କନକ ବ୍ୟୁରୋ: ନିଛାଟିଆରେ ୨ ଛାତ୍ରୀଙ୍କୁ ନିର୍ଯାତନା ଘଟଣା । ନିର୍ଯାତନା ଦିଆଯାଉଥିବାର ଭିଡିଓ ଭାଇରାଲ ହେବାର ଦିନଟିଏ ବିତି ଯାଇଥିଲେ ବି ଏଯାଏଁ କାହାରିକୁ ଗିରଫ କରିନି ପୋଲିସ । କିମ୍ବା ପୋଲିସ ପାଖରେ ଭିଡିଓ ନେଇ କୌଣସି ଖବର ନାହିଁ । ଭାଇରାଲ ଭିଡିଓରେ କିଏ କିଏ ଅଛନ୍ତି ? ନିର୍ଦ୍ଦିଷ୍ଟ କେଉଁ ସ୍ଥାନରେ ଏହି ଭିଡିଓ ତିଆରି ହୋଇଛି ? ଭିଡିଓରେ ଦିଶୁଥିବା ଯୁବକଙ୍କ ଛଡା ୟା ପଛରେ ପ୍ରକୃତ ଭିଲେନ କିଏ ? ଏ ସମସ୍ତ ପ୍ରଶ୍ନ ଉପରୁ ଏ ପର୍ଯ୍ୟନ୍ତ ପୋଲିସ ପରଦା ଉଠାଇ ପାରିନଥିବା ବେଳେ ଭିଡିଓରେ ଦିଶୁଥିବା ଗାଡି ନମ୍ବର ଝାରସୁଗୁଡାର ବୋଲି ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଭିଡିଓ ବାବଦରେ କିଛି ରେଜିଷ୍ଟ୍ରେସନ ହୋଇନି ବୋଲି ଏସପି କହିଥିବା ବେଳେ ସବିଶେଷ ତଥ୍ୟ ପାଇଁ ତଦନ୍ତ କରିବାକୁ ଆଇଆଇସିଙ୍କୁ ନିର୍ଦ୍ଦେଶ ଦେଇଛନ୍ତି । ନିର୍ଦ୍ଦେଶ ପାଇଲା ପରେ କୁଚିଣ୍ଡା ଥାନା ଆଇଆଇଏସି ଆକ୍ସନ ମୋଡକୁ ଆସିଛନ୍ତି । ସେ ଏ ଭିଡିଓ ଦେଖିଛନ୍ତି । ଅନେକ ଲୋକଙ୍କୁ ଭିଡିଓ ବାବଦରେ କହିଥିବା ବେଳେ ଭିଡିଓର ଭେରିଫିକେସନ ଚାଲିଛି । ଭେରିଫିକେସନରୁ ସ୍ପଷ୍ଟ ହେଲେ ଭିଡିଓରେ ଥିବା ସମସ୍ତ ଅସାମାଜିକ ଯୁବକଙ୍କୁ ଗିରଫ କରାଯିବ ବୋଲି ପୋଲିସ ସୂଚନା ଦେଇଛି ।
ତେବେ ଗତକାଲି ନିଛାଟିଆ ରାସ୍ତାରେ ୨ ଛାତ୍ରୀଙ୍କୁ ୮ରୁ ୧୦ ଜଣ ଅସାମାଜିକ ଯୁବକ ନିର୍ଯାତନା ଦେଇଥିଲେ । ଶୂନଶାନ ରାସ୍ତାରେ ଛାତ୍ରୀଙ୍କୁ ଘେରି ଯାଇ ଅଶାଳୀନ ଭାଷରେ ଗାଳି ଗୁଲଜ କରିବା ସହ ସେମାନଙ୍କ ସହ ଜୋରଜବରଦସ୍ତି କରିଥିଲେ । ଛାତ୍ରୀଙ୍କ ମୋବାଇଲ ଛଡାଇ ନେଇ ୫ ହଜାର ଟଙ୍କା ଦେବାକୁ ମଧ୍ୟ ଧମକ ଦେଇଥିଲେ । ଭାଇରାଲ ହୋଇଥିବା ୪ ମିନିଟର ଛାତିଥରା ଭିଡିଓରେ ଛାତ୍ରୀ ଦୁଇ ଜଣ କାକୁତି ମିନତି ହେଉଥିବା ଦେଖିବାକୁ ମିଳିଥିଲା । ଯୁବକଙ୍କ ଗୋଡ ହାତ ଧରି ସେମାନଙ୍କୁ ଛାଡିଦେବାକୁ ଉଭୟେ ଅନୁରୋଧ କରିଥିବା ବେଳେ ଅସାମାଜିକ ଯୁବକମାନେ ସେମାନଙ୍କୁ ଛାଡିବା ପରିବର୍ତ୍ତେ ନିର୍ଯାତନାର ଭିଡିଓ ସୁଟିଂ କରିଥିଲେ ।
ତେବେ ଘଟଣାକୁ ୨୪ ଘଣ୍ଟା ବିତି ଯାଇଥିଲେ ବି ଭିଡିଓ ସୁଟ କରିଥିବା ଏବଂ ନିର୍ଯାତନା ଦେଇଥିବା ଅସାମାଜିକ ଯୁବକ ଗଲେ କୁଆଡେ ? ଆପଣଙ୍କ ଅଂଚଳର ଆଖପାଖରେ ସେମାନେ ବୁଲୁନାହାନ୍ତି ତ? ନିକାଂଚନ ଜାଗାରେ କଲେଜ ପଢୁଆ ଯୁବତୀଙ୍କୁ ଅତ୍ୟାଚାର କରିଥିବା ଏହି ଅସାମାଜିକ ଯୁବକ କେବେ ଧରାପଡିବେ? ଛାତ୍ରୀଙ୍କ ସୁରକ୍ଷା ଦୃଷ୍ଟିରୁ ଏ ସମସ୍ତ ପ୍ରଶ୍ନ ଉପରେ ପୋଲିସ ଗୁରୁତ୍ୱ ଦେବା ଜରୁରୀ ।