ମହାମାରୀରେ ମହାନଦୀ ଆଣିଲା ଖୁସି ଖବର: ମହାନଦୀ ପାଇଁ ଆଶୀର୍ବାଦ ବନିଲା ଲକଡାଉନ । ୫୦ପ୍ରତିଶତ ପ୍ରଦୂଷଣ ମୁକ୍ତ ହେଲା ଓଡ଼ିଶାର ଜୀବନ ରେଖା ମହାନଦୀ । ଜିଲ୍ଲା ପ୍ରଦୂଷଣ ଅଧିକାରୀ କହିଲେ, ନଦୀରେ ବେଶି ମାତ୍ରାରେ ନାହିଁ ସହରର ପ୍ରଦୂଷିତ ପାଣି ।
କନକ ବ୍ୟୁରୋ: ପ୍ରକୃତିର ଏଭଳି ଅପରୂପ ସୌନ୍ଦର୍ଯ୍ୟ ଆପଣ ପୂର୍ବରୁ କେବେ ଦେଖିଥିଲେ? ନିର୍ମଳ ଆକାଶରେ ଉଡିଯାଉଥିବା ପକ୍ଷୀଙ୍କ ଏହି କାକଳୀ ଆପଣଙ୍କ କାନକୁ କେବେ ଶୁଭିଥିଲା? ନଦୀନ ନିର୍ମଳ ଜଳ ଆପଣ କେବେ ପିଇଥିଲେ, ହୁଏତ ଆପଣଙ୍କର ମନେ ନଥିବ । କୁହାଯାଏ ସବୁ ସମସ୍ୟାର ଦୁଇଟି ଦିଗ ରହିଛି । ଗୋଟିଏ ବିନାଶକାରୀ, ତ ଆଉ ଗୋଟିଏ ସୃଜନାତ୍ମକ । ବିଶ୍ୱ ମହାମାରୀ କରୋନା ଆଜି ସୁଯୋଗ ସୃଷ୍ଟି କରିଛି ଯେ, ଲୋକେ ପ୍ରକୃତିର ସେହି ରୂପକୁ ଦେଖିପାରୁଛନ୍ତି ଯାହା ବିଶୟରେ କେବଳ ଶୁଣିବାକୁ ମିଳୁଥିଲା ।
Kanak News is now on WhatsApp
Join and get latest news updates delivered to you via WhatsApp
କରୋନା ମୁକାବିଲା ପାଇଁ ପ୍ରାୟ ଅଢେଇ ମାସର ଲକଡାଉନ ଫଳରେ ଲୋକଙ୍କ ଗମନା ଗମନ ଉପରେ କଟକଣା ଲାଗିଛି । ରାଜ୍ୟବ୍ୟାପୀ କଳ କାରଖାନା ବନ୍ଦ ରହିଛି । ଯାହାର ପରିଣାମ ସ୍ୱରୂପ ନଦୀ ଏବେ ନିଶ୍ୱାସ ନେଉଛି । ଲକଡାଉନ ଯୋଗୁଁ ଜୀବନ୍ତ ହେଉଛି ମହାନଦୀ । ସମ୍ବଲପୁରରେ ଆକାଶ ଯେତିକି ନିର୍ମଳ ଦେଖାଯାଉଛି, ମହାନଦୀର ପାଣି ବି ସେତିକି ପରିଷ୍କାର । ଓଡିଶାର ଜୀବନରେଖା କୁହାଯାଉଥିବା ମହାନଦୀର ପାଣି ସ୍ପଟିକ ଦିଶୁଛି, କାରଣ ପ୍ରଦୂଷଣର ମାତ୍ରା ୫୦ ପ୍ରତିଶତ କମିଯାଇଛି । ସ୍ୱଚ୍ଛ ପାଣିରେ ଏହିଭଳି ପିଲାଙ୍କ ଜଳକ୍ରୀଡା ଆପଣଙ୍କୁ ପ୍ରକୃତି କୋଳକୁ ଫେରିଯିବା ପାଇଁ ହାତଠାରି ଡାରିବ ନିଶ୍ଚୟ । କଳକଳ ଶବ୍ଦ କରି ବହିଯାଉଥିବା ପାଣି ଆପଣଙ୍କୁ ବୁଡଟିଏ ମାରିବାକୁ ବାଧ୍ୟ କରିବ । ଯାହା ପୂର୍ବରୁ ଆପଣ କେବେ କଳ୍ପନା ବି କରିପାରୁ ନଥିଲେ ।
