ଆଉ ଶୁଭିବନି ନାରାବାଜି, ଗଡ଼ିବନି ପ୍ରଚାର ଗାଡ଼ି । ସରିଲା ୨୦୨୪ ନିର୍ବାଚନ ପ୍ରଚାର, ଦିନକ ପରେ ଶେଷ ପର୍ଯ୍ୟାୟ ମତଦାନ
କନକ ବ୍ୟୁରୋ : ଆଉ ଶୁଭିବନି ପ୍ରାର୍ଥୀଙ୍କ ପାଇଁ କର୍ମୀଙ୍କ ଜିନ୍ଦାବାଦ ନାରା, ରାସ୍ତାରେ ଦେଖିବାକୁ ମିଳିବନି ନିର୍ବାଚନ ପ୍ରଚାର ଗାଡି କି କୌଣସି ପ୍ରାର୍ଥୀଙ୍କ ଶୋଭାଯାତ୍ରା କି ସମାବେଶ । ନିର୍ବାଚନ କମିସନଙ୍କ ନିୟମ ଅନୁସାରେ ୨୦୨୪ ଲୋକସଭା ଓ ବିଧାନସଭା ନିର୍ବାଚନ ପାଇଁ ଏପ୍ରିଲ ମାସରୁ ଆରମ୍ଭ ହୋଇଥିବା ପ୍ରଚାର ଆଜି ସନ୍ଧ୍ୟାରୁ ସମ୍ପୂର୍ଣ୍ଣ ଶେଷ ହୋଇଯାଇଛି ।ରାଜ୍ୟର ଚତୁର୍ଥ ପର୍ଯ୍ୟାୟ ସହ ଶେଷ ହୋଇଛି ଦେଶର ସପ୍ତମ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାର ।
Kanak News is now on WhatsApp
Join and get latest news updates delivered to you via WhatsApp
ପ୍ରଚାର ଶେଷ ହେବା ସହ ମତଦାନ ପାଇଁ ଆରମ୍ଭ ହୋଇଯାଇଛି କାଉଂଟଡାଉନ । ଶେଷ ପର୍ଯ୍ୟାୟରେ ହେବାକୁ ଥିବା ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡା ଓ ଜଗତସିଂହପୁର । ଲୋକସଭା ଓ ୪୨ଟି ବିଧାନସଭା ଆସନରେ ନୂଆ ନେତା ବାଛିବେ ଭୋଟର । ୯୯ଲକ୍ଷ ୬୧ ହଜାର ଭୋଟର ୪୬୦ ନେତାଙ୍କ ଭାଗ୍ୟ ନିର୍ଦ୍ଧାରଣ କରିବେ ।
କେନ୍ଦ୍ରାପଡା ସଂସଦୀୟ କ୍ଷେତ୍ର ଉଭୟ ବିଜେଡି ଓ ବିଜେପି ପାଇଁ ସମ୍ମାନର ପ୍ରଶ୍ନ । ଏହି ଆସନରୁ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ଓ ବିଜେଡି ପ୍ରାର୍ଥୀ ଅଂଶୁମାନ ମହାନ୍ତି ଲଢ଼ୁଥିବାରୁ ଜନତା କାହାକୁ ନେତା ବାଛୁଛନ୍ତି ତା ଉପରେ ସମସ୍ତଙ୍କ ନଜର ରହିଛି ।
ବାଲେଶ୍ୱର ଲୋକସଭା ଆସନରେ ଦୁଇ ପୂର୍ବତନ କେନ୍ଦ୍ରମନ୍ତ୍ରୀ ପ୍ରତାପ ଷଢ଼ଙ୍ଗୀ ଓ ଶ୍ରୀକାନ୍ତ ଜେନା ପ୍ରାର୍ଥୀ ହୋଇଥିବାରୁ ବଡ ଲଢ଼େଇ ହେଉଛି । ଏପଟେ ବିଜେଡି ମଧ୍ୟ ଲେଖାଶ୍ରୀ ସାମନ୍ତସିଂହାରଙ୍କୁ ପ୍ରାର୍ଥୀ କରି ମହିଳା କାର୍ଡ ଖେଳିଛି ।
ସେହିପରି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଜିଲ୍ଲା ମୟୂରଭଞ୍ଜରେ ଏଥର ବିଜେପି ପ୍ରାର୍ଥୀ ନବ ଚରଣ ମାଝୀ ଓ ବିଜେଡି ପ୍ରାର୍ଥୀ ସୁଦାମ ମାର୍ଣ୍ଡିଙ୍କ ମଧ୍ୟରେ ହାଇଭୋଲଟେଜ୍ ଲଢ଼େଇ ହେଉଛି । ତେବେ ଭୋଟର କାହା ମୁଣ୍ଡରେ ସୁନାକଳସ ଢ଼ାଳିବେ ତା’ ଉପରେ ରହିଛି ସାରା ରାଜ୍ୟର ନଜର ।
ଲୋକସଭା ଭଳି ବିଧାନସଭା ଆସନରେ ବିଜେଡି, ବିଜେପି ଓ କଂଗ୍ରେସର ବହୁ ତୁଙ୍ଗ ନେତା ମଇଦାନରେ ଅଛନ୍ତି । ବିଜେଡିର ପ୍ରତାପ ଦେବ, ଗଣେଶ୍ୱର ବେହେରା, ଅତନୁ ସବ୍ୟସାଚୀ ନାୟକ, ପ୍ରଶାନ୍ତ ମୁଦୁଲି, ପ୍ରଣବ ବଳବନ୍ତରାୟ, ଭଳି ନେତା ରଣାଂଗନରେ ରହିଛନ୍ତି । ସେହିପରି ବିଜେପିର ମନମୋହନ ସାମଲ, ସୂରଜ ସୂର୍ଯ୍ୟବଂଶୀ, ଅରିନ୍ଦମ ରୟ, ଆକାଶ ଦାସ ନାୟକଙ୍କ ଭଳି ବଡ ନେତାଙ୍କ ଭାଗ୍ୟ ଏହି ପର୍ଯ୍ୟାୟରେ ନିର୍ଦ୍ଧାରଣ କରିବେ ଭୋଟର । କଂଗ୍ରେସର ନିରଞ୍ଜନ ପଟ୍ଟନାୟକ, ସୁଦର୍ଶନ ଦାସଙ୍କ ରାଜନୈତିକ ଭବିଷ୍ୟତର ହିସାବ ନିକାଶ ଏହି ପର୍ଯ୍ୟାୟରେ ହେବ ।