କଟକ ସମାଜସେବୀଙ୍କୁ କିମ୍ବଦନ୍ତୀ କ୍ରିକେଟର ଭିଭିଏସ ଲକ୍ଷ୍ମଣଙ୍କ ପ୍ରଶଂସା: ଟ୍ୱିଟ କରି ଲେଖିଲେ ଏମିତି କଥା
କନକ ବ୍ୟୁରୋ: ପେଶାରେ ଜଣେ ବହି ବନ୍ଧାଳି, ହେଲେ ତାଙ୍କ ନିଶା ଲୋକଙ୍କୁ ସହାୟତା କରିବା । ତାଙ୍କ କାମ ବିଷୟରେ ଆପଣ ଜାଣିଲେ ପ୍ରଶଂସା ନକରି ରହିପାରିବେନି । ସେଥିପାଇଁ ତ ପୂର୍ବତନ ଅନ୍ତର୍ଜାତୀୟ କ୍ରିକେଟର ଭିଭିଏସ ଲକ୍ଷ୍ମଣ ତାଙ୍କ କାମ ବିଷୟରେ ଜାଣିବା ପରେ ଟ୍ୱିଟ କରି ତାଙ୍କୁ ଭୁରି ଭୁରି ପ୍ରଶଂସା କରିଛନ୍ତି । ହଁ ଆଜ୍ଞା ଆମେ କହୁଛୁ କଟକର ସେହି ଦରଦୀ ବନ୍ଧୁ ଅଭିମନ୍ୟୁ ଦାସଙ୍କ କଥା । ଯିଏ ଅଚିହ୍ନା ଶବ ଦେଖିଲେ ଆଗେଇ ଆସନ୍ତି ସତ୍କାର କରିବାକୁ, ଆଉ କ୍ୟାନ୍ସର ରୋଗୀଙ୍କୁ ସହାୟତା ପାଇଁ ସବୁବେଳେ ପ୍ରସ୍ତୁତ ଥାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅଭିମନ୍ୟୁଙ୍କ ଏଭଳି ମହାନ କାମ ବିଷୟରେ ଜାଣିବା ପରେ ରହିପାରିଲେନି ଭିଭିଏସ ଲକ୍ଷ୍ମଣ । ଆଉ ଟ୍ୱିଟ କରି ତାଙ୍କୁ ପ୍ରଶଂସା କରିଥିଲେ । ଭିଭିଏସ ଲକ୍ଷ୍ମଣ ଟ୍ୱିଟ କରି ଲେଖିଛନ୍ତି, କଟକର ୫୦ ବର୍ଷିୟ ପୁସ୍ତକ ବନ୍ଧାଳି ଅଭିମନ୍ୟୁ ଦାସ । ଶବକୁ ସମ୍ମାନ ଜଣାଇ ଅଚିହ୍ନା ଲୋକଙ୍କ ଶବ ସତ୍କାର କରନ୍ତି । ଏହାସହ ହଜାର ହଜାର କ୍ୟାନ୍ସର ରୋଗୀଙ୍କ ଯତ୍ନ ନିଅନ୍ତି, ଯେଉଁମାନଙ୍କ ମଧ୍ୟରେ ରହିଛନ୍ତି ଅନେକ ଭୂମିହୀନ ଲୋକ । ଏଭଳି ନିସ୍ୱାର୍ଥପର ସେବା ପାଇଁ ଅଭିମନ୍ୟୁଙ୍କୁ ସାଲ୍ୟୁଟ ।
Abhimanyu Das, a 50-year-old book-binder from Cuttack,In his quest to give dignity to the dead, cremates unclaimed and unattended dead bodies .He has also been taking care of thousands of cancer patients most of whom are homeless or abandoned. Hats off to his selfless service 🙏🏼 pic.twitter.com/8yALdf8plf
