ଯୌନ ନିର୍ଯାତନାରେ ଶିକାର ହୋଇ ଆତ୍ମହତ୍ୟା କଲେ ବ୍ୟାଘ୍ର ଅଭୟାରଣ୍ୟର ଲେଡି ସିଂଘମ ଦୀପାଳୀ ଚଭନ । ଆତ୍ମହତ୍ୟା ନୋଟରେ ଉପରିସ୍ଥ ଅଧିକାରୀଙ୍କ ବିରୋଧରେ ସାଂଘାତିକ ଅଭିଯୋଗ
କନକ ବ୍ୟୁରୋ : ମହାରାଷ୍ଟ୍ର ଅମରାବତରୀ ମେଲଘାଟ ବ୍ୟାଘ୍ର ଅଭୟାରଣ୍ୟରେ ନିୟୋଜିତ ୨୮ ବର୍ଷିୟ ମହିଳା ବନ ଅଧିକାରୀ ଦୀପାଳୀ ଚଭନ ନିଜ ବନ୍ଧୁକରୁ ଗୁଳିମାରି ଆତ୍ମହତ୍ୟା କରିଛନ୍ତି । ଶୁକ୍ରବାରଦିନ ବିଳମ୍ବିତ ରାତିରେ ହରିମଲ ଗାଁ ନିକଟରେ ଥିବା ନିଜ ସରକାରୀ ବାସଭବନ ଠାରେ ସେ ଏଭଳି କରିଛନ୍ତି । ବନ୍ଧୁକ ସହିତ ତାଙ୍କର ରକ୍ତ ଜୁଡୁବୁଡୁ ଶବକୁ ସଂପର୍କୀୟ ଓ ସହଯୋଗୀଙ୍କ ଦ୍ୱାରା ଉଦ୍ଧାର କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଜଙ୍ଗଲ ମାଫିଆଙ୍କ ବିରୋଧରେ ତାଙ୍କର ଲଢେଇକୁ ନେଇ ସାରା ମହାରାଷ୍ଟ୍ରରେ ଲେଡି ସଂଘମ୍ ନାମରେ ସେ ପରିଚିତ ଥିଲେ । ତାଙ୍କ ସ୍ୱାମୀ ରାଜେଶ ମୋହିତେ ଚିଖଲାଧାରା ଟ୍ରେଜେରୀରେ ଜଣେ ଅଧିକାରୀ ଭାବେ କାର୍ଯ୍ୟ କରୁଛନ୍ତି ।
ସବୁଠାରୁ ବଡକଥା ହେଉଛି ଦୀପାଳୀ ଲେଖିଥିବା ତାଙ୍କ ସୁଇସାଇଡ୍ ନୋଟ୍ । ସେ ତାଙ୍କ ସୋଇସାଇଡ ନୋଟରେ କିଛି ଆଶ୍ଚର୍ଯ୍ୟ କରିଦେବା ଭଳି କଥା ଲେଖିଛନ୍ତି । ଘରୁ ବାହାରିଲେ ଜଙ୍ଗଲମାଫିଆଙ୍କ ହୋସ୍ ଉଡିଯାଉଥିଲା । ସେଭଳି ଜଣେ କର୍ମଚାରୀ ନିଜ ଉପରିସ୍ଥ ଅଧିକାରୀଙ୍କ ଦ୍ୱାରା ଯୌନ ନିର୍ଯାତନାର ଶିକାର ହୋଇଥିବା କଥା ସେ ଲେଖିଛନ୍ତି । ସେ ଲେଖିଛନ୍ତି କି ତାଙ୍କୁ ତାଙ୍କର ଉପରିସ୍ଥ ଅଧିକାରୀ ଶିବକୁମାର ମାନସିକ ଓ ଯୌନ ନିର୍ଯାତନା ଦେଉଥିଲେ । ଯେଉଁଥିରେ ଅସହ୍ୟ ହୋଇ ସେ ଆତ୍ମହତ୍ୟା କରିଛନ୍ତି ।
କହିରଖୁ କି ଦୀପାଳୀ କିଛିଦିନ ପୂର୍ବରୁ ଶିବକୁମାରଙ୍କ ବିରୋଧରେ ଏମଟିଆର ଫିଲ୍ଡ ଡାଇରେକ୍ଟର ଏମ୍.ଏସ୍ ରେଡ୍ଡିଙ୍କ ନିକଟରେ ଅଭିଯୋଗ କରିଥିଲେ । ହେଲେ ଶ୍ରୀ ରେଡ୍ଡି ଏହି ଅଭିଯୋଗ ଉପରେ କିଛି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲେ । ଏହାପରେ ଦୀପାଳୀ ଶିବକୁମାର କିଭଳି କାର୍ଯ୍ୟରେ ଥିବା ବେଳେ ମଦ୍ୟପାନ କରି ତାଙ୍କ ସହ ଅଭଦ୍ର ବ୍ୟବହାର କରୁଛନ୍ତି ତାହା ପ୍ରକାଶ କରିଥିଲେ । ଏହାସହ ତାଙ୍କସହ ଯୌନ ସଂପର୍କ ରଖିବାକୁ ଶିବ କୁମାର ତାଙ୍କୁ ବାଧ୍ୟ କରୁଥିବା କଥା ସେ କହିଥିଲେ । ଦୀପାଳୀ ବାରମ୍ବାର ଏଭଳି ଅଭିଯୋଗ ଆଣିବା ପରେ ଶିବକୁମାର ତାଙ୍କୁ ଅଧିକ କାମର ବୋଝ ଦେବା , ମାନସିକ ନିର୍ଯାତନା ଦେବା ସହ ଗୋଟିଏ ମାସର ଦରମା ଅଟକାଇ ଦେଇଥିଲେ । ଏସବୁ ଫଳରେ ମାନସିକ ଭାରସାମ୍ୟ ହରାଇ ସେ ଏଭଳି ନିଷ୍ପତ୍ତି ନେଇଥିବା କଥା ସୁଇସାଇଡ ନୋଟରେ ଲେଖିଛନ୍ତି ଲେଡି ସିଙ୍ଘମ୍ ଦୀପାଳୀ ।
ଆଉ ଏକ ଗୁରୁତ୍ୱପୂର୍ଣ୍ଣ କଥା ଦୀପାଳୀଙ୍କ ଶବ ନେଇ ନାହାନ୍ତି ତାଙ୍କ ପରିବାର ଲୋକେ । ସେମାନେ କହିଛନ୍ତି କି ସୁଇସାଇଡ ନୋଟରୁ ସ୍ପଷ୍ଟ ହୋଇଛି କି ଦୀପାଳୀଙ୍କ ଆତ୍ମହତ୍ୟା ପାଇଁ ଶିବକୁମାର ଦାୟୀ । ତେଣୁ ବିଭାଗ ତରଫରୁ ଶିବକୁମାରଙ୍କୁ ଗିରଫ୍ ନକରାଯିବା ଯାଏଁ ସେମାନେ ଦୀପାଳୀଙ୍କ ଶବ ନେବେ ନାହିଁ କି ଅନ୍ତିମ ସଂସ୍କାର କରିବେ ନାହିଁ । ପରିବାର ଲୋକଙ୍କ ଏହି ଦାବି ପରେ ଅମରାବତୀ ପୋଲିସ ଡେପୁଟି କଞ୍ଜରଭେଟର ଅଫ୍ ପୋଲିସ (ଡିସିଏଫ୍) ଶିବକୁମାରଙ୍କୁ ନାଗପୁର ରେଳ ଷ୍ଟେସନ ଠାରୁ ଗିରଫ୍ କରିଛି ।