ଦିଲ୍ଲୀରେ ପୁଣି ଫେରିପାରେ ତାଲାବନ୍ଦ! ଚିନ୍ତା ବଢ଼ାଇଲା କରୋନାର ୩ୟ ପର୍ଯ୍ୟାୟ ସଂକ୍ରମଣ । ସଂକ୍ରମଣ ବଢୁଥିବା ଅଂଚଳରେ କଟକଣା ପାଇଁ କେନ୍ଦ୍ରକୁ ପ୍ରସ୍ତାବ ଦେଲେ କେଜ୍ରିୱାଲ
କହିଲେ, କନଟେନ୍ମେଂଟ୍ ଜୋନରେ ଘରକୁ ଘର ହେବ ସର୍ଭେ
କନକ ବ୍ୟୁରୋ: କରୋନା ଧିରେ ଧିରେ ଚାଲିଯାଉଛି ବୋଲି ଅନେକ ଚିନ୍ତା କରୁଥିବା ବେଳେ ଦେଶର ରାଜଧାନୀ ଦିଲ୍ଲୀରେ ଭିନ୍ନ ପରିସ୍ଥିତି ଦେଖିବାକୁ ମିଳିଛି । ଦିଲ୍ଲୀକୁ ପୁଣି ଫେରିପାରେ ଲକଡାଉନ । କରୋନା ସଂକ୍ରମଣର ଜଟିଳ ସ୍ଥିତିକୁ ଆଖିରେ ରଖି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏହି ପ୍ରସ୍ତାବ ଦେଇଛନ୍ତି । ଦିଲ୍ଲୀରେ କରୋନାର ତୃତୀୟ ଲହଡି ଚାଲିଥିବା କୁହାଯାଉଛି । କଂଟେନମେଂଟ ଜୋନରେ ଘର ଘର ବୁଲି ସର୍ଭେ କରିବା ପାଇଁ ଆଠ ହଜାର ଦଳ ନିଯୁକ୍ତ କରାଯାଇଛି । ଏଥିସହ ଆଗାମୀ ୩ରୁ ୪ ଦିନ ଭିତରେ ଆଇସିୟୁ ବେଡ ସଂଖ୍ୟା ୩ହଜାର ୫ଶହରୁ ୬ ହଜାରକୁ ବୃଦ୍ଧି କରାଯିବ ବୋଲି କେନ୍ଦ୍ର ସ୍ୱାସ୍ଥ୍ୟମନ୍ତ୍ରାଳୟ କହିଛି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ହର୍ଷବର୍ଦ୍ଧନ କହିଛନ୍ତି, ଆଗାମୀ ସପ୍ତାହରେ, ନିର୍ବାଚ. ଦୁର୍ଗାପୂଜା ଓ ଦୀପାବଳିର ପ୍ରଭାବ ଦେଖିବାକୁ ମିଳିବ ।
Kanak News is now on WhatsApp
Join and get latest news updates delivered to you via WhatsApp
ଗତ ଦୁଇ ସପ୍ତାହ ଧରି ରାଜଧାନୀ ଦିଲ୍ଲୀରେ ପ୍ରତିଦିନ ୬ରୁ ୭ହଜାର ନୂଆ ସଂକ୍ରମଣ ରିପୋର୍ଟ ହେଉଥିବା ବେଳେ ଗତ ୨୪ଘଂଟାରେ ଏହି ସଂଖ୍ୟା ଟିକିଏ କମିଛି । କିନ୍ତୁ କରୋନା ସଂକ୍ରମଣର ତୃତୀୟ ଲହଡି କାୟାବିସ୍ତାର କରିବାକୁ ଲାଗିିଛି । ସଂକ୍ରମଣକୁ ଆୟତ କରିବା ପାଇଁ କିଛି ବଡ ପଦକ୍ଷେପ ନେବାକୁ ବିଚାର କରୁଛନ୍ତି କେଜ୍ରିୱାଲ ସରକାର । ଅଧିକ ସଂକ୍ରମଣ ବ୍ୟାପୁଥିବା ସ୍ଥାନ ଗୁଡିକରେ ପୁଣି ଥରେ ଲକଡାଉନ କରିବାକୁ କେନ୍ଦ୍ର ସରକାରଙ୍କୁ ପ୍ରସ୍ତାବ ଦେଇଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ।
ପାର୍ବଣ ଋତୁ ଯୋଗୁଁ ଦିଲ୍ଲୀର ବିଭିନ୍ନ ବଜାରରେ କୋଭିଡ ନିୟମକୁ ବେଖାତିର କରାଯାଉଥିବାର ଚିତ୍ର ଦେଖିବାକୁ ମିଳିଥିଲା । ଫଳରେ ସଂକ୍ରମଣ ବଢି ଏହି ସ୍ଥାନ ଗୁଡିକ ହଟସ୍ପଟରେ ପରିଣତ ହେବ ତେଣୁ ଆବଶ୍ୟକ ପଡିଲେ ଏପରି ସ୍ଥାନ ଗୁଡିକରେ ଲକଡାଉନ କରିବାକୁ କେନ୍ଦ୍ରକୁ ଅନୁମତି ମାଗିଛନ୍ତି ଅରବିନ୍ଦ କେଜ୍ରିୱାଲ । ବିବାହ ଉତ୍ସବରେ ୨ଶହ ଲୋକଙ୍କ ସାମିଲ ହେବା ପାଇଁ ଅନୁମତି ଥିବା ବେଳେ ଦିଲ୍ଲୀରେ ବଢୁଥିବା ସଂକ୍ରମଣକୁ ନଜରରେ ରଖି ଏହି ସଂଖ୍ୟା ହ୍ରାସ କରିବାକୁ ନିଷ୍ପତି ନେଇଛନ୍ତି କେଜ୍ରିୱାଲ । ୨ଶହ ଲୋକଙ୍କ ବଦଳରେ ୫୦ଜଣଙ୍କୁ ବିବାହ ଉତ୍ସବରେ ସାମିଲ ହେବା ପାଇଁ ନୂଆ ନିୟମ ଲାଗୁ କରିବାକୁ ଉପରାଜ୍ୟପାଳଙ୍କ ଅନୁମତି ଲୋଡିଛନ୍ତି ଦିଲ୍ଲୀ ସରକାର ।
ନଭେମ୍ବର ମାସ ଶେଷ ହୋଇନାହିଁ, କିନ୍ତୁ ଅଧା ମାସରେ କରୋନା ରେକର୍ଡ ଚିନ୍ତାଜନକ ରହିଛି । ଗତ ୧୬ ଦିନରେ ଦିଲ୍ଲୀରେ କରୋନା ମୃତ୍ୟୁ ସଂଖ୍ୟା ୧୨୦୨ରେ ପହଂଚିଛି । ରାଜଧାନୀ ଦିଲ୍ଲୀରେ ମୋଟ ୪ଲକ୍ଷ ୮୯ହଜାର କରୋନା ସଂକ୍ରମିତ ହୋଇଥିବା ବେଳେ ମୋଟ ମୃତ୍ୟୁ ସଂଖ୍ୟା ୭ହଜାର ୭୧୩କୁ ବୃଦ୍ଧି ପାଇଛି । ଗତ ୨୪ଘଂଟାରେ ୩ହଜାର ୭୯୭ନୂଆ ସଂକ୍ରମିତ ହୋଇଥିବା ବେଳେ ୯୯ଜଣଙ୍କର ମୃତ୍ୟୁ ହୋଇଛି ।