କେରଳ ପରେ ତାମିଲନାଡୁ ବିଧାନସଭାରେ ହୋଇପାରେ କୃଷି କାନୁନ୍ ବିରୋଧରେ ପ୍ରସ୍ତାବ ପାରିତ । ମୁଖ୍ୟମନ୍ତ୍ରୀ ପାଲାନୀ ସ୍ୱାମୀଙ୍କ ନିକଟରେ ଦାବି କଲେ ଷ୍ଟାଲିନ୍ । କହିଲେ ଅନ୍ନଦାତାଙ୍କ ସପକ୍ଷରେ ଛିଡା ହୁଅନ୍ତୁ ସମସ୍ତ ବିରୋଧୀ ଦଳ
କନକ ବ୍ୟୁରୋ : ତାମିଲନାଡୁ ବିଧାନସଭାର ମୁଖ୍ୟ ବିରୋଧୀଦଳ ଡି.ଏମ୍.କେ ମୁଖ୍ୟ ଏମ.କେ ଷ୍ଟାଲିନ ମୁଖ୍ୟମନ୍ତ୍ରୀ ପାଲାନୀ ସ୍ୱାମୀଙ୍କୁ ଚିଠି ଲେଖି କୃଷି କାନୁନ ବିରୋଧରେ ତୁରନ୍ତ ବିଧାନସଭାର ସ୍ୱତନ୍ତ୍ର ଅଧିବେଶନ ଡାକି ପ୍ରସ୍ତାବ ପାରିତ କରିବାକୁ ଦାବି କରିଛନ୍ତି । ଷ୍ଟାଲିନ କହିଛନ୍ତି କି ଦେଶର ପ୍ରଥମ ରାଜ୍ୟ ଭାବେ ତାମିଲନାଡୁ ରାଜ୍ୟର କୃଷକ ମାନଙ୍କ ଋଣ ଛାଡ କରିବା ସହ ମାଗଣା ବିଜୁଳି ଯୋଗାଇ ଦେଉଛି । ତେଣୁ ସମୟ ଆସିଛି କି ରାଜ୍ୟସରକାର କେନ୍ଦ୍ରସରକାରଙ୍କ ଦ୍ୱାରା ପାରିତ କୃଷକ ବିରୋଧି କୃଷି ଆଇନ ବିରୋଧରେ ଏକଜୁଟ୍ ହୋଇ କୃଷି କାନୁନ ବିରୋଧରେ ବିଧାନସଭାରେ ସଂକଳ୍ପ ପାରିତ କରିବା ।
Kanak News is now on WhatsApp
Join and get latest news updates delivered to you via WhatsApp
ଷ୍ଟାଲିନ ମୁଖ୍ୟମନ୍ତ୍ରୀଙ୍କ ନିକଟକୁ ଲେଖିଥିବା ପତ୍ରରେ ଉଲ୍ଲେଖ କରିଛନ୍ତି ରାଜ୍ୟର ସମସ୍ତ ରାଜନୈତିକ ଦଳ ରାଜ୍ୟର କୃଷକ ମାନଙ୍କ ହିତରେ ସେମାନଙ୍କ ଦାବିକୁ ସମ୍ମାନ ଜଣାଇ ବିଧାନସଭାରେ କୃଷିବିଲ୍ ବିରୋଧରେ ସଂକଳ୍ପ ପାରିତ କରିବା । ଏହାସହ ସେ କେରଳର ଉଦାହରଣ ଦେଇ ଲେଖିଛନ୍ତି କି ଦେଶର ପ୍ରଥମରାଜ୍ୟ ଭାବେ କେନ୍ଦ୍ରସରକାରଙ୍କ ବିରୋଧରେ ପ୍ରସ୍ତାବ ଆଣିବାକୁ ସାହସ କରିଥିବା ବେଳେ ପଂଜାବ ସରକାର ବି ଏନେଇ ସଂକଳ୍ପ ପାରିତ କରିସାରିଛନ୍ତି ।
କହିରଖୁ କି କୃଷକ ଆନ୍ଦୋଳନକୁ ସମର୍ଥନ ଜଣାଇ ଡିଏମକେ ଓ ତାଙ୍କର ସହଯୋଗୀ ଦଳମାନେ ଡିସେମ୍ବର ୧୮ ତାରିଖ ଦିନ ଚେନ୍ନାଇ ଠାରେ ଗୋଟିଏ ଦିନ ପାଇଁ ଉପବାସ ଅନଶନ କରିଥିଲେ । ସୂଚନା ଥାଉକି କେନ୍ଦ୍ରସରକାରଙ୍କ ଦ୍ୱାରା ପାରିତ ହୋଇଥିବା ୩ ଟି କୃଷିବିଲକୁ ବିରୋଧ କରି ଦେଶର କୃଷକ ମାନେ ନଭେମ୍ବର ୨୬ ତାରିଖ ଠାରୁ ଦିଲ୍ଲୀର ବିଭିନ୍ନ ସୀମାରେ ଧାରଣା ଦେଇଛନ୍ତି । ଏହାରି ମଧ୍ୟରେ ୪୫ ଜଣ କୃଷକ ଆନ୍ଦୋଳନ ସ୍ଥଳରେ ପ୍ରାଣ ହରାଇଛନ୍ତି । କୃଷକ ସଂଗଠନ ଓ ସରକାରଙ୍କ ମଧ୍ୟରେ ସମସ୍ୟାର ସମାଧାନ ପାଇଁ ୬ ଥର ବୈଠକ ବସି ସାରିଥିଲେ ବି ଏପର୍ଯ୍ୟନ୍ତ କୌଣସି ନିଷ୍କର୍ସ ବାହାରିପାରି ନାହିଁ । ଗୋଟିଏ ପଟେ ସରକାର ତାଙ୍କ ଜିଦରେ ଅଟଳ ରହିଥିବା ବେଳେ ଆନ୍ଦୋଳନରତ କୃଷକ ମାନେ କହିଛନ୍ତି କି ସରକାର ସମ୍ପୁର୍ଣ୍ଣ ବିଲ୍ ପ୍ରତ୍ୟାହାର ନକରିବାଯାଏଁ ଆନ୍ଦୋଳନ ଜାରି ରହିବ ।