ଲୋକାରଣ୍ୟ ପାଲଟିଲା ଶ୍ରୀକ୍ଷେତ୍ର: ଭକ୍ତଙ୍କ ଜୟ ଜଗନ୍ନାଥ…ଡାକରେ ଉଠୁଛି ପଡୁଛି ବଡଦାଣ୍ଡ
କିଏ ଦୁଇ ହାତ ଉଠାଇ ବ୍ରହ୍ମାଣ୍ଡକର୍ତ୍ତାଙ୍କ ଆଗରେ ନିଜକୁ ସମର୍ପି ଦେଉଥିଲା ତ ଆଉ କାହାର ଆଖିରୁ ଝରିଆସୁଥିଲା ଲୁହ
କନକ ବ୍ୟୁରୋ: ଲୋକାରଣ୍ୟ ପାଲଟିଲା ଶ୍ରୀକ୍ଷେତ୍ର । ଯେଉଁଠି ଦେଖିବ ଖାଲି ଲୋକ ହିଁ ଲୋକ । ଭାବ ବିନୋଦିଆ କାଳିଆ ସାଆନ୍ତଙ୍କୁ ପାଖରୁ ଟିକିଏ ମନୋଭରି ଦେଖିବା ପାଇଁ କାହିଁ କେତେ ଦୂରରୁ ଧାଇଁ ଆସିଛନ୍ତି ଲକ୍ଷ ଲକ୍ଷ ସଂଖ୍ୟକ ଶ୍ରଦ୍ଧାଳୁ । ଆଉ ଜଗତର ନାଥ ଜଗନ୍ନାଥ ମଧ୍ୟ ନିଜ ଭକ୍ତଙ୍କ ମେଳକୁ ଆସିବା ପାଇଁ ବ୍ୟାକୁଳ ହୋଇପଡିଛନ୍ତି । ବରଷକେ ଥରେ ଏହି ପବିତ୍ର ତିଥିରେ ମହାପ୍ରଭୁ ଶ୍ରୀ ଜଗନ୍ନାଥ ଭାଇ ଏବଂ ଭଉଣୀକୁ ସାଥିରେ ଘେନି କେବଳ ଭକ୍ତଙ୍କ ପାଇଁ ବଡ ଦେଉଳର ରତ୍ନବେଦୀଙ୍କୁ ମୁରୁଛି ଦେଇ ଧାଇଁ ଆସିଛନ୍ତି ବଡଦାଣ୍ଡକୁ ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀକ୍ଷେତ୍ର ବଡଦାଣ୍ଡରେ ଦେଖିବାକୁ ମିଳିଛି ଏଭଳି କିଛି ଦୃଶ୍ୟ। କିଏ ଦୁଇ ହାତ ଉଠାଇ ବ୍ରହ୍ମାଣ୍ଡକର୍ତାଙ୍କ ଆଗରେ ନିଜକୁ ସମର୍ପି ଦେଉଥିଲା ତ ଆଉ କାହାର ଆଖିରୁ ଝରିଆସୁଥିଲା ଲୁହ । ନୃତ୍ୟ, ଗୀତ ଓ ବିଭିନ୍ନ ବେଶରେ ମହାପ୍ରଭୁଙ୍କୁ ରଥ ଉପରକୁ ନିମନ୍ତ୍ରଣ କରିଥିଲେ ଶ୍ରଦ୍ଧାଳୁ । ବଡଦାଣ୍ଡରେ ଏକ ହୋଇଯାଇଥିଲେ ଭକ୍ତ ଓ ଭଗବାନ ।
ଶରଧାବାଲିରେ ମହାବାହୁଙ୍କ ଆଗରେ ହାତ ଯୋଡି କୃପା ଭିକ୍ଷା କରୁଥିଲେ ଭକ୍ତ । ବ୍ରହ୍ମାଣ୍ଡକର୍ତାଙ୍କ ଦର୍ଶନ ପାଇଁ ଆତୁର ହୋଇଉଠିଥିଲା ନୟନ । ଆଖିରୁ ଝରିଯାଉଥିଲା ଲୁହ । ନଜର, ଲାଖିଯାଇଥିଲା ନନ୍ଦିଘୋଷ ଉପରେ । ଚାତକ ପରି ଚାହିଁ ରହିଥିଲା, କେତେବେଳେ ରଥ ଉପରେ ବିରାଜିବେ କାଳିଆ ସାଆନ୍ତ ।
ଜନ୍ମବେଦୀରୁ ରତ୍ନବେଦୀକୁ ଯାତ୍ରା । ରଥ ଉପରେ ଭକ୍ତଙ୍କୁ ଦର୍ଶନ ଦେବେ ଭଗବାନ । ମହାପ୍ରଭୁଙ୍କ ପାଇଁ ନିଜକୁ ସମର୍ପି ଦେଇଛି ଭକ୍ତ । କିଏ କୃଷ୍ଣ ବେଶ ନେଇଛି ତ ଆଉ କିଏ ମହାବୀର ହନୁମାନ । ରଥ ଆଗରେ ନୃତ୍ୟ କରି ଗୀତ ଗାଇ କରିଛନ୍ତି ଆରାଧନା । ପାଗ ମେଘୁଆ ଥିଲା । ବର୍ଷା ନଥିଲା । ଶ୍ରୀକ୍ଷେତ୍ରକୁ ଛୁଟିଆସିଥିଲେ ଲକ୍ଷ ଲକ୍ଷ ଭକ୍ତ । ହାତ ଉଠାଇ ଜୟ ଜଗନ୍ନାଥ ଡାକରେ ପୁରି ଉଠୁଥିଲା ବଡଦାଣ୍ଡ ।