ପ୍ୟାନ କାର୍ଡ ସହ ଆଧାର ଲିଙ୍କ ନେଇ ବଢିଲା ସମୟ ଅବଧି, ଜାଣନ୍ତୁ ବେନାମୀ ସମ୍ପତ୍ତି ଉପରେ କ’ଣ ହୋଇଛି ନିଷ୍ପତ୍ତି

କନକ ବ୍ୟୁରୋ : କରୋନା ମହାମାରୀ ସମୟରେ କରଦାତାଙ୍କ ଅସୁବିଧାକୁ ଦୃଷ୍ଟିରେ ରଖି ଆୟକର ବିଭାଗ ପୁଣିଥରେ ଆଧାର ସହିତ ପ୍ୟାନକାର୍ଡ ଲିଙ୍କ କରିବାର ସମୟ ଅବଧି ବୃଦ୍ଧି କରିଛନ୍ତି । ଆୟକର ବିଭାଗ ଟ୍ୱିଟର ମାଧ୍ୟମରେ ପ୍ୟାନ କାର୍ଡ ସହ ଆଧାର କାର୍ଡ ଲିଙ୍କ କରିବାର ଶେଷ ତାରିଖ ବାବଦରେ ସୂଚନା ଦେଇଛନ୍ତି । ଆୟକର ବିଭାଗର ସୂଚନା ମୁତାବକ ପ୍ୟାନ କାର୍ଡ ସହ ଆଧାର ଲିଙ୍କର ଶେଷ ତାରିଖ ସେପ୍ଟେମ୍ବର ୩୦ ତାରିଖ ବଦଳରେ ୨୦୨୨ ମାର୍ଚ୍ଚ ୩୧ ତାରିଖକୁ ବୃଦ୍ଧି କରାଯାଇଥିବା ସୂଚନା ଦେଇଛନ୍ତି । ଅର୍ଥାତ କରଦାତାଙ୍କ ଏନେଇ ଅଧିକ ୬ ମାସ ସମୟ ଦିଆଯାଇଛି ।

କେବଳ ସେତିକି ନୁହେଁ ଆୟକର ବିଭାଗ ତରଫରୁ ଆୟକର ଆଇନ ଅଧିନରେ ଜରିମାନା ପକ୍ରିୟା ପୁରା କରିବାର ଶେଷ ତାରିଖକୁ ବି ସେପ୍ଟେମ୍ବର ୩୦ ୨୦୨୧ ରୁ ୨୦୨୨ ମାର୍ଚ୍ଚ ୩୧ ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି ।

ଅନ୍ୟପଟେ ବେନାମୀ ସମ୍ପତ୍ତି କିଣାବିକା ରୋକିବାକୁ ଥିବା ୧୯୮୮ ଆଇନ ଆଧାରରେ ବିଭାଗୀୟ ମୁଖ୍ୟଙ୍କ ଦ୍ୱାରା ନୋଟିସ ଜାରି କରିବା ଓ ଆଦେଶ ପାରିତ କରିବାର ଶେଷ ତାରିଖ ୨୦୨୧ ସେପ୍ଟେମ୍ବର ରୁ ୨୦୨୨ ମାର୍ଚ୍ଚ ୩୧ ପର୍ଯ୍ୟନ୍ତ ବୃଦ୍ଧି କରିଛନ୍ତି ।

କହିରଖୁ କି ଆୟକର ବିଭାଗ ଚଳିତମାସ ଜୁନ ୭ ତାରିଖରେ ବିଭାଗର ନୂଆ ୱେବସାଇଟ ଆରମ୍ଭ କରିଥିଲା । ଏହି ୱେବସାଇଟ ଲଂଚ କରାଯିବା ପରେ ଟ୍ୟାକ୍ସ ରିର୍ଟନ ଫାଇଲ ଦାଖଲ କରିବାରେ ଆୟକର ଦାତାମାନେ ବିଭିନ୍ନ ସମସ୍ୟାରେ ସମ୍ମୁଖୀନ ହେଉଛନ୍ତି । ତେଣୁ ଆଧାର ସହ ପ୍ୟାନ ଲିଙ୍କ କରିବାର ଶେଷ ତାରିଖକୁ ବୃଦ୍ଧି କରିବା ଏହି ଅସୁବିଧାର ଏକ ପ୍ରମୁଖ କାରଣ ବୋଲି କୁହାଯାଉଛି ।