ତାଲା ପଡ଼ିଛି ହେଲେ କାରବାର ଚାଲିଛି । ହ୍ୱାଟ୍ସଆପ ଗ୍ରୁପରେ ହେଉଛି ମଦର କଳାବଜାରୀ, ପୋଲିସ ପଞ୍ଝାରେ ପଡ଼ିଲା ୯୦୦ ପେଟି ବିଦେଶୀ ମଦ
କନକ ବ୍ୟୁରୋ: ତାଲାବନ୍ଦ ସମୟରେ ମଦଦୋକାନରେ ସିନା ତାଲା ପଡ଼ିଛି, ହେଲେ ମଦର କଳାବଜାରୀ କରିବା ପାଇଁ ଅଭିନବ ଉପାୟ ଆପଣାଇଛନ୍ତି ଅସାଧୁ ବ୍ୟବସାୟୀ । ୱାଟ୍ସଆପ୍ ଗ୍ରୁପ ଜରିଆରେ ଚାଲିଛି ମଦର ବ୍ୟାପକ ବେଆଇନ କାରବାର । ଏଭଳି ଅଭିଯୋଗ ଆସିଛି ଅନୁଗୁଳ ସହରରୁ । ହ୍ୱାଟ୍ସଆପ୍ ଗ୍ରୁପରେ ବିଦେଶୀ ମଦର ବିବରଣୀ ସହ ମୂଲ୍ୟ ଧାର୍ଯ୍ୟ କରା ଯାଉଛି ଏବଂ ଏଥିପାଇଁ ମନଇଚ୍ଛା ଦାମ କଷୁଛନ୍ତିି କଳା ବେପାରୀ । ଗ୍ରାହକ ଅର୍ଡର ଦେବା ମାତ୍ରେ ସେମାନଙ୍କ ପାଖରେ ପହଁଚି ଯାଉଛି ମଦ ।
Kanak News is now on WhatsApp
Join and get latest news updates delivered to you via WhatsApp
ଅନୁଗୁଳରେ ମଦର କଳା ବ୍ୟବସାୟକୁ ରୋକିବାରେ ଅବକାରୀ ବିଭାଗ ବିଫଳ ହୋଇଥିବା ବେଳେ ଭଂଜନଗରରୁ ଜବତ ହୋଇଛି କୋଟିଏରୁ ଅଧିକ ଟଙ୍କାର ବିଦେଶୀ ମଦ । ଚା’ ଦୋକାନରେ ଚା’ କେଟିଲରେ ମଦ ବିକ୍ରି ହେଉଥିବା ଖବର ପାଇବା ପରେ ପୋଲିସ ଆରମ୍ଭ କରିଥିଲା ଜୋରଦାର ଚଢାଉ । ପାଟ୍ରୋଲିଂ ବେଳେ ପୋଲିସ ହାତରେ ଧରାପଡିଥିଲା ମାଲ ବୋଝେଇ ଟ୍ରକ । ଟ୍ରକରୁ ୯୦୦ ପେଟି ବିଦେଶୀ ମଦ ଜବତ କରାଯାଇଛି । ଯାହାର ବଜାର ଦର ପ୍ରାୟ ଏକ କୋଟି ହେବ ବୋଲି ଅନୁମାନ କରାଯାଉଛି । ଡ୍ରାଇଭର ଓ ହେଲପରକୁ ଗିରଫ କରାଯାଇଥିବା ବେଳେ ଗାଡି ମାଲିକ ଓ ମଦ କାରବାରର ମାଷ୍ଟର ମାଇଣ୍ଡକୁ ଖୋଜୁଛି ପୋଲିସ ।
ସେହିପରି ଆଠଗଡ ଅଂଚଳରୁ ୨ଟି କାରରୁ ବିପୁଳ ପରିମାଣର ଦେଶୀମଦ ଜବତ କରାଯାଇଛି । ଆଠଗଡ ଅଂଚଳରୁ ଏହି ମଦ କଟକର ବିଭିନ୍ନ ଅଂଚଳକୁ ଚାଲାଣ ହେଉଥିଲା । ଏହା ସହିତ ବାରଙ୍ଗ ଅଂଚଳରୁ ମଦ ଚାଲଣ କରାଯାଉଥିବା ଏକ ସ୍କୁଟି ବି ଜବତ ହୋଇଛି । କଟକ ଅବକାରୀ ବିଭାଗର ସ୍ପେଶାଲ ଟିମ୍ ମଦ ଜବତ କରିବା ସହ ୬ ଜଣଙ୍କୁ ଗିରଫ କରିଛି । ତାଲାବନ୍ଦ ବେଳେ ମଦଦୋକାନ ବନ୍ଦ ଥିବାରୁ ସାରା ରାଜ୍ୟରେ ମାତି ଉଠିଛନ୍ତି ଚୋରା ବେପାରୀ । ଚଢ଼ା ଦାମରେ ବିକି ମାଲମାଲ ହେଉଛନ୍ତି ।