ଆଜିଠାରୁ ଲକଡାଉନ ୪ ଆରମ୍ଭ । ମେ ୩୧ ପର୍ଯ୍ୟନ୍ତ ରହିବ ବଳବତର, ଖୋଲିବ ସେଲୁନ୍, ସ୍ପା, ପାନ ଦୋକାନ । କଂଟେନମେଂଟ ଜୋନରେ ସବୁ ବନ୍ଦ୍ ।
କନକ ବ୍ୟୁରୋ : ଆଜିଠାରୁ ଆରମ୍ଭ ହେଉଛି ଲକଡାଉନ ୪ ବା ତାଲାବନ୍ଦର ଚତୁର୍ଥ ପର୍ଯ୍ୟାୟ । ଏହା ମେ’ ୩୧ ପର୍ଯ୍ୟନ୍ତ ସାରା ଦେଶରେ ଜାରି ରହିବ । ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ୯୦ ହଜାର ପାର କରିଥିବାବେଳେ ଏହାକୁ ଆଖି ଆଗରେ ରଖି ଗାଇଡଲାଇନ ଜାରି କରିଛନ୍ତି କେନ୍ଦ୍ର ସରକାର । ଏହି ପର୍ଯ୍ୟାୟରେ କରୋନା ମୁକାବିଲା ସହ ଅର୍ଥନୀତିକୁ ପୁଣି ଥରେ ଗତିଶୀଳ କରିବା ପାଇଁ ଅନେକ କିଛି କୋହଳ କରିଛନ୍ତି କେନ୍ଦ୍ର ସରକାର । ଆଉ କିଛି କ୍ଷେତ୍ରରେ ପୂର୍ବ ଭଳି କଟକଣା ଜାରି ରଖିବାକୁ ନିର୍ଦ୍ଦେଶାବଳୀରେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ପର୍ଯ୍ୟାୟରେ କେଉଁ ଅଂଚଳ କେଉଁ ଜୋନରେ ରହିବ ସେନେଇ ରାଜ୍ୟ ସରକାରମାନଙ୍କୁ ନିଷ୍ପତି ନେବାକୁ କ୍ଷମତା ଦିଆଯାଇଛି । ନିର୍ଦ୍ଦେଶାଳବଳୀ ଅନୁଯାୟୀ କୌଣସି ବି ଜୋନରେ ବେସାମରିକ ବିମାନ ଚଳାଚଳ, ମେଟ୍ରୋ ଟ୍ରେନ୍ ଚଳାଚଳ କରିିବ ନାହିଁ । ଶିକ୍ଷାନୁଷ୍ଠାନ, ହୋଟେଲ, ରେଷ୍ଟୁରାଂଟ, ମଲ୍, ସିନେମା ହଲ୍ ଓ ଜିମ୍ ଖୋଲିପାରିବେ ନାହିଁ । ଧାର୍ମିକ ସ୍ଥଳ ବା ଅନ୍ୟ କୌଣସି ସ୍ଥାନରେ ଭିଡ ଜମି ପାରିବ ନାହିଁ । ତେବେ ଗ୍ରୀନ, ଅରେଞ୍ଜ ଓ ରେଡ୍ ଜୋନ୍ରେ ସ୍ୱତନ୍ତ୍ର ଶ୍ରମିକ ଟ୍ରେନ୍ ଚାଲିପାରିବ । ସେହିପରି ଏହି ତିନିଟି ଜୋନରେ ଆନ୍ତରାଜ୍ୟ ଯାତାୟତକୁ ଅନୁମତି ଦିଆଯାଇଛି । ଏବଂ ଜିଲ୍ଲା ଭିତରେ ଓ ଆନ୍ତଃ ଜିଲ୍ଲା ବସ୍ ଚାଲିବା ପାଇଁ ଅନୁମତି ଦିଆଯାଇଛି । ସେଲୁନ୍, ସ୍ପା, ମଦଦୋକାନ, ପାନ ଓ ସିଗାରେଟ ଦୋକାନ ଖୋଲିପାରିବ । ମେଡିକାଲ କ୍ଲିନିକ, ଓପିଡି ଖୋଲିବାକୁ ଅନୁମତି ଦିଆଯାଇଛି ।
କୃଷି ସମ୍ପର୍କିତ ସମସ୍ତ କାର୍ଯ୍ୟ ଚାଲିପାରିବ । ସହରାଂଚଳର ସମସ୍ତ କଳକାରଖାନା ଖୋଲିବାକୁ ଅନୁମତି ଦିଆଯାଇଛି । ବ୍ୟାଙ୍କ, ପୋଷ୍ଟ ଅଫିସ ଓ କୋରିୟର ସେବା ଜାରି ରହିବ । ଷ୍ଟାଡିୟମ, ସ୍ପୋର୍ଟସ କମ୍ପଲେକ୍ସ ଖୋଲିବାକୁ ଅନୁମତି ଦିଆଯାଇଛି । ତିନିଟି ଯାକ ଜୋନରେ ଅଟୋ ଓ ଟ୍ୟାକ୍ସି ଚଳାଚଳ କରିପାରିବ । କିନ୍ତୁ ଜଣେ ଡ୍ରାଇଭର ଓ ଜଣେ ଯାତ୍ରୀଙ୍କୁ ନେଇ ଚଳାଚଳ କରିପାରିବ । ସେହିପରି ଚାରି ଚକିଆ ଗାଡି ଜଣେ ଡ୍ରାଇଭର ଓ ଦୁଇ ଜଣ ଯାତ୍ରୀଙ୍କୁ ନେଇ ଯାତ୍ରା କରିପାରିବ । ଗ୍ରୀନ ଓ ଅରେଞ୍ଜ ଜୋନରେ ବାଇକରେ ୨ ଜଣ ଯାଇପାରିବେ ଓ ରେଡ୍ ଜୋନରେ ଜଣେ ଯାଇପାରିବେ । କିନ୍ତୁ କଂଟେନମେଂଟ ଜୋନରେ ପୂର୍ବଭଳି ସମସ୍ତ କଟକଣା ବଳବତର ରହିବ । ଏଥିସହ ସନ୍ଧ୍ୟା ୭ଟାରୁ ସକାଳ ୭ଟା ପର୍ଯ୍ୟନ୍ତ ସମସ୍ତ ଜୋନରେ ଘରୁ ବାହାରିବାକୁ ମନା କରାଯାଇଛି । ଏବଂ ୬୫ ବର୍ଷରୁ ଅଧିକ ବୟସର ବ୍ୟକ୍ତି ,୧୦ ବର୍ଷରୁ କମ୍ ବୟସର ପିଲା ଓ ଗର୍ଭବତୀ ମହିଳା ସମ୍ପୂଣ୍ଣ ଭାବେ ଘରେ ରହିବାକୁ କୁହାଯାଇଛି । କିନ୍ତୁ ଓଡିଶାରେ କେଉଁ କଟକଣା ଲାଗୁ ହେବ ସେ ନେଇ ରାଜ୍ୟ ସରକାର ସ୍ୱତନ୍ତ୍ର ନିର୍ଦ୍ଦେଶାବଳୀ ଜାରି କରିବା ପରେ ସ୍ପଷ୍ଟ ହେବ ।