କନକ ବ୍ୟୁରୋ : ରାଜ୍ୟରେ ବଢୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ଆସନ୍ତା କାଲି ଠାରୁ ମେ ୩୦ ତାରିଖ ପର୍ଯ୍ୟନ୍ତ ରାଜ୍ୟରେ ଲକଡାଉନ ଘୋଷଣା କରିଛନ୍ତି ପଶ୍ଚିମବଙ୍ଗ ସରକାର । ଏନେଇ ରାଜ୍ୟର ମୁଖ୍ୟ ଶାସନ ସଚିବ ଅଲପନ୍ ବନ୍ଦୋପାଧ୍ୟାୟ ଏକ ଆଦେଶ ଜାରି କରିଛନ୍ତି । ଆଦେଶ ମୁତାବକ ମେ ୧୬ ତାରିଖରୁ ମେ ୩୦ ତାରିଖ ପର୍ଯ୍ୟନ୍ତ ରାଜ୍ୟରେ ଲକଡାଉନ ଜାରି ରହିବ । ଏହି ସମୟରେ କେବଳ ଅତ୍ୟାବଶକୀୟ ସେବା ଚାଲୁ ରହିବ । ଲକଡାଉନ ସମୟରେ ଘରୋଇ କାର୍ଯ୍ୟାଳୟ, ଶିକ୍ଷାନୁଷ୍ଟାନ ବନ୍ଦ ରହିବ । ଅନ୍ୟପଟେ ପରିବା ଓ ଫଳ ବଜାର ସକାଳ ୭ ରୁ ୧୦ ଟା ପର୍ଯ୍ୟନ୍ତ ଖୋଲା ରହିବ ବୋଲି କୁହାଯାଇଛି ।

Advertisment

ଏହି ଲକଡାଉନ ସମୟରେ ଘରୋଇ କାର୍ଯ୍ୟାଳୟ (ଜରୁରୀ ସେବା ବ୍ୟତୀତ) ବନ୍ଦ ରହିବା ସହ ଶିକ୍ଷାନୁଷ୍ଠାନ ବନ୍ଦ ରହିବ । ରାଜନୈତିକ, ସାଂସ୍କୃତିକ ଓ ଧାର୍ମିକ ଗତିବିଧି ଉପରେ ରୋକ୍ । ଜରୁରୀ ସେବା ବ୍ୟତୀତ ବାକି ସବୁ ଶିଳ୍ପ, ଫ୍ୟାକ୍ଟ୍ରି ବନ୍ଦ ରହିବ । ଜରୁରୀ ସେବାରେ ନିୟୋଜିତ ଯାନ ବାହନକୁ ଛାଡି ଅନ୍ୟ ସମସ୍ତ ଯାନ ବାହନ ଚଳାଚଳା ବନ୍ଦ । ଲୋକଲ ଟ୍ରେନ. ମେଟ୍ରୋ ସେବା, ବସ୍ ସେବା ଓ ରେଳ ସେବା ବନ୍ଦ ରହିବ ବୋଲି ନିର୍ଦ୍ଦେଶରେ କୁହାଯାଇଛି । ଫଳ, ପନିପରିବା, ଦୁଗ୍ଧ ଦୋକାନ ସକାଳ ୭ ରୁ ଦିନ ୧୦ ଟା ଯାଏଁ ଖୋଲା ରହିବ । ମିଠା ଦୋକାନ ସନ୍ଧ୍ୟା ୫ ଟା ପର୍ଯ୍ୟନ୍ତ ଖୋଲା ରହିବ । ବ୍ୟାଙ୍କଗୁଡିକ ସକାଳ ୧୦ ରୁ ଦିନ ୨ ଟା ପର୍ଯ୍ୟନ୍ତ ଖୋଲା ରହିବ । ବାହାଘରରେ ୫୦ ଓ ଅନ୍ତିମ ସଂସ୍କାର ବେଳେ ୨୦ ଜଣ ଲୋକଙ୍କୁ ଅନୁମତି ମିଳିବ ।

କହିରଖୁ କି ପଶ୍ଚିମବଙ୍ଗରେ ଦ୍ରୁତ ଗତିରେ ସଂକ୍ରମଣ ବୃଦ୍ଧି ପାଇବାରେ ଲାଗିଛି । ରାଜ୍ୟ ସରକାରଙ୍କ ସୂଚନା ମୁତାବକ ଶୁକ୍ରବାର ଦିନ ରାଜ୍ୟରେ ୨୦,୮୪୬ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ଏହାକୁ ମିଶାଇ ରାଜ୍ୟରେ ସଂକ୍ରମଣ ହାର ୩୦ ପ୍ରତିଶତ ଛୁଇଁଛି । ଏହାସହ ଏବେ ରାଜ୍ୟରେ ୧,୩୧,୭୯୨ ଆକ୍ଟିଭ୍ କେସ ରହିଛି ।