ଲକ୍ଷ୍ମୀପୁର ହିଂସା ଘଟଣାରେ ଘେରିଲେ ବିରୋଧୀ । ଶରଦ ପାୱାର କହିଲେ, ୟୁପିରେ ଏବେ ଜାଲିଆନାୱାଲାବାଗ ହତ୍ୟାକାଣ୍ଡ ଭଳି ସ୍ଥିତି ।
କନକ ବ୍ୟୁରୋ: ଉତ୍ତରପ୍ରଦେଶ ଲକ୍ଷ୍ମୀପୁର ଘଟଣାରେ ଏବେ ଗୋଟିଏ ଭିଡିଓ ସାମ୍ନାକୁ ଆସିଛି । ଯେଉଁଥିରେ ଗୋଟଏ ଗାଡି ଜାଣିଶୁଣି ପ୍ରଦର୍ଶନ କରୁଥିବା କୃଷକ ଉପରେ ମାଡି ଯାଉଥିବା ଦେଖିବାକୁ ମିଳିଛି । ଏହି ଘଟଣାକୁ ନେଇ ଏବେ ଉତ୍ତରପ୍ରଦେଶରେ ରାଜନୀତି ତେଜୁଥିବାବେଳେ ବିରୋଧୀ ଦଳମାନେ ଏହାକୁ ‘ଜାଲିୱାନାବାଗ ହତ୍ୟାକାଣ୍ଡ’ ସହିତ ତୁଳନା କରିଛନ୍ତି । ଖାଲି ସେତିକି ନୁହେଁ, ବିଜେପିର ସହଯୋଗୀ ଜେଡିୟୁ ଦଳର ନେତା ମଧ୍ୟ ଏହାକୁ ନେଇ ସରକାରକୁ ଘେରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏନସିପି ନେତା ଶରଦ ପାୱାର କହିଚନ୍ତି, ଜାଲିୱାନାବାଗରେ ଯେଉଁଭଳି ସ୍ଥିତି ଥିଲା, ଏବେ ୟୁପିରେ ସେହିଭଳି ସ୍ଥିତି ଅଛି । କୃଷକମାନେ ଏହାକୁ କଦାପି ଭୁଲିବେ ନାହିଁ । କେନ୍ଦ୍ର ସରକାରଙ୍କୁ ନିଶ୍ଚିତ ଏହାର ସାମ୍ନା କରିବାକୁ ପଡିବ । କୃଷକଙ୍କ ଏହି ହତ୍ୟା ପାଇଁ ୟୁପି ସରକାର ଓ କେନ୍ଦ୍ର ସରକାର ଦାୟୀ ବୋଲି ଶରଦ କହିଛନ୍ତି । ତେବେ ଏହି ଘଟଣାର ଯାଞ୍ଚ ସୁପ୍ରିମକୋର୍ଟର ସିଟିଙ୍ଗ୍ ଜଜଙ୍କ ଏକ କମିଟି ଦ୍ୱାରା କରାଇବାକୁ ସେ ଦାବି କରିଛନ୍ତି ।
ଅନ୍ୟପଟେ ବିଜେପିର ସହଯୋଗୀ ଦଳ ଜେଡିୟୁର ନେତା କେସି ତ୍ୟାଗୀ ମଧ୍ୟ ଏହି ଘଟଣାରେ ସରକାରକୁ ଘେରିଛନ୍ତି । ଯେଉଁ ଭିଡିଓ ଭାଇରାଲ ହେଉଛି, ତାହା ବ୍ରିଟିଶକାଳକୁ ମନେ ପକାଇ ଦେଉଛି । ଯେତେବେଳେ ଆଇନ୍ କାନୁନ ବ୍ୟବସ୍ଥା ନାମକୁ ମାତ୍ର ରହିଥିଲା । ତେବେ ଏହି ଘଟଣାର ଯାଞ୍ଚ ଠିକ୍ ଭାବେ ହେବା ନେଇ ସେ ଆଶାବାଦୀ ଥିବା କହିଛନ୍ତି ।
ସେହିପରି ଶିବସେନା ସାଂସଦ ସଞ୍ଜୟ ରାଉତ କହିଛନ୍ତି, ଏହି ଘଟଣା ବେଶ ଦୁଃଖଦ । ପ୍ରଧାନମନ୍ତ୍ରୀ ମୋଦୀ ବହୁ ଘଟଣାରେ ଭାବୁକ ହେବା ଦେଖିବାକୁ ମିଳୁଛି । ହେଲେ ଏପର୍ଯ୍ୟନ୍ତ ପ୍ରଧାନମନ୍ତ୍ରୀ ମୋଦୀ ଏହି ଘଟଣାରେ ମୁହଁ ଖୋଲି ନାହାଁନ୍ତି । ତା ସହିତ ପ୍ରିୟଙ୍କା ଗାନ୍ଧୀଙ୍କୁ ରୋକି ସରକାର ଭୁଲ କରିଛନ୍ତି । ଯଦି ଏହି ଘଟଣା କେଉଁ ଅନ୍ୟ ରାଜ୍ୟରେ ହୋଇଥାନ୍ତା, ତେବେ ବିଜେପି ନେତାମାନେ ଶାନ୍ତ ହୋଇ ବସିନଥାନ୍ତେ ବୋଲି ସେ କହିଛନ୍ତି । ସେପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବେ ଉତ୍ତରପ୍ରଦେଶ ଗସ୍ତରେ ଅଛନ୍ତି । ଏହି ଗସ୍ତ ସମୟରେ କଂଗ୍ରେସ ମୁଖପାତ୍ର ରଣଦୀପ ସୁରଜେବାଲା ମୋଦୀଙ୍କୁ କଟାକ୍ଷ କରିଛନ୍ତି । ଯଦି ସାହାସ ଅଛି, ତେବେ ପ୍ରଧାନମନ୍ତ୍ରୀ ଲକ୍ଷ୍ମୀପୁର ଯାଆନ୍ତୁ ଓ ମନ୍ତ୍ରୀଙ୍କୁ ବରଖାସ୍ତ କରନ୍ତୁ ବୋଲି ସେ କହିଛନ୍ତି ।