କନକ ବ୍ୟୁରୋ : ରତ୍ନଭଣ୍ଡାରରେ ରହିଛି କେତେ ଅଳଙ୍କାର । ଆଜି ବିଧାନସଭାରେ ଶ୍ରୀଜିଉଙ୍କ ରହସ୍ୟମୟ ରତ୍ନଭଣ୍ଡାରର ହିସାବ ରଖିଛନ୍ତି ସରକାର । ଏକ ଲିଖିତ ପ୍ରଶ୍ନର ଉତ୍ତରରେ ଆଇନ ମନ୍ତ୍ରୀ ପ୍ରାୟ ୩୦ବର୍ଷ ତଳେ ହୋଇଥିବା ଭଣ୍ଡାର ଘରର ଆକଳନ ସମ୍ପର୍କୀତ ତଥ୍ୟ ଉପସ୍ଥାପନ କରିଛନ୍ତି । ଆଉ କହିଛନ୍ତି ଭଣ୍ଡାର ଘରେ ସବୁ ସୁରକ୍ଷିତ ରହିଛି । ଏହା ସହ ସରକାର କହିଛନ୍ତି ବର୍ତ୍ତମାନ ରତ୍ନଭଣ୍ଡାର ଖୋଲିବା ପାଇଁ କୌଣସି ଯୋଜନା ନାହିଁ ।
Kanak News is now on WhatsApp
Join and get latest news updates delivered to you via WhatsApp
ରତ୍ନଭଣ୍ଡାରର ସମ୍ପତ୍ତି ତାଲିକା ନେଇ ଆଜି ବିଧାନସଭାରେ ଏକ ଲିଖିତ ପ୍ରଶ୍ନର ଉତ୍ତର ଦେଇଛନ୍ତି ଆଇନମନ୍ତ୍ରୀ ପ୍ରତାପ ଜେନା । ରତ୍ନଭଣ୍ଡାରର ସବୁଠାରୁ ରହସ୍ୟମୟ ଭିତର ଭଣ୍ଡାରରେ ରହିଛି ୪୫୪ଟି ସୁନା ଅଳଙ୍କାର ଓ ସାମଗ୍ରୀ । ୧୨ହଜାର ୭୩୭ଭରିରୁ ଅଧିକ ସୁନା ଓ ମୂଲ୍ୟବାନ ପଥର ଗଚ୍ଛିତ ଅଛି । ଭିତର ଭଣ୍ଡାରରେ ଥିବା ୨୩୬ ରୂପା ସାମଗ୍ରୀର ଓଜନ ୧୮ହଜାର ୮୧୫ ଭରିରୁ ଅଧିକ । ୧୯୮୫ ମସିହାରେ ଶେଷ ଥର ପାଇଁ ଭିତର ଭଣ୍ଡାର ଖୋଲିଥିବା ବେଳେ ୩୦ ବର୍ଷ ତଳର ତଥ୍ୟ ଦେଇଛନ୍ତି ସରକାର । ହେଲେ ବର୍ତ୍ତମାନ ଭଣ୍ଡାର ଘର ଖୋଲିବାର କୌଣସି ପ୍ରସ୍ତାବ ନଥିବା କହିଛନ୍ତି ଆଇନ ମନ୍ତ୍ରୀ ।
ବିଧାନସଭାରେ ସରକାର ରଖିଥିବା ଉତ୍ତରରେ ଆଇନମନ୍ତ୍ରୀ କହିଛନ୍ତି ଯେ ଭଣ୍ଡାର ଘରେ ଏମିତି ବି ଅନେକ ଅଳଙ୍କାର ଓ ସାମଗ୍ରୀ ରହିଛି ଯାହାର ହିସବା ସରକାରଙ୍କ ପାଖରେ ନାହିଁ । ଆଉ ୩୦ବର୍ଷ ତଳର ତଥ୍ୟ ଦେଇ ଭଣ୍ଡାର ଘରେ ସବୁ କିଛି ସୁରକ୍ଷିତ ଥିବା କହିଛନ୍ତି ମନ୍ତ୍ରୀ ।
ଏହାପୂର୍ବରୁ ଶ୍ରୀମନ୍ଦିରର ସମ୍ପତ୍ତି ନେଇ ବିସ୍ତୃତ ରିପୋର୍ଟ ମାଗିଥିଲେ ସୁପ୍ରିମକୋର୍ଟ । ଏମିତିକି ଭିତର ଭଣ୍ଡାର ଖୋଲିବା ନେଇ ଶ୍ରୀମନ୍ଦିର ପ୍ରଶାସନ ବିଚାର ବିମର୍ଷ ଆରମ୍ଭ କରିଥିବା ନେଇ ଚର୍ଚ୍ଚା ହୋଇଥିଲା । ବର୍ଷ ବର୍ଷ ଧରି ବନ୍ଦ ଥିବା ରତ୍ନଭଣ୍ଡରକୁ ନେଇ ଅନେକ ରହସ୍ୟ ଓ ଲୋକକଥା ରହିଛି । ୨୦୧୮ରେ ରତ୍ନଭଣ୍ଡାର ଯାଞ୍ଚ ବେଳେ ବି ଭିତରଭଣ୍ଡାର ଖୋଲାଯାଇ ନଥିଲା । ସୁପ୍ରିମକୋର୍ଟ ଶ୍ରୀମନ୍ଦିରର ସମ୍ପତ୍ତି ତାଲିକା ମାଗିବା ପରେ ଭିତର ଭଣ୍ଡାର ଖୋଲିବା ପାଇଁ ଦାବି ହୋଇ ଆସୁଛି । ଆଉ ଏତିକି ବେଳେ ସରକାର କହିଛନ୍ତିି ଭିତର ଭଣ୍ଡାର ଖୋଲିବା ପାଇଁ କୌଣସି ପ୍ରସ୍ତାବ ନାହିଁ ।