ସରକାରୀ ଘରେ ଚାଲିଥିଲା ମଦ ବେପାର । ଅସଲି ବ୍ରାଣ୍ଡର ବୋତଲରେ ବିକ୍ରି ହେଉଥିଲା ନକଲି ମଦ ।

କନକ ବ୍ୟୁରୋ: ସରକାରୀ କୋଠାରେ ଚାଲିଥିଲା ମଦ ବେପାର । ଆରଏସପି କ୍ୱାର୍ଟରରେ ନକଲି ମଦ କାରଖାନା ଚାଲିଥିଲା । ଷ୍ଟିଲସିଟି ରାଉରକେଲାର ସେକ୍ଟର ୧୯ ସ୍ଥିତ ଏକ ଆରଏସପି କ୍ୱାର୍ଟରରେ ବର୍ଷ ବର୍ଷ ଧରି ନକଲି ମଦ କାରଖାନା ଚାଲିଥିଲା । ଜନବସତି ମଧ୍ୟରେ ଏଭଳି ବେଆଇନ୍ କାର୍ଯ୍ୟକଳାପ ଚାଲିଥିଲେ ହେଁ ପୋଲିସ କିମ୍ବା ଅବକାରୀ ବିଭାଗ ଏହାର ଟେର ପାଉନଥିଲା ।

ଧିରେ ଧିରେ କାୟା ବିସ୍ତାର କରୁଥିବା ଚୋରା ମଦ ବେପାର ଚେର କେଉଁଠୁ ଲମ୍ବିଥିଲା ତା’ର ସୁରାକ ପାଉନଥିଲା ପୋଲିସ । ଲୋକମାନେ ବାରମ୍ବାର ଅଭିଯୋଗ କରିବା ପରେ ବି କେହି ଶୁଣୁନଥିଲେ । କିନ୍ତୁ ସହରରେ ଏହି ମଦ ବେପାରକୁ ନେଇ ଚର୍ଚ୍ଚା ହେବା ପରେ ଅବକାରୀ ବିଭାଗର ସ୍ୱତନ୍ତ୍ର ସ୍ୱାର୍ଡ ଆଜି ଚଢାଉ କରିଥିଲେ । ଚଢାଉ ବେଳେ ସାଢେ ୩ ଲକ୍ଷ ଟଙ୍କାର ୫୩୦ ଲିଟର ନକଲି ମଦ ଜବତ ହେବା ସହ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି । ଅଭିଯୁକ୍ତ ଗଙ୍ଗାଧର ସାହୁ, ଅରୁଣାଂଚଳ ପ୍ରଦେଶରୁ ଶସ୍ତାରେ ମଦ କିଣି ଆଣି ନାମିଦାମି ବ୍ରାଣ୍ଡର ବୋତଲରେ ଭର୍ତ୍ତି କରି ବିକ୍ରି କରୁଥିଲା ।