ଆମେ ତାଙ୍କୁ ମୁଖ୍ୟମନ୍ତ୍ରୀ କରିଥିଲୁ କିନ୍ତୁ ପଲଟୁରାମ ବିଜେପି ସହ ଚାଲିଗଲେ : ଲାଲୁ
କନକ ବ୍ୟୁରୋ : ଦୀର୍ଘ ଦିନର ବ୍ରେକ ପରେ ପୁଣିଥରେ ପ୍ରଚାର ମୈଦାନକୁ ଓହ୍ଲାଇଛନ୍ତି ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ । ଆଉ ପ୍ରଚାର ମୈଦାନକୁ ଓହ୍ଲାଇବା କ୍ଷଣି ନିଜର ପୁରୁଣା ଅନ୍ଦାଜରେ ସମ୍ବୋଧନ କରିଛନ୍ତି ଲାଲୁ । ସ୍ୱର ଟିକିଏ ନରମ ପଡିଛି ସତ କିନ୍ତୁ ଅନ୍ଦାଜ ସେହିଭଳି ପୁରୁଣା ରହିଛି । ଲାଲୁ କହିଛନ୍ତି, ବିହାରବାସୀ ତେଜସ୍ୱୀଙ୍କୁ ନିଜର ମୁଖ୍ୟମନ୍ତ୍ରୀ ବାଛି ସାରିଥିଲେ କିନ୍ତୁ ନୀତିଶ କୁମାର ବେଇମାନି କରି ସରକାର ଗଢିଛନ୍ତି । ଯଦି ସେହି ସମୟରେ ମୁଁ ବାହାରେ ଥାଆନ୍ତି ତେବେ ନୀତିଶ କୁମାର ଏଭଳି ସାହସ କରିପାରିନଥାନ୍ତେ । କିନ୍ତୁ ଏବେ ମୁଁ ଆସିଗଲିଣି, ଏବେ ଆପଣଙ୍କ ଗହଣରେ ରହିବି ।
Kanak News is now on WhatsApp
Join and get latest news updates delivered to you via WhatsApp
ତାରାପୁର ବିଧାନସଭା ଆସନ ପାଇଁ ହେଉଥିବା ଉପନିର୍ବାଚନରେ ଏକ ସାଧାରଣ ସଭାକୁ ସମ୍ବୋଧନ କରି ଲାଲୁ କହିଛନ୍ତି, ସାମ୍ପ୍ରଦାୟିକ ଶକ୍ତି ଠାରୁ ଦୂରେଇ ରହିବାର ଆବଶ୍ୟକତା ରହିଛି । ବିଜେପି ସହ ମୁଁ କେବେ ବୁଝାମଣା କରିନାହିଁ । କିନ୍ତୁ ନୀତିଶ କୁମାର ନାଥୁରାମ ଗଡେଶଙ୍କ ସମର୍ଥକ ହୋଇଗଲାଣି । ନୀତିଶ ପୂର୍ବରୁ କହିଥିଲେ ମାଟିରେ ମିଶିଯିବି ପଛେ ବିଜେପି ସହ ହାତ ମିଳାଇବି ନାହିଁ । ଆମେ ତାଙ୍କୁ ମୁଖ୍ୟମନ୍ତ୍ରୀ କରିଥିଲୁ କିନ୍ତୁ ପଲଟୁରାମ ବିଜେପି ସହ ଚାଲିଗଲେ ।
ନୀତିଶଙ୍କୁ ଅହଙ୍କାରୀ ବୋଲି କହିବା ସହ ଲାଲୁ କହିଛନ୍ତି, ତେଜସ୍ୱୀ ଯାଦବ ଏବେ ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ନିଦ ହଜାଇ ସାରିଲେଣି । ଏବେ ମୁଁ ମୈଦାନକୁ ଆସିଛି । ତେଜସ୍ୱୀ ଯାଦବଙ୍କୁ ବିହାରବାସୀ ଜିତାଇଛନ୍ତି, ବିହାର ମୁଖ୍ୟମନ୍ତ୍ରୀ ଭାବେ ମଧ୍ୟ ଦେଖିବାକୁ ଚାହୁଁଥିଲେ କିନ୍ତୁ ନୀତିଶ କୁମାର ୮ଟି ସିଟରେ ବେଇମାନି କରି ଆମ ପ୍ରାର୍ଥୀଙ୍କୁ ହରାଇ ଦେଇଛନ୍ତି । ସେତେବେଳେ ମୁଁ ଜେଲରେ ଥିଲି, ବାହାରେ ରହିଥିଲେ ନୀତିଶ ଏଭଳି ସାହସ କରିପାରିନଥାନ୍ତେ ।
ଲାଲୁ କହିଛନ୍ତି, ବିଜେପି ସରକାର ସମୟରେ ରେଳ, ଜାହାଜ ସବୁ କିଛି ବିକ୍ରି ହୋଇଗଲାଣି । ବିହାରରେ ଏବେ ଲୋକଙ୍କୁ କାମ ମିଳୁନାହିଁ । ସେହିଭଳି ଜାତିଗତ ଜନଗଣନାକୁ ନେଇ ଲାଲୁ କହିଛନ୍ତି, ଯଦି ଦେଶରେ ପଶୁପକ୍ଷୀଙ୍କର ଗଣନା ହୋଇପାରୁଛି ତେବେ ମଣିଷଙ୍କର ଗଣନା କାହିଁକି ବା ହୋଇପାରିବନି ।