ଅମାନିଆଙ୍କୁ ସାବାଡ କରିବାକୁ ନିଆରା ବାଟ ଆପଣେଇଲା ପୋଲିସ । ନିୟମ ଭାଙ୍ଗୁଥିବା ଲୋକଙ୍କୁ ଲେଖାଇଲା ପ୍ରଭୁ ଶ୍ରୀରାମଙ୍କ ନାମ ।

283

କନକ ବ୍ୟୁରୋ : ଅମାନିଆଙ୍କୁ ଅଜବ ଶାସ୍ତି । ନିୟମ ଭାଙ୍ଗିଲେ ଲେଖିବାକୁ ହେବ ରାମ ନାମ । କରୋନା ସଂକ୍ରମଣ ଦିନକୁ ଦିନ ଅଧିକ ସକ୍ରିୟ ହେଉଥିବା ବେଳେ, ସଂକ୍ରମଣର ଚେନ୍ ଭାଙ୍ଗିବା ପାଇଁ ଲକଡାଉନ୍ ଏବଂ ସଟଡାଉନ୍ ଭଳି କଟକଣା ଜାରି କରିଛନ୍ତି ଦେଶର ବିଭିନ୍ନ ରାଜ୍ୟ । ବନ୍ଦ ରହୁଛି ଦୋକାନ ବଜାର, ଆଉ ଖାଁ ଖାଁ ରାସ୍ତାଘାଟ । କିନ୍ତୁ କିଛି ଏମିତି ଅମାନିଆ ଅଛନ୍ତି, ଯେଉଁମାନେ କରୋନା ନିୟମର ଖୋଲାଖୋଲି ଉଲ୍ଲଂଘନ କରିବା ସହ କିଛି କାମ ନଥିଲେ ବି ବାହାରେ ବୁଲାବୁଲି କରୁଛନ୍ତି । ଏମିତି ଅମାନିଆଙ୍କୁ ଏବେ ଅଜବ ଶାସ୍ତି ଦେଉଛି ମଧ୍ୟପ୍ରଦେଶର ସତନା ଜିଲ୍ଲା ପ୍ରଶାସନ ।

ରାମ ନାମ ଲେଖ, ଦଣ୍ଡରୁ ମୁକ୍ତି ପାଅ । ଅମାନିଆଙ୍କୁ ମିଳୁଛି ଅଜବ ଶାସ୍ତି, ରାମ ନାମ ଲେଖିବା ପରେ ଅମାନିଆଙ୍କୁ ଛାଡୁଛି ପୋଲିସ । ଗତବର୍ଷରୁ ଆରମ୍ଭ କରି ଏପର୍ଯ୍ୟନ୍ତ କରୋନାର ଭାଇସର ଚେନ୍ ଭାଙ୍ଗିବାକୁ ଆମେ ଅନେକ କଟକଣାର ସାମ୍ନା କରିଛେ । ଏବଂ ଯେଉଁମାନେ ଏହି ନିୟମକୁ ନମାନନ୍ତି, ସେମାନଙ୍କଠୁ ପୋଲିସ ଫାଇନ୍ ଆଦାୟ କରିଥାଏ କିମ୍ବା କିଛି ଦଣ୍ଡ ଦେଇଥାଏ । କିନ୍ତୁ ଅମାନିଆଙ୍କୁ ଏମିତି ଶାସ୍ତି ଆପଣ ଆଗରୁ କେଉଁଠି କେବେ ନା ଦେଖିଥିବେ ନା ଶୁଣିଥିବେ । ଯେଉଁ ଲୋକମାନେ କୋଭିଡ୍ ନିୟମର ଉଲ୍ଲଂଘନ କରୁଛନ୍ତି, ବିନା କୌଣସି କାମରେ ବାହାରେ ବୁଲାବୁଲି କରୁଛନ୍ତି, ସେମାନଙ୍କୁ ରାମ-ରାମ ଲେଖାକରାଉଛି ପୋଲିସ । ଯେପରିକି ନିୟମ ଭାଙ୍ଗୁଥିବା ଲୋକଙ୍କୁ ସଦବୁଦ୍ଧି ମିଳିବ । ଏବଂ ଲୋକେ ଅଜଥାରୁ ଘରୁ ବାହାରକୁ ବାହାରିବେ ନାହିଁ ।

ତେବେ ମଧ୍ୟପ୍ରଦେଶ ସତନା ଜିଲ୍ଲା ପ୍ରଶାସନର ଏପରି ଉଦ୍ୟମକୁ ସମସ୍ତେ ପ୍ରଂଶସା କରୁଛନ୍ତି । ଶାସ୍ତି ଦେବା ପାଇଁ ନିଜ ଟଙ୍କାରୁ ପୋଲିସ ଅଧିକାରୀ ନାମ ନାମ ଲିଖିତ ପୁସ୍ତକ କିଣୁଛନ୍ତି । ଏବଂ ନିୟମ ଭାଙ୍ଗୁଥିବା ଅମାନିଆଙ୍କୁ ଏହି ପୁସ୍ତିକାରେ ୪-୪ ପେଜ୍ ରାମନାମ ଲେଖିବା ପାଇଁ କହୁଛନ୍ତି ।

କରୋନା ସହ ଲଢେଇ ଭିତରେ ସମସ୍ତଙ୍କୁ ସତର୍କ ହେବାର ଆବଶ୍ୟକତା ରହିଛି । ବିଶେଷ କରି କରୋନାର ଦ୍ୱିତୀୟ ଲହର ସଂକ୍ରମଣ ଅଧିକ ଭୟଙ୍କର ହେଉଥିବାରୁ କୋଭିଡର ସମସ୍ତ ନିୟମ ମାନିବା ଜରୁରୀ । ଲକଡାଉନ୍ ଏବଂ ସଟଡାଉନ୍ ଭଳି କଟକଣା ଲୋକଙ୍କ ଭଲ ପାଇଁ ଜାରି କରାଯାଉଛି । ଯେପରି ଲୋକେ ଅଯଥା ଗହଳିରୁ ଦୂରେଇ ରହିବେ । ଘରେ ରହିବା ସହିତ ସୁରକ୍ଷିତ ରହିବେ । କିନ୍ତୁ କିଛି ଅମାନିଆ ସଂକ୍ରମଣକୁ ବେଖାତିର କରି କିଛି କାମ ନଥିଲେ ମଧ୍ୟ ବିଭିନ୍ନ ଆଳ ଦେଖାଇ ବାହାରେ ବୁଲାବୁଲି କରୁଛନ୍ତି । ଯେଉଁଥିପାଇଁ ସେମାନେ ନିଜେ ସଂକ୍ରମିତ ହେବା ସହ ଅନ୍ୟମାନଙ୍କ ପାଇଁ ବିପଦର କାରଣ ବି ସାଜିପାରନ୍ତି । ତେଣୁ ସତର୍କ ହୁଅନ୍ତୁ, ସୁରକ୍ଷିତ ରୁହନ୍ତୁ ।