ବାଲେଶ୍ୱର ଉପନିର୍ବାଚନ ପୂର୍ବରୁ ବିଜେଡିରେ ଲବି ରାଜନୀତି । ଜୀବନ ପ୍ରଦୀପ ଦାସ ଓ ରବୀନ୍ଦ୍ର ଜେନା ଗୋଷ୍ଠୀ ମଧ୍ୟରେ ଛକାପଞ୍ଝା । ଏପଟେ ମାନସ ଦତ୍ତଙ୍କୁ ମୈଦାନକୁ ଓହ୍ଲାଇ ସହାନୁଭୂତିର ଭୋଟ ହାତେଇପାରେ ବିଜେପି
କନକ ବ୍ୟୁରୋ : ବାଲେଶ୍ୱର ସଦର ଆସନ ପାଇଁ ଉପନିର୍ବାଚନ ତାରିଖ ଘୋଷଣା ହେବା ପୂର୍ବରୁ ବିଜେଡିରେ ଆରମ୍ଭ ହୋଇଗଲାଣି ଲବି ରାଜନୀତି । ଜୀବନ ପ୍ରଦୀପ ଦାସ ଓ ରବିନ୍ଦ୍ର ଜେନାଙ୍କ ଗୋଷ୍ଠୀ ଭିତରେ ଉପନିର୍ବାଚନରେ ପ୍ରାର୍ଥୀ ହେବା ଲାଗି ଲବି ଜୋରଦାର ହୋଇଥିବା ଜଣାପଡିଛି । ଏପରିକି ଦୁଇ ଗୋଷ୍ଠୀ ଭିତରେ ଲାଗିରହିଛି ଛକାପଞ୍ଝା । ମନ୍ତ୍ରୀ ତଥା ଜିଲ୍ଲା ପର୍ଯ୍ୟବେକ୍ଷକ ପ୍ରତାପ ଜେନା ପହଞ୍ଚିବା ପୂର୍ବରୁ ଦୁଇ ଗୋଷ୍ଠୀ ମଧ୍ୟରେ କଥା କଟାକଟି ହୋଇଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ସାଧାରଣ ନିର୍ବାଚନରେ ବିଜୟୀ ବିଜେପି ପ୍ରାର୍ଥୀ ମଦନ ମୋହନ ଦତ୍ତଙ୍କ ଦେହାନ୍ତ ପରେ ଏହି ଆସନ ଲାଗି ଉପନିର୍ବାଚନ ହେବାକୁ ଯାଉଛି । ଆଗାମୀ ନଭେମ୍ବରରେ ଉପନିର୍ବାଚନ ହେବା ନେଇ ସଂକେତ ମିଳିବା ପରେ ବିଜେଡିର ଦୁଇ ଗୋଷ୍ଠୀ ସର୍ବୋଚ୍ଚ କ୍ଷମତା କେନ୍ଦ୍ରରେ ନିଜ ନିଜ ପ୍ରକ୍ରିୟାରେ ଲବି ଆରମ୍ଭ କରିଦେଇଛନ୍ତି । ଗୋଟିଏ ପଟେ ଏହି ଆସନରୁ ତିନିତିନିଥର ବିଜୟୀ ହୋଇଥିବା ପୂର୍ବତନ ବିଧାୟକ ଜୀବନ ପ୍ରଦୀପ ଦାସ ଓ ଅନ୍ୟପଟେ ୨୦୧୯ ଲୋକସଭା ପ୍ରାର୍ଥୀ ରବିନ୍ଦ୍ର ଜେନା ।
ତେବେ ଗତଥର ବିଜେପି ଏହି ଆସନ ଛଡାଇ ନେଇଥିବାରୁ ପୁଣିଥରେ କବଜା କରିବାକୁ ସମସ୍ତ କଳକୌଶଳ ଲଗାଇ ଦେଇଛି ବିଜୁ ଜନତା ଦଳ । ଫାଟକୁ ପ୍ୟାଚଅପ କରିବା ପାଇଁ ଜିଲ୍ଲା ଦାୟିତ୍ୱରେ ଥିବା ପ୍ରଭାରୀ ତଥା ମନ୍ତ୍ରୀ ପ୍ରତାପ ଜେନା ଉଭୟ ଗୋଷ୍ଠୀଙ୍କୁ ନେଇ ବୈଠକ କରିଛନ୍ତି । ତେବେ ଦଳ ଭିତରେ କୌଣସି କନ୍ଦଳ ନଥିବା କହିଥିବା ବେଳେ ଦଳର ସୁପ୍ରିମୋଙ୍କ ମୋହର ପରେ ଖୁବଶୀଘ୍ର ବିଜେଡି ତା’ର ପ୍ରାର୍ଥୀ ଘୋଷଣା କରିବ ବୋଲି କହିଛନ୍ତି ।
ଏହାରି ଭିତରେ ବିଜେପି ନିଜ କବଜାରେ ଏହି ଆସନକୁ ରଖିବା ପାଇଁ ମାନଓ ମନ୍ଥନ ଆରମ୍ଭ କରିଦେଇଛି । କାହାକୁ ପ୍ରାର୍ଥୀ କରାଯିବ ସେଥିପାଇଁ ଏକ କମିଟି ଗଠନ କରି ଚାଲିଛି ବିଚାର ବିମର୍ଶ । ଗତ ଦୁଇଦିନ ତଳେ ଦିବଙ୍ଗତ ବିଧାୟକ ମଦନ ମୋହନ ଦତ୍ତଙ୍କ ପୁଅ ମାନସ ଦତ୍ତଙ୍କୁ ଜିଲ୍ଲା ସଂଯୋଜକ ଦାୟିତ୍ୱ ଦିଆଯାଇଛି । ତେଣୁ ମାନସଙ୍କୁ ମୈଦାନକୁ ଓହ୍ଲାଇ ଅନୁକମ୍ପା ମୂଳକ ଭୋଟ ହାତେଇବା ପାଇଁ ବିଜେପି ରଣନୀତି କରିପାରେ ବୋଲି ଆକଳନ କରାଯାଉଛି ।
ସେହିପରି କଂଗ୍ରେସ ମଧ୍ୟ ତାର ପ୍ରସ୍ତୁତିକୁ ଜୋରଦାର କରିଛି । ଦଳର ବରିଷ୍ଠ ବିଧାୟକ ସୁର ରାଉତରାୟଙ୍କ କହିବା ହେଲା ବାଲେଶ୍ୱର ସଦର ଆସନ ପାଇଁ ଦଳ ତାର ପ୍ରାର୍ଥୀ ଚୟନ ଚାଲିଛି । ୨୦୧୯ ନିର୍ବାଚନରେ ଦଳର ଲୋକସଭା ପ୍ରାର୍ଥୀ ଥିବା ନବଜ୍ୟୋତି ପଟ୍ଟନାୟଙ୍କୁ ଉପନିର୍ବାଚନରେ ପ୍ରାର୍ଥୀ କରିବାକୁ ଦଳ ଏକ ପ୍ରକାର ନିଷ୍ପତି କରିସାରିଛି ।