ଲକ୍ଷ୍ମୀ ବିଳାସ ବ୍ୟାଙ୍କ ଦେବାଳିଆ ହେବା ପରେ ଆଶଙ୍କାରେ ଗ୍ରାହକ । ରିଜର୍ଭ ବ୍ୟାଙ୍କର ୩୦ ଦିନିଆ ମୋରାଟୋରିୟମ ଘୋଷଣା, ମାସକ ଭିତରେ ମାତ୍ର ୨୫ ହଜାର ଟଙ୍କା ନଗଦ ଉଠାଇ ପାରିବେ ଜମାକାରୀ
କନକ ବ୍ୟୁରୋ : ଯଦି ଆପଣଙ୍କ ବ୍ୟାଙ୍କ ଦେବାଳିଆ ହୋଇଯାଇଛି ବୋଲି ଖବର ଆସେ ଏବଂ ଆପଣ ଏକ ମାସ ଭିତରେ ମୋଟ ୨୫ ହଜାର ଟଙ୍କା ଉଠାଇ ପାରିବେ ବୋଲି କଟକଣା କରାଯାଏ, ତେବେ ଆପଣଙ୍କ ସବୁ ପ୍ଲାନିଂ ଗଡ଼ବଡ଼ ହୋଇଯିବ । ଏଭଳି ସ୍ଥିତି ଉପୁଜିଛି ଲକ୍ଷ୍ମୀ ବିଳାସ ବ୍ୟାଙ୍କରେ ଦେବାଳିଆ ଉପୁଜିବା ପରେ ।
Kanak News is now on WhatsApp
Join and get latest news updates delivered to you via WhatsApp
ୟେସ୍ ବ୍ୟାଙ୍କ ପରେ ଦ୍ୱିତୀୟ ଘରୋଇ ବ୍ୟାଙ୍କ ଭାବେ ଲକ୍ଷ୍ମୀ ବିଳାସ ବ୍ୟାଙ୍କରେ ଦେବାଳିଆ ସ୍ଥିତି ଉପୁଜିଥିବାରୁ ଜମାକାରୀ ଓ ଗ୍ରାହକଙ୍କ ମଧ୍ୟରେ ଆଶଙ୍କା ପ୍ରକାଶ ପାଇଛି । ନଭେମ୍ବର ୧୭ରୁ ଡିସେମ୍ବର ୧୬ ପର୍ଯ୍ୟନ୍ତ ୩୦ ଦିନିଆ ମୋରାଟୋରିୟମ ଘୋଷଣା ଏବଂ ଏହି ଅବଧି ଭିତରେ ପ୍ରତି ଜମାକାରୀଙ୍କୁ ମାତ୍ର ୨୫ ହଜାର ଟଙ୍କା ଉଠାଣ ପାଇଁ ରିଜର୍ଭ ବ୍ୟାଙ୍କର ଅନୁମତି, ଗ୍ରାହକଙ୍କୁ ଚିନ୍ତାରେ ପକାଇ ଦେଇଛି ।
ଲକ୍ଷ୍ମୀ ବିଳାସ ବ୍ୟାଙ୍କ ଆର୍ଥିକ ଦେବାଳିଆ ସ୍ଥିତିକୁ ସୁଧାରିବା ପାଇଁ ଅଂଟା ଭିଡିଛି ରିଜର୍ଭ ବ୍ୟାଙ୍କ । ବ୍ୟାଙ୍କ ପରିଚାଳନାକୁ ହାତକୁ ନେବା ସହ ପ୍ରଶାସକ ଭାବେ କାନାରା ବ୍ୟାଙ୍କର ଅଣ-କାର୍ଯ୍ୟନିର୍ବାହୀ ଅଧ୍ୟକ୍ଷ ଟି. ଏନ୍. ମନୋହରନ୍ଙ୍କୁ ନିଯୁକ୍ତି ଦିଆଯାଇଛି । ଆଶ୍ୱାସନାର ବିଷୟ ହେଉଛି, ଜମାକାରୀଙ୍କ ଟଙ୍କା ଫେରାଇବା ପାଇଁ ବ୍ୟାଙ୍କ ନିକଟରେ ପର୍ଯ୍ୟାପ୍ତ ସଂପତି ରହିଛି ବୋଲି କହିଛନ୍ତି ରିଜର୍ଭ ବ୍ୟାଙ୍କ ନିଯୁକ୍ତ ପ୍ରଶାସକ । ଏପଟେ ଡିବିଏସ ବ୍ୟାଙ୍କ ସହ ଲକ୍ଷ୍ମୀ ବିଳାସ ବ୍ୟାଙ୍କର ମିଶ୍ରଣ ପାଇଁ ଡ୍ରାଫ୍ଟ ପ୍ରସ୍ତୁତ କରୁଛି ରିଜର୍ଭ ବ୍ୟାଙ୍କ ।
୧୯୨୬ ମସିହାରେ ଚେନ୍ନାଇରେ ଏହି ବ୍ୟାଙ୍କକୁ ଭିଏସଏନ୍ ରାମାଲିଙ୍ଗା ଚେତିଆର୍ଙ୍କ ନେତୃତ୍ୱରେ ପ୍ରତିଷ୍ଠା କରିଥିଲେ କିଛି ଉଦ୍ୟୋଗୀ । ଯେତେବେଳେ ବଡ଼ ଋଣ ଉପରେ ଲକ୍ଷ୍ମୀବିଳାସ ବ୍ୟାଙ୍କ ଫୋକସ କଲା, ସେତେବେଳେ ସ୍ଥିତି ଜଟିଳ ହେବାରେ ଲାଗିଲା । ବଡ଼ ଋଣ ଦେଲା, ହେଲେ ଠିକ ସମୟରେ ପରିଶୋଧ ନହେବାରୁ ବ୍ୟାଙ୍କର ଆର୍ଥିକ ସ୍ଥିତି ବିଗିଡି ଯାଇଥିଲା ।