କନକ ବ୍ୟୁରୋ : ଗତ ଜୁନ ୨୧ରେ ପିସିସି ସଭାପତି ଶରତ ପଟ୍ଟନାୟକଙ୍କ ଉପରକୁ କାଳିମାଡ ପରେ କଂଗ୍ରେସ ଭବନରେ ଦେଖିବାକୁ ମିଳିଛି ଆଜି ଭିନ୍ନ ଚିତ୍ର । ଆଜି କଂଗ୍ରେସ ଭବନ ଗେଟରେ ତାଲା ପଡିଥିବା ଦେଖିବାକୁ ମିଳିଛି । ଭିତରକୁ କାହାରିକୁ ବି ଛାଡିଦିଆଯାଉନି । ଏପରିକି ଗଣମାଧ୍ୟମ ପ୍ରତିନିଧିଙ୍କୁ ବି ଭିତରକୁ ଛଡାଯାଉନି ।

Advertisment

ପିସିସି ସଭାପତି ଶରତ ପଟ୍ଟନାୟକଙ୍କୁ କାଳିମାଡ ଘଟଣାକୁ ନେଇ ଗତକାଲି କାର୍ଯ୍ୟାନୁଷ୍ଠାନ ହୋଇଥିଲା । ଶୃଙ୍ଖଳା ଭଙ୍ଗ ଅଭିଯୋଗରେ ୫ କଂଗ୍ରେସ କର୍ମକର୍ତାଙ୍କୁ ବହିଷ୍କାର କରିଛି ଦଳ । ୬ ବର୍ଷ ପାଇଁ ଦଳରୁ ବହିଷ୍କାର କରିଛନ୍ତି ପିସିସି ସଭାପତି । ସେପଟେ ବହିଷ୍କାର ପରେ ଧାରଣାରେ ବସିଥିଲେ ଓଡ଼ିଶା ପ୍ରଦେଶ ମହିଳା କଂଗ୍ରେସ କମିଟିର ସାଧାରଣ ସମ୍ପାଦକ ଶ୍ରୀୟାସ୍ମିତା ପଣ୍ଡା । ଦଳ ବିରୋଧୀ କାର୍ଯ୍ୟରେ ତାଙ୍କର କୌଣସି ସଂପୃକ୍ତି ନଥାଇ ବିନା କାରଣରେ ତାଙ୍କ ଉପରେ କାର୍ଯ୍ୟାନୁଷ୍ଠାନ ହୋଇଛି ବୋଲି ସେ ଅଭିଯୋଗ କରି ଧାରଣରେ ବସିଥିଲେ । ଆଉ ଆଜି ସକାଳୁ କଂଗ୍ରେସ ଭବନରେ ତାଲା ପଡିଥିବା ଦେଖିବାକୁ ମିଳିଛି ।

ସେପଟେ କଂଗ୍ରେସ ଭବନ ଗେଟରେ ତାଲା ପଡିଥିବାରୁ ଆଜି କଂଗ୍ରେସ ଭବନ ସାମ୍ନାରେ ଧାରଣାରେ ବସିବା ସହ ଶରତ ପଟ୍ଟନାୟକଙ୍କ ଉପରେ ବର୍ଷିଛନ୍ତି ଶ୍ରୀୟାସ୍ମିତା ପଣ୍ଡା । ସେ କହିଛନ୍ତି, ମତେ ଡରିକି ଶରତ ପଟ୍ଟନାୟକ ଗେଟରେ ତାଲା ପକାଇଦେଇଛନ୍ତି । କଂଗ୍ରେସ ଭବନରେ ତାଲା ପକାଇ ଶରତ ପଟ୍ଟନାୟକ ଓ ସନ୍ତୋଷ ସିଂ ସାଲୁଜା ନିଜକୁ ପ୍ରମାଣିତ କରିଛନ୍ତି ସେମାନଙ୍କ କେତେ ଭୁଲ ରହିଛି, ମନରେ କେତେ ଡର ରହିଛି ।