ଚାଷୀଙ୍କ ପାଇଁ ପୋଲିସ ହେପାଜତରେ ଆମରଣ ଅନଶନରେ ବସିଲେ ପ୍ରିୟଙ୍କା

72

କନକ ବ୍ୟୁରୋ : ଲକ୍ଷ୍ମୀପୁରରେ ହୋଇଥିବା ଚାଷୀଙ୍କ ହତ୍ୟା ପ୍ରତିବାଦରେ ପ୍ରିୟଙ୍କା ଗାନ୍ଧୀ ଆକ୍ସନ ମୋଡକୁ ଆସିଛନ୍ତି । ତାଙ୍କୁ ଚାଷୀପରିବାରକୁ ଭେଟିବାର ସୁଯୋଗ ନଦେଇ ପୋଲିସ ହେପାଜତକୁ ନେବା ପରେ ପ୍ରିୟଙ୍କା ଗାନ୍ଧୀ ପ୍ରଥମେ ତାଙ୍କୁ ରଖାଯାଇଥିବା ଗେଷ୍ଟ ହାଉସରେ ଝାଡୁ ମାରୁଥିବାର ଦୃଶ୍ୟ ସମସ୍ତଙ୍କୁ ଚକିତ କରିଥିଲା । ଏବେ ସେ ଚାଷୀଙ୍କ ସ୍ୱାର୍ଥରେ ପୋଲିସ ହେପାଜତରେ ଥାଇ ଅମରଣ ଅନଶନ ଆରମ୍ଭ କରିଛନ୍ତି । ସେ କହିଛନ୍ତି କି ଯେ ପର୍ଯ୍ୟନ୍ତ ତାଙ୍କୁ ମୃତ ଚାଷୀଙ୍କ ପରିବାରକୁ ଭେଟିବାକୁ ଦିଆଯିବ ନାହିଁ ସେପର୍ଯ୍ୟନ୍ତ ସେ ଉପାସରେ ଅନଶନ କରିବେ ।

ଉତ୍ତରପ୍ରଦେଶ କଂଗ୍ରେସ ଅଧ୍ୟକ୍ଷ ଅଜୟ କୁମାର ଲଲ୍ଲୁ କହିଛନ୍ତି କି କଂଗ୍ରେସ ରାଜ୍ୟସଭା ସଦସ୍ୟ ଦିପେନ୍ଦ୍ର ହୁଡ୍ଡାଙ୍କ ସମେତ ବରିଷ୍ଠ ନେତାମାନେ ଲକ୍ଷ୍ମୀପୁର ଯାଇ ମୃତ କୃଷକଙ୍କ ପରିବାରକୁ ଭେଟିବାକୁ ଚାହୁଁଥିବା ବେଳେ ସୀତାପୁର ଠାରେ ପୋଲିସ ସେମାନଙ୍କୁ ଉଠାଇ ନେଇଥିଲା । ଏହାସହ ପୋଲିସ କର୍ମୀମାନେ ପ୍ରିୟଙ୍କାଙ୍କ ସହ ଠେଲା ପେଲା କରିଥିବା ବି ଲଲ୍ଲୁ ଅଭିଯୋଗ କରିଛନ୍ତି ।

କହିରଖୁ କି ଲକ୍ଷ୍ମୀପୁର ଘଟଣାକୁ ନେଇ ଏବେ ସାରା ଦେଶରେ ରାଜନୀତି ସରଗରମ ହେବାରେ ଲାଗିଛି । ଗତକାଲି ରାତିରୁ ବିରୋଧୀଦଳ ନେତାଙ୍କ ସମେତ ଅନେକ କୃଷକନେତା ଲକ୍ଷ୍ମୀପୁର ଯିବାକୁ ଚେଷ୍ଟା କରୁଥିବା ବେଳେ ସରକାରଙ୍କ ନିର୍ଦ୍ଦେଶରେ ପୋଲିସ ସେମାନଙ୍କୁ ବାଟରୁ ଅଟକାଇ ହେପାଜତକୁ ନେଉଛି । ସେପଟେ ପଞ୍ଜାବରେ ସିଦ୍ଧୁ ଓ କଂଗ୍ରେସ କର୍ମୀମାନେ ରାଜଭବନ ଆଗରେ ଧାରଣା ଦେଇଛନ୍ତି ।