— VVS Laxman (@VVSLaxman281) November 8, 2021
କେବଳ ଭିଭିଏସ ଲକ୍ଷ୍ମଣ ନୁହନ୍ତି ପୂର୍ବରୁ କ୍ରିକେଟର ମହମ୍ମଦ କୈଫ ମଧ୍ୟ ଅଭିମନ୍ୟୁଙ୍କୁ ତାଙ୍କ କାମ ପାଇଁ ପ୍ରଶଂସା କରିଥିଲେ । ତେବେ କଟକରେ ଅସହାୟ କ୍ୟାନ୍ସର ରୋଗୀ ଆଉ ଅଚିହ୍ନା ଶବଙ୍କ ଦେବଦୂତ ସାଜିଥିବା ଏହି ବ୍ୟକ୍ତି ଏବେ ପୁଣି ଚର୍ଚ୍ଚାରେ ରହିଛନ୍ତି । ତାଙ୍କ ମହତ କାମ ପାଇଁ ଅନ୍ତର୍ଜାତୀୟ କ୍ରିକେଟରମାନେ ତାଙ୍କ ପ୍ରଶଂସା କରୁଛନ୍ତି ।
କଟକ ନେତାଜୀ ନଗରର ଅଭିମନ୍ୟୁ ଦାସ । ବୟସ ୫୦ ବର୍ଷ । ଏପର୍ଯ୍ୟନ୍ତ ଅଭିମନ୍ୟୁ ୧୨ ଶହରୁ ଅଧିକ ଶବ ସତ୍କାର କରିସାରିଲେଣି । ଅଭିମନ୍ୟୁ କହିଲେ କଟକ ବଡ ଡାକ୍ତରଖାନା ହେଉ କି ଆଚାର୍ଯ୍ୟ ହରିହର କ୍ୟାନ୍ସର ହସ୍ପିଟାଲ ସଭିଏଁ ତାଙ୍କୁ ଜାଣନ୍ତି । ଯଦି କେହି ଚିକିତ୍ସା ପାଇଁ ହନ୍ତସନ୍ତ ହୁଅନ୍ତି ତେବେ ଖୋଜା ପଡନ୍ତି ଅଭିମନ୍ୟୁ । ଆଉ ଖବର ପାଇ ଅଭିମନ୍ୟୁ ବି ସଙ୍ଗେ ସଙ୍ଗେ ପହଞ୍ଚି ଯାଆନ୍ତି ।
ସେହିପରି ଅଚିହ୍ନା ଶବ ସତ୍କାର ପାଇଁ ସେ ସବୁ ବେଳେ ଆଗେଇ ଆସନ୍ତି । ଶବ ସତ୍କାର କେମିତି ହେବ? ଶବ କେମିତି ଶ୍ମସାନକୁ ନିଆଯିବ? ସବୁ କଥା ସେ ନିଜେ ବୁଝିଥାନ୍ତି । ନିଜ ପକେଟରୁ ହେଉ କିମ୍ବା କାହା ସହଯୋଗରେ ଟଙ୍କା ଯୋଗାଡ କରିଥାନ୍ତି । ଆଉ ଅସହାୟ ରୋଗୀଙ୍କୁ ସାହାଯ୍ୟ କରନ୍ତି । କେବଳ ସେତିକି ନୁହେଁ ପରିବାର ଛାଡି ପଳାଇ ଆସିଥିବା କ୍ୟାନ୍ସର ରୋଗୀଙ୍କୁ ରାସ୍ତାକଡରୁ କୋଳେଇ ନିଅନ୍ତି ଅଭିମନ୍ୟୁ ।
ମାନବ ସେବାକୁ ମାଧବ ସେବା ଭାବେ ଗ୍ରହଣ କରି ନେଇଛନ୍ତି ଅଭିମନ୍ୟୁ । ବର୍ଷ ବର୍ଷ ଧରି ତାଙ୍କର ଏଭଳି ସମର୍ପିତ ସେବା ନିହାତି ଭାବେ ପ୍ରଶଂସା ଯୋଗ୍ୟ ।