ମହାନଦୀର ଏହି ସ୍ୱଚ୍ଛ ଚେହେରା ଦେଖିବା ପରେ ଅଢେଇ, ତିନିମାସ ତଳର ମହାନଦୀ କଥା ମନେ ପଡୁଛି । ପାଣିରେ ଆପଣଙ୍କ ଛବି କିମ୍ବା ପାଣି ଭିତରେ ମାଟି ଦେଖିଯିବା କଥା କେହି କଳ୍ପନା ବି କରୁନଥିଲେ । ମହାନଦୀର ଗୋଳିଆ ପାଣିରେ ବିଷାକ୍ତ ହୋଇ ଉଠୁଥିଲା ମଣିଷର ମନ । ସବୁ ଅଳିଆ ଆବର୍ଜନା ଏହି ମହାନଦୀ ପାଣିରେ ଭାସୁଥିଲା । ସତେଯେମିତି ସହରକୁ ସ୍ୱଚ୍ଛ କରିବା ପାଇଁ ନିଜକୁ ଆବର୍ଜନାମୟ କରିପକାଇଥିଲା ମହାନଦୀ । ଗୋଳିଆ ମାଟିମିଶା ପାଣି ପିଇବା କଥା ଛାଡନ୍ତୁ, ଗୋଡ ବୁଡାଇଲା ବେଳେ ଦେଶ ଶୀତେଇ ଉଠୁଥିଲା । ମନ ମଇଳା ହୋଇଯାଉଥିଲା । ହେଲେ ଦିନ କେଇଟାରେ ମହାନଦୀର କଳେବର ଏଭଳି ପରିବର୍ତନ ହେବ କେହି କେବେ କଳ୍ପନା ବି କରିନଥିଲା ।
ଲକଡାଉନ ଫଳରେ ମହାନଦୀ ଅବବାହିକାରେ ଥିବା ସହରାଂଚଳ ସମେତ ସମ୍ବଲପୁର ମ୍ୟୁନିସିପାଲିଟିରୁ ଆବର୍ଜନା ପାଣି ମଧ୍ୟ ସେତେ ମାତ୍ରାରେ ନଦୀ ଭିତରକୁ ଆସିନାହିଁ । ଜିଲ୍ଲା ପ୍ରଦୂଷଣ ବିଭାଗର କରିବା ହେଲା ଲକଡାଉନ ଫଳରେ ବାୟୋଲୋଜିକାଲ ଅକ୍ସିଜେନ ଡିମାଣ୍ଡ କମିଛି ଓ ଡିଜଲ୍ଭ ଅକ୍ସିଜେନ୍ ଡିମାଣ୍ଡ ବଢିଛି । ଫଳରେ ମହାନଦୀର ପାଣି ପ୍ରାୟ ୫୦ ପ୍ରତିଶତ ପ୍ରଦୂଷଣମୁକ୍ତ ହୋଇଛି ।
ଦେଶରେ ୬୮ ଦିନର ଲକଡାଉନ ପରେ ଏବେ ପ୍ରଥମ ପର୍ଯ୍ୟାୟ ଅନଲକ ପ୍ରକ୍ରିୟା ଆରମ୍ଭ ହୋଇଛି । ତଥାପି ଅନେକ କାର୍ଯ୍ୟାକଳାପ ଉପରେ କଟକଣା ରହିଛି । ଯାହା ଲୋକଙ୍କ ସମସ୍ୟାକୁ ବଢାଇ ଦେଇଛି । ଲୋକେ ଘରେ ବନ୍ଦ ହୋଇ ରହୁଛନ୍ତି । ଗରିବ, ଶ୍ରମଜୀବୀ ଓ ତଳସ୍ତରର ଲୋକ ସବୁଠାରୁ ଅଧିକ ହଇରାଣ ହେଉଛନ୍ତି । ସାମଗ୍ରୀ ମିଳିବାରେ ସମସ୍ୟା ହେଉଛି । ଲୋକଙ୍କ ମାନସିକ ସନ୍ତୁଳନ ବିଗିଡି ଯାଉଛି । ଘରୋଇ ହିଂସା ବଢୁଛି । ହେଲେ ତାଲାବନ୍ଦର ଏହି ପ୍ରଭାବ ପ୍ରକୃତି ପାଇଁ ବରଦାନ ସାବ୍ୟସ୍ତ ହୋଇଛି ।