାରେ ପଙ୍ଗପାଳ ଦଳ ମଧ୍ୟପ୍ରଦେଶ ସୀମା ଦେଇ ଛତିଶଗଡ ମୁଁଗେଲିରେ ପଶିଛନ୍ତି । ଏମାନଙ୍କୁ ଘଉଡେଇବା ପାଇଁ ପ୍ରଶାସନ ପକ୍ଷରୁ ଉଦ୍ୟମ ଜାରି ରହିଛି । ଏପଟେ ଛତିଶଗଡ ସୀମାନ୍ତବର୍ତୀ ଓଡିଶା ଗାଁରେ ଲୋକଙ୍କ ମନରେ ପଙ୍ଗପାଳକୁ ନେଇ ଭୟ ସଂଚାର ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଗତ ଜୁନ୧ ତାରିଖ ମଧ୍ୟପ୍ରଦେଶରୁ ଛତିଶଗଡ କରେୟା ଜିଲ୍ଲା ଭରତପୁର ଅଚଂଳକୁ ଆସି କ୍ଷୟକ୍ଷତି ଘଟାଇ ଗୋଟିଏ ଦିନ ପରେ ପୁଣି ମଧ୍ୟପ୍ରଦେଶକୁ ଫେରି ଯାଇଥିଲେ ପଙ୍ଗପାଳ ଦଳ । ଏବେ ପୁଣି ଏହି କରେୟା ଜିଲ୍ଲାର ଭରତପୁର ବ୍ଲକ ଡଙ୍ଗୋରିଟୋଲି ଅଚଂଳରେ ରହି ବ୍ୟାପକ କ୍ଷୟକ୍ଷତି ଘଟାଇ ଚାଲିଛନ୍ତି । ପଙ୍ଗପାଳଙ୍କୁ ଘଉଡାଇବା ପାଇଁ କରୋୟ ଜିଲ୍ଲା ପ୍ରଶାସନ ଓ କୃଷି ବିଭାଗ ତରଫରୁ କୀଟନାଶକ ସିଚଂନ କରାଯାଉଛି ।
ତେବେ ପଙ୍ଗପାଳ ଗୋଟିଏ ରାତିରେ ପାଖାପାଖି ୨୦୦ କିଲୋମିଟର ବେଗରେ ଉଡିବାର କ୍ଷମତା ରଖିଥାନ୍ତି । ପଙ୍ଗପାଳ ଏବେ କରେୟା ଜିଲ୍ଲାର ଭରତପୁର ବ୍ଲକ ଡଙ୍ଗୋରିଟୋଲି ଅଚଂଳରେ ଅଛନ୍ତି । ଏହି କରେୟା ଜିଲ୍ଲା ଠାରୁ ସୁନ୍ଦରଗଡ ମାତ୍ର ୩୨୦ କିଲୋମିଟର ଦୂର । ଯଦି ଏହି ପଙ୍ଗପାଳ ମଧ୍ୟପ୍ରଦେଶ ମୁହାଁ ନହୋଇ ଓଡିଶା ମୁହାଁ ହୁଅନ୍ତି ତେବେ ଗୋଟିଏ ରାତିରେ ଏମାନେ ସୁନ୍ଦରଗଡ ଜିଲ୍ଲାକୁ ପଶି ଆସିବାର ସମ୍ଭାବନା ରହିଛି । ଯାହାକୁ ନେଇ ଏବେ ଓଡିଶା ଚାଷୀ ଚିନ୍ତାରେ ପଡିଛନ୍ତି ।