ଦେଶରେ ଆଉ ୨ ସପ୍ତାହ ବଢିପାରେ ଲକଡାଉନ ଅବଧି । ଭିଡିଓ କନଫରେନ୍ସିଂରେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା ପରେ ମୋଦି ଦେଲେ ସଂକେତ । କହିଲେ, ଜୀବନ ଥିଲେ ବିଶ୍ୱ ଅଛି, ତାଲାବନ୍ଦ ବଢାଇବା ଛଡା ଆଉ କିଛି ବିକଳ୍ପ ନାହିଁ

664

କନକ ବ୍ୟୁରୋ: ଦେଶରେ ଆଉ ୨ ସପ୍ତାହ ବଢିପାରେ ଲକଡାଉନ ଅବଧି । ଅବଧି ବୃଦ୍ଧି ନେଇ ଆଜି ରାତିରେ ଦେଶବାସୀଙ୍କୁ ସମ୍ବୋଧନ କରିପାରନ୍ତି ପ୍ରଧାନମନ୍ତ୍ରୀ । ଭିଡିଓ କନଫରେନସିଂ ମାଧ୍ୟମରେ ୧୧ ମୁଖ୍ୟମନ୍ତ୍ରୀଙ୍କ ସହ ଆଲୋଚନା ପରେ ମୋଦି ଏନେଇ ସଂକେତ ଦେଇଛନ୍ତି । କହିଛନ୍ତି, ଜୀବନ ଅଛି ତ ବିଶ୍ୱ ଅଛି । ଦେଶର ସମସ୍ତ ନାଗରିକ ସାମାଜିକ ଦାୟିତ୍ୱକୁ ବୁଝି ଲକଡାଉନ ନିୟମ ପାଳନ କରିଛନ୍ତି । ତେଣୁ ଜୀବନ ବଞ୍ଚାଇବାକୁ, ବିଶ୍ୱକୁ ବଞ୍ଚାଇବାକୁ ତାଲା ବନ୍ଦ ବଢାଇବା ଛଡା ଆଉ କିଛି ବିକଳ୍ପ ନାହିଁ ।

ସେପଟେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ ଟୁଇଟ କରି କହିଛନ୍ତି ମୋଦି ସଠିକ ନିଷ୍ପତ୍ତି ନେଇଛନ୍ତି । ଲକଡାଉନ ଜଲଦି କରିିଥିବାରୁ ଅନ୍ୟ ଦେଶଠାରୁ ଭାରତ ଭଲ ସ୍ଥିତିରେ ଅଛି । ଆଜି ରାତିରେ ଦେଶବାସୀଙ୍କୁ ମୋଦି ସମ୍ବୋଧନ କରିପାରିନ୍ତି ବୋଲି ଜାତୀୟ ଗଣମାଧ୍ୟମରେ ମଧ୍ୟ ଚର୍ଚ୍ଚା ହେଉଛି । ଦେଶରେ ତାଲାବନ୍ଦ ବୃଦ୍ଧି ପାଇଁ ପ୍ରଧାନମନ୍ତ୍ରୀ ମୋଦିଙ୍କ ଅନ୍ୟ ରାଜ୍ୟର ମୁଖ୍ୟମନ୍ତ୍ରୀଙ୍କ ମତାମତ ଲୋଡିଥିଲେ । ୧୧ ମୁଖ୍ୟମନ୍ତ୍ରୀଙ୍କ ମଧ୍ୟରୁ ୧୦ ମୁଖ୍ୟମନ୍ତ୍ରୀ ଏପ୍ରିଲ ୩୦ ଯାଏ ତାଲାବନ୍ଦ ଅବଧି ବଢାଇବାକୁ ଦାବି କରିଛନ୍ତି ।

ଏହି ବୈଠକରେ ପ୍ରଧାନମନ୍ତ୍ରୀ ମୋଦି ଘରେ ତିଆରି ହୋଇଥିବା ମାସ୍କ ପିନ୍ଧି ବସିଥିବା ଦେଖିବାକୁ ମିଳିଥିଲା । ଦିଲ୍ଲୀ ସରକାର ଆସନ୍ତା ୩୦ ପର୍ଯ୍ୟନ୍ତ ତାଲାବନ୍ଦ ବଢାଇବାକୁ ପ୍ରସ୍ତାବ ଦେଇଛନ୍ତି । ଏପଟେ କେନ୍ଦ୍ରର ନିଷ୍ପତ୍ତି ପୂର୍ବରୁ ଓଡିଶା ସରକାର ତାଲାବନ୍ଦର ଅବଧି ଏପ୍ରିଲ ୩୦ ଯାଏଁ ବଢାଇ ଦେଇଛନ୍ତି । ସେହିପରି ତାଲାବନ୍ଦ ଅବଧି ବଢାଇବା ନେଇ ରାଜ୍ୟ କ୍ୟାବିନେଟର ସୁପାରିସ କେନ୍ଦ୍ର ସରକାରଙ୍କ ନିକଟକୁ ପଠାଯାଇଛି । ଏହି ଘୋଷଣାର ୨୪ ଘଂଟା ନପୁରୁଣୁ ପଂଜାବ ସରକାର ମଧ୍ୟ ମେ ୧ ତାରିଖ ଯାଏଁ ତାଙ୍କ ରାଜ୍ୟରେ ତାଲାବନ୍ଦ ଅବଧି ବଢାଇଛନ୍ତି । କର୍ଣ୍ଣାଟକ ସରକାର ବି ଏହି ଅବଧି ବଢାଇବା ନେଇ ଆଲୋଚନା ଜାରି ରଖିଛନ୍ତି । ପୂର୍ବରୁ ତେଲେଙ୍ଗାନା ମଧ୍ୟ ଏହି ଅବଧି ବଢାଇବାକୁ କେନ୍ଦ୍ରକୁ ଅନୁରୋଧ କରି ସାରିଛି ।

Comments are closed.