ପୁରୀରେ ଜାଗା ଯୋଗାଇ ଦେବାକୁ କହି ଲୁଟ୍ । ୬୫୦ ଜଣଙ୍କ ଠାରୁ କୋଟି କୋଟି ଟଙ୍କା ଠକିନେଲା ସେଭେନ୍ ହିଲ୍ ରିୟର ଇଷ୍ଟେ୍ଟ୍ ସଂସ୍ଥା ।
ଜଣ ପିଛା ୨୫ ଲକ୍ଷ ଟଙ୍କା ଦେଇ ଘର ପାଇବାକୁ ଅନେଇ ରହିଛନ୍ତି ଗ୍ରାହକ
କନକ ବ୍ୟୁରୋ: ପୁରୀରେ ଜାଗା ଦେବାକୁ କହି ୬୫୦ ଲୋକଙ୍କୁ ଚୁନ ଲଗାଇଲା ରିୟଲ ଇଷ୍ଟେଟ୍ ସଂସ୍ଥା । ନୀଳାଚଳ ଧାମରେ ଜାଗା ଦେବାର ପ୍ରଲ୍ଲୋଭନ ଦେଖାଇ କୋଟି କୋଟି ଟଙ୍କା ଠକି ନେଇଛି ସେଭେନ ହିଲ ରିୟଲ ଇଷ୍ଟେଟ ସଂସ୍ଥା । ରାଜ୍ୟ ତଥା ରାଜ୍ୟ ବାହାରର ପ୍ରାୟ ୬୫୦ ଜଣ ଲୋକଙ୍କୁ ଏହି ସଂସ୍ଥା ଠକିଥିବା ଅଭିଯୋଗ ହୋଇଛି । ପୁରୀ ବଳିଆପଣ୍ଡା ଅଂଚଳରେ ୨୦୦୭-୦୮ରେ ଆରମ୍ଭ ହୋଇଥିଲା ସେଭେନ ହିଲ ଆପାର୍ଟମେଂଟ । ବ୍ରହ୍ମପୁରର କେଏସ ଶ୍ରୀନିବାସ ନାମକ ବ୍ୟକ୍ତି ଏହି ଆପାର୍ଟମେଂଟ କାମ ଆରମ୍ଭ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସେ ସମୟରେ ଅନେକ ଲୋଭନୀୟ ଆଶା ଦେଖାଇ ଲୋକଙ୍କଠାରୁ ଅନଲାଇନ ବୁକିଂ କରିଥିଲା ସେଭେନ ହିଲ ରିୟଲ ଇଷ୍ଟେଟ ସଂସ୍ଥା । ପବିତ୍ର ଧାମ ପୁରୀରେ ଜାଗା ଖଣ୍ଡିଏ ପାଇବାକୁ ଆଶାୟୀ ପ୍ରାୟ ୬୫୦ ଜଣ ସେମାନଙ୍କ କଷ୍ଟ ଅର୍ଜିତ ଧନ ନିବେଶ କରିଥିଲେ । ୨୫ ଲକ୍ଷରୁ ଅଧିକ ଟଙ୍କା ଦେଇ ଫ୍ଲାଟ ସବୁ ବୁକ୍ କରିଥିଲେ । ହେଲେ ଲୋକଙ୍କଠାରୁ ଟଙ୍କା ନେଇ ଫେରାର ମାରିଛନ୍ତି ସଂପୃକ୍ତ ସଂସ୍ଥାର ମାଲିକ । ଅଧିକାଂଶ ଘର ଅଧାଗଢା ହୋଇ ପଡିରହିଥିବାବେଳେ, ଆପାର୍ଟମେଂଟ ମାଲିକ ଆଉ ଧରାଛୁଆଁ ଦେଉନାହାନ୍ତି ।
ମାମଲା କୋର୍ଟରେ ପହଂଚିବା ପରେ ଏକ ସତ୍ୟପାଠ ଦାଖଲ କରିଥିଲା ଆପାର୍ଟମେଂଟ ସଂସ୍ଥା । ୨୦୧୮ ଡିସେମ୍ବର ସୁଦ୍ଧା ଘର ସଂପୂର୍ଣ୍ଣ କରି ଗ୍ରାହକଙ୍କୁ ହସ୍ତାନ୍ତର କରିବାକୁ ପ୍ରତିଶ୍ରୁତି ଦେଇଥିଲା ସେଭେନ ହିଲ ରିୟଲ ଇଷ୍ଟେଟ । ହେଲେ କୋର୍ଟଙ୍କ ଆଦେଶକୁ ଉଲ୍ଲଂଘନ କରି ସଂସ୍ଥା ଆଜିଯାଏଁ ଘର ଯୋଗାଇ ନାହିଁ । ଓଡିଶା ରିୟଲ ଇଷ୍ଟେଟ ରେଗୁଲେଟୋରୀ ଅଥରିଟି, ଏ ସଂପର୍କରେ ନୋଟିସ କରି ଚୁପ ବସିପଡିଛି । ଜିଲ୍ଲା ପ୍ରଶାସନ କିମ୍ବା ରାଜ୍ୟ ସରକାର ଏଭଳି ଖିଲାପକାରୀ ସଂସ୍ଥା ବିରୋଧରେ କୌଣସି ଆଖି ଦୃଶିଆ କାର୍ଯ୍ୟାନୁଷ୍ଠାନ ହେଉନଥିବାରୁ ପ୍ରବଳ ଅସନ୍ତୋଷ ପ୍ରକାଶ ପାଇଛି